Septemba 1, 2024, Ndugu Massimiliano Bricconi, mshiriki wa Halmashauri ya Tawi ya Italia alitangaza kutolewa kwa Biblia Takatifu—Tafsiri ya Ulimwengu Mpya ikiwa nzima katika Lugha ya Ishara ya Italia. Tangazo hilo lilitolewa kwa watu 854 waliohudhuria Kusanyiko la Eneo la 2024 la “Tangaza Habari Njema!” kwenye Jumba la Kusanyiko huko Roma, Italia. Baada ya kutolewa, Biblia hiyo ilikuwa tayari kwa ajili ya kupakuliwa kwenye jw.org na programu ya JW Library Sign Language.

Hii ndiyo Biblia ya kwanza kutolewa ikiwa nzima katika Lugha ya Ishara ya Italia. Mashahidi wa Yehova wamekuwa wakitokeza habari zinazotegemea Biblia katika Lugha ya Ishara ya Italia tangu mwaka wa 1998. Leo, kuna ndugu na dada 845 wanaotumikia katika makutaniko 15 ya Lugha ya Ishara ya Italia na pia vikundi 12 na vikundi vidogo 10 nchini Italia.

Septemba 6, 2024, Ndugu Frederick Nyende, mshiriki wa Halmashauri ya Tawi ya Uganda alitangaza kutolewa kwa vitabu vya Biblia vya Mathayo, Marko, Luka, na Yohana katika Kitoro. Tangazo hilo lilitolewa katika Kusanyiko la Eneo la 2024 la “Tangaza Habari Njema!” lililofanywa jijini Hoima, Uganda. Kusanyiko hilo lilikuwa na hudhurio la watu 928 na wote walipata nakala iliyochapishwa ya Biblia—Habari Njema Kulingana na Mathayo. Baada ya kutolewa, Biblia hiyo ilikuwa tayari kwa ajili ya kupakuliwa kwenye jw.org na programu ya JW Library.

Inakadiriwa kwamba nchini Uganda kuna watu milioni 2.2 hivi wanaozungumza Kitoro na Kinyoro, lugha inayokaribiana na Kitoro. Tafsiri nyingi za Biblia katika lugha hizo hazitumii jina la Mungu, Yehova. Ndugu na dada zetu 374 wanaotumikia katika makutaniko mawili ya Kitoro na manne ya Kinyoro nchini Uganda wamepata tafsiri inayoeleweka kwa urahisi ya vitabu vinne vya Injili. Watafurahia kuitumia katika huduma na kwenye mikutano.

Septemba 8, 2024, kitabu cha Mathayo katika Kiuighur (cha Kiarabu) na Kiuighur (cha Kisirili) kilitolewa katika mkutano wa pekee uliofanywa kwenye ofisi ya tawi ya Kazakhstan mjini Almaty, Kazakhstan. Tukio hilo lilikuwa na hudhurio la watu 483. Baada ya kutolewa, Biblia hiyo ilikuwa tayari kwa ajili ya kupakuliwa kwenye jw.org na programu ya JW Library katika lugha hizo mbili.

Tafsiri nyingi za Biblia za Kiuighur (cha Kiarabu) na Kiuighur (cha Kisirili) zinatumia lugha ya zamani ambayo si rahisi kuelewa. Kuna watu milioni 11 hivi wanaozungumza Kiuighur na wengi wao wanaishi barani Asia. Hata hivyo, kuna watu wanaozungumza Kiuighur barani Afrika, Ulaya, na Amerika ya Kaskazini.

Septemba 13, 2024, Ndugu Moses Oundo, mshiriki wa Halmashauri ya Tawi ya Uganda, alitangaza kutolewa kwa vitabu vya Biblia vya Mathayo, Marko, Luka, na Yohana katika Kilhukonzo kwa watu 925 waliohudhuria Kusanyiko la Eneo la 2024 la “Tangaza Habari Njema!” jijini Bwera, Uganda. Wote waliohudhuria walipata nakala iliyochapishwa ya Biblia—Habari Njema Kulingana na Mathayo. Baada ya kutolewa, vitabu hivyo vinne vilikuwa tayari kwa ajili ya kupakuliwa kwenye jw.org na JW Library.

Kuna watu milioni moja hivi wanaozungumza Kilhukonzo nchini Uganda. Mashahidi wa Yehova walianza kutafsiri machapisho ya Kilhukonzo mwaka wa 2001. Kwa sasa, kuna ndugu na dada 324 wanaotumikia katika makutaniko sita ya Kilhukonzo.

Septemba 15, 2024, Ndugu Jethro Barclay, mshiriki wa Halmashauri ya Tawi ya Liberia, alitangaza kutolewa kwa vitabu vya Biblia vya Mathayo na Marko katika Kiingereza cha Liberia kwenye programu ya pekee iliyofanywa kwenye Jumba la Kusanyiko huko Johnsonville, Liberia. Watu 1,176 walihudhuria tukio hilo la pekee katika Jumba la Kusanyiko. Isitoshe, makutaniko yote ya Kiingereza cha Liberia nchini humo yalipata mwaliko wa kusikiliza programu hiyo kupitia video iliyounganishwa kwenye mtandao. Baada ya kutolewa, vitabu hivyo vya Biblia vilikuwa tayari kwa ajili ya kupakuliwa kwenye jw.org na programu ya JW Library. Nakala zilizochapishwa za Biblia—Habari Njema Kulingana na Mathayo zitapatikana hivi karibuni.

Baadhi ya vitabu vya Biblia vinapatikana katika Kiingereza cha Liberia katika mfumo wa rekodi za sauti. Hata hivyo, vitabu hivyo viwili vilivyotolewa kwenye Kusanyiko, ndivyo vitabu vya kwanza kabisa kuchapishwa katika Kiingereza cha Liberia. Ingawa Kiingereza ndiyo lugha rasmi ya Liberia, inakadiriwa kwamba kuna watu milioni 1.6 wanaozungumza Kiingereza cha Liberia kutia ndani ndugu na dada zetu 7,034 wanaotumikia katika makutaniko 120.

Septemba 20, 2024, Ndugu Lázaro González, mshiriki wa Halmashauri ya Tawi ya Amerika ya Kati, alitangaza kutolewa kwa vitabu vya Biblia vya Mathayo, Marko, Luka, na Yohana katika Kinahuatl (cha Guerrero) katika siku ya kwanza ya Kusanyiko la Eneo la 2024 la “Tangaza Habari Njema!” lililofanywa kwenye Jumba la Kusanyiko la Chilpancingo, Guerrero, Mexico. Kulikuwa na hudhurio la watu 769. Isitoshe, wengine 742 waliohudhuria kusanyiko hilo la eneo jijini Tlapa de Comonfort, Mexico, walisikiliza hotuba hiyo kupitia video mtandaoni. Wahudhuriaji katika sehemu zote walipata nakala zilizochapishwa za Biblia—Habari Njema Kulingana na Mathayo, na baada ya kutolewa, vitabu vyote vinne vilikuwa tayari kwa ajili ya kupakuliwa katika jw.org na programu ya JW Library.

Kuna watu 250,000 hivi wanaozungumza Kinahuatl (cha Guerrero) nchini Mexico. Kutaniko la kwanza la Kinahuatl (cha Guerrero) lilianzishwa mwaka wa 1987. Leo kuna ndugu na dada 1,216 wanaotumikia katika makutaniko 37 ya Kinahuatl (cha Guerrero) na vikundi 2 nchini Mexico.