MEI 3, 2022
HABARI ZA ULIMWENGUNI POTE
“Endelea Kuimarisha Urafiki Wako Pamoja na Yehova”
Programu ya Pekee Yawaimarisha Ndugu Nchini Ukrainia na Nchini Poland
Aprili 26, 2022, Ndugu Mark Sanderson wa Baraza Linaloongoza la Mashahidi wa Yehova, alitembelea Poland ili kuwatia moyo ndugu na dada walioathiriwa na vita vinavyoendelea nchini Ukrainia.
Ndugu nchini Poland wakifanya kazi kwenye idara ya sauti na video
Makutaniko yote ya Poland na Ukrainia yalialikwa kwenye programu ya pekee iliyofanyika Aprili 30, 2022. Nchini Poland, wakimbizi waliotoka Ukrainia na wale walioshiriki kazi ya kutoa misaada walialikwa kuhudhuria programu hiyo iliyofanyiwa kwenye Jumba la Kusanyiko la Warsaw. Ukijumlisha wale walio katika Jumba la Kusanyiko na wale waliounganishwa kupitia video, jumla ya watu 250,000 nchini Poland na nchini Ukrainia walihudhuria.
Ndugu Sanderson alisema hivi: “Ndugu na dada ulimwenguni pote wanawafikiria sana na wanasali kwa ajili yenu. Kwenye makao makuu, sala zinatolewa kila siku kwa ajili ya ndugu na dada walio Urusi na Ukrainia, na sisi pia tunasali kwa ajili yenu katika mikutano ya Baraza Linaloongoza.” Aliwahakikisha wasikilizaji kwamba “mtu anapopata magumu haimaanishi kwamba amepoteza kibali cha Yehova. Yehova anawaona, anawapenda, na yupo karibu hasa na wale walio katika taabu.”
Kikundi cha ndugu na dada waliopoteza makao yao yaliyokuwa Mariupol, Ukrainia wakitazama programu ya pekee
Ndugu Sanderson aliendelea kusema hivi: “Endelea kuimarisha urafiki wako pamoja na Yehova. Lengo letu si kuokoka tu, baada ya kukabili magumu haya, tunataka kuwa na imani yenye nguvu zaidi na kumkaribia Yehova zaidi. Yehova anatufundisha kufanya hivyo.”
Serhiy, ambaye ni mzee wa kutaniko huko Odessa, Ukrainia alisema hivi: “Kwa majuma kadhaa yaliyopita, nimepoteza usingizi kwa sababu nimekuwa nikihisi wasiwasi mwingi, huzuni na woga. Hata hivyo, [programu hiyo ya pekee] iliimarisha imani yangu kwamba Yehova anawajali watu wake si kama kikundi tu bali pia tukiwa mtu mmoja-mmoja.”
Tatiana, dada yetu ambaye ni mkimbizi kutoka Kyiv, Ukrainia alisema hivi: “Leo, nimehisi Yehova akiwa karibu sana nami. Ninahisi kana kwamba Yehova ananikumbatia, na ninahisi upendo wake. Yehova yupo pamoja nasi popote tulipo.”
Tunawapenda sana ndugu na dada zetu, na tuna uhakika kwamba programu hii ya pekee imethibitisha ‘upendo mshikamanifu’ wa Yehova kwa watu wake.—Zaburi 136:1.
Huenda Ukapenda Pia
TAARIFA ZA HABARI
