SEPTEMBA 27, 2022 | HABARI ZILIONGEZWA: MACHI 22, 2024
HABARI ZA ULIMWENGUNI POTE

HABARI ZA KARIBUNI—HUKUMU YAPINDULIWA | Yehova Awasaidia Kushinda Hisia za Kuvunjika Moyo

CHEZA

Machi 21, 2024, Mahakama Kuu ya Jamhuri ya Krimea ilipindua hukumu dhidi ya Ndugu Taras Kuzo na mke wake, Dada Darya Kuzo, pamoja na Ndugu Sergey Lyulin na Ndugu Petr Zhiltsov. Waliachiliwa mara moja kutoka kizuizini. Kesi yao sasa itarudishwa kwenye Mahakama ya Jiji la Yalta katika Jamhuri ya Crimea ili isikilizwe upya.

Februari 27, 2023, Mahakama ya Jiji la Yalta katika Jamhuri ya Crimea iliwahukumu Ndugu Taras Kuzo na mke wake, Dada Darya Kuzo, pamoja na Ndugu Sergey Lyulin na Ndugu Petr Zhiltsov. Darya alipewa kifungo cha nje cha miaka mitatu. Hahitaji kwenda gerezani wakati huu. Taras alihukumiwa kifungo cha miaka sita na nusu gerezani. Sergey na Petr walihukumiwa kifungo cha miaka sita na mwezi mmoja, kila mmoja. Ndugu wote watatu walipelekwa gerezani moja kwa moja kutoka mahakamani.

Mfuatano wa Matukio

Machi 4, 2021

Kesi ya uhalifu ilifunguliwa dhidi ya Taras, na alishtakiwa kwa kuchangia pesa kwa ajili ya shirika lenye msimamo mkali
Machi 11, 2021

Nyumba tisa za Mashahidi wa Yehova zilivamiwa kutia ndani nyumba ya Kuzo na ya Sergey. Taras aliwekwa kizuizuni
Machi 12, 2021

Taras aliachiliwa na kuwekwa kwenye kifungo cha nyumbani, ingawa hakuruhusiwa kuishi na familia yake
Julai 29, 2021

Kesi za uhalifu zilifunguliwa dhidi ya Darya, Petr, na Sergey. Petr aliwekwa kizuizini
Julai 30, 2021

Kesi hizo za uhalifu ziliunganishwa na kuwa kesi moja. Petr aliachiliwa na kuwekwa katika kifungo cha nyumbani
Agosti 10, 2021

Sergey alikamatwa na kusafirishwa hadi eneo lingine lililokuwa umbali wa kilometa 800, na huko akawekwa mahabusu. Safari hiyo ilichukua saa 16, na katika kipindi hicho chote mikono yake ilikuwa imefungwa juu kwenye bomba la chuma na miguu yake ilikuwa imefungwa kwenye kiti alichokalia.
Machi 1, 2022

Sergey aliachiliwa kutoka mahabusu na akawekwa katika kifungo cha nyumbani
Aprili 4, 2022

Kesi ya uhalifu ilianza
Julai 11, 2022

Petr, Sergey, na Taras waliachiliwa kutoka kwenye kifungo cha nyumbani na wakawekewa vizuizi vya kusafiri

Maelezo Mafupi Kuwahusu

Darya Kuzo

Alizaliwa: 1982 (Voronezh, Eneo la Voronezh)

Maisha Yake: Amefanya kazi akiwa mwalimu, msimamizi wa hoteli, na msusi pia. Kwa sasa anauza vipodozi

Alijifunza ukweli alipokuwa mtoto. Alibatizwa na kuwa Shahidi wa Yehova mwaka wa 2000. Alifunga ndoa na Taras mwaka wa 2008. Wana mwana mmoja wa kiume na binti mmoja

Maelezo ya Kibinafsi

Watoto wako wamekusaidiaje katika kipindi hiki kigumu?

Nakumbuka pindi moja nilikuwa nimejificha bafuni nikilia na kumsihi Yehova anisaidie kuvumilia. Muda si muda, mwanangu wa kiume mwenye umri wa miaka tisa aliingia humo na akaanza kuniomba niache kulia. Kisha akanionyesha fungu la pili la Wimbo namba 61 “Songeni Mbele, Enyi Mashahidi,” na kibwagizo chake pia. Niliguswa sana na maneno ya wimbo huo! Ninamshukuru sana Yehova kwa kumtumia mwanangu kunikumbusha kwamba tunatembea kwenye barabara yenye magumu, na hivyo tunahitaji kuwa imara na jasiri.

Taras Kuzo

Alizaliwa: 1978 (Yalta)

Maisha Yake: Ni mtaalamu wa uchumi

Alipenda Biblia tangu alipokuwa mtoto. Alikutana na Mashahidi wa Yehova mwaka wa 1999. Alivutiwa sana alipoona kwamba mambo yote aliyokuwa akijifunza yalitegemea Biblia. Alibatizwa mwaka wa 2001

Alifunga ndoa na Darya mwaka wa 2008

Maelezo ya Kibinafsi

Ni nini kimekusaidia kushinda hisia za kuvunjika moyo?

Nilipowekwa kwenye kifungo cha nyumbani, nilizuiwa kuishi na familia yangu. Isitoshe, nilikatazwa kutumia simu na Intaneti na hivyo ilikuwa vigumu kuwasiliana nao. Nilikuwa mpweke sana. Hata hivyo, kila wakati nilipohisi nimelemewa sana, ndugu fulani angekuja kunitembelea. Sikuzote, nilihisi afadhali zaidi baada ya kuzungumza na mtu. Vilevile, nimejaribu kukariri nyimbo zetu za Ufalme ili nitumie muda wangu vizuri kwa kuimba. Ni rahisi zaidi kuvumilia majaribu unapotumia muda wako kuwaza kumhusu Yehova na mambo unayojifunza katika Neno lake.

Petr Zhiltsov

Alizaliwa: 1987 (Yalta)

Maisha Yake: Anafanya kazi ya kurekebisha mifumo inayodhibiti hali ya joto na unyevunyevu na inayosafisha hewa ndani ya jengo.

Mashahidi wa Yehova walimpata walipokuwa wakihubiri nyumba kwa nyumba na akakubali funzo la Biblia. Alibatizwa mwaka wa 2005

Maelezo ya Kibinafsi

Umedumishaje mtazamo mzuri?

Wakati mwingine ninavunjika moyo. Mara nyingi, hilo hutukia ninapokazia fikira vitu ambavyo nimepoteza. Ninapohisi hivyo, mimi hujikumbusha kwamba kuwa na kibali cha Yehova ndilo jambo muhimu zaidi, na kufanya hivyo hunisaidia kushinda hisia za kuvunjika moyo. Vilevile, ninathamini sana chakula cha kiroho ambacho Yehova huandaa. Mambo hayo hunisaidia nisizame katika matatizo, na yananipa nguvu ya kupambana na kuvumilia magumu ya mfumo huu, na kuendelea kuwa na urafiki wa karibu na Yehova.

Ndugu na dada waaminifu wanapokuwa gerezani, kizuizini, au katika kifungo cha nyumbani, huenda wakahisi wamebanwa “kupita kiasi cha kushindwa kusonga,” lakini Yehova hatawaacha kamwe wale wanaoteswa kwa ajili ya jina lake.—2 Wakorintho 4:8, 9.

Huenda Ukapenda Pia

TAARIFA ZA HABARI

Wamefungwa kwa Sababu ya Imani Yao—Urusi

Mashahidi wa Yehova nchini Urusi wamefungwa gerezani kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI