JANUARI 9, 2024 | HABARI ZIMEONGEZWA: OKTOBA 7, 2024
HABARI ZA ULIMWENGUNI POTE

HABARI ZA KARIBUNI—NDUGU WAMEFUNGWA | Kuazimia Kushikamana na Yehova

CHEZA

Oktoba 3, 2024, Mahakama Kuu ya Jamhuri ya Crimea ilibadili hukumu iliyokuwa imetolewa kwa Ndugu Yuriy Gerashchenko na Ndugu Sergey Parfenovich. Awali, walikuwa wamehukumiwa kifungo cha nje cha miaka sita lakini sasa wamehukumiwa miaka sita gerezani. Walipelekwa gerezani moja kwa moja baada ya kutoka mahakamani.

Julai 1, 2024, Mahakama ya Wilaya ya Krasnogvardeyskiy iliyo katika Jamhuri ya Crimea iliwahukumu Ndugu Yuriy Gerashchenko na Sergey Parfenovich kifungo cha nje cha miaka sita na hawahitaji kwenda gerezani wakati huu.

Maelezo Mafupi Kuwahusu

Yuriy Gerashchenko

Alizaliwa: 1979 (Ukrainia)

Maisha Yake: Alifanya kazi akiwa fundi umeme

Alifurahi kujifunza jinsi Biblia ilivyo sahihi na pia kuhusu uthibitisho ulio katika Biblia wa upendo wa Mungu kuwaelekea wanadamu. Alibatizwa na kuwa Shahidi wa Yehova mwaka wa 2000

Alifunga ndoa na Irina mwaka wa 2002

Maelezo ya Kibinafsi

Umejifunza nini kumhusu Yehova kutokana na mambo unayopitia sasa?

Sasa nimejionea jinsi ambavyo Yehova ni mwenye utambuzi. Anajua kile ninachokihitaji hasa na anapenda kutimiza mahitaji yangu. Ninapofikiria mambo niliyopitia hivi karibuni, ninakumbuka jinsi Yehova alivyokuwa akinitayarisha. Ninahisi kama kifaa kilicho mkononi mwake. Fundi stadi hudumisha vifaa vyake katika hali nzuri, anavinoa na kuvitunza ili viwe tayari anapohitaji kuvitumia. Ninaweza kusema kwa uhakika kwamba Yehova amenitayarisha mimi pia. Jambo hilo linanichochea kushikamana naye kabisa bila kumwacha.

Sergey Parfenovich

Alizaliwa: 1972 (Mirnoye, Crimea)

Maisha Yake: Alifanya kazi ya kutunza uwanja wa michezo mbalimbali

Alifurahia sana kujifunza mambo ambayo Ufalme wa Mungu utatimiza wakati ujao. Alibatizwa mwaka 1993 kwenye kusanyiko la kimataifa lililofanywa Kyiv, Ukrainia

Alifunga ndoa na Marina mwaka 1997. Wana mabinti wawili na wana wanne

Maelezo ya Kibinafsi

Ni mfano wa nani katika Biblia ambao umekutia moyo wewe binafsi?

Kwenye Wafilipi 3:10, mtume Paulo aliandika: “Lengo langu ni kumjua yeye na nguvu za ufufuo wake na kushiriki katika mateso yake.” Nimetafakari jinsi Paulo alivyompenda Yesu. Alimpenda Yesu sana hivi kwamba alikuwa tayari kuteseka kama Yesu alivyoteseka. Nimemwomba Mungu anipe roho kama ile aliyokuwa nayo Paulo. Nimesali niwe na azimio kama lake. Kuwa na mtazamo huo kumebadili njia yangu ya kufikiri. Badala ya kujiona kuwa mtu wa kupatwa na matukio mabaya yasiyotazamiwa, ninahisi nimefanya uamuzi thabiti wa kumtumikia Yehova hata ninapopatwa na hali mbaya.

Tunajua kwamba Yehova atawategemeza Yuriy na Sergey, na pia wengine wote wanaodumisha utimilifu wao kadiri anavyoendelea ‘kuwaficha katika kivuli cha mabawa yake.’—Zaburi 17:7, 8.

Mfuatano wa Matukio

Septemba 19, 2022

Kesi ya uhalifu ilifunguliwa dhidi ya Sergey
Septemba 28, 2022

Nyumba ya Sergey ilikuwa miongoni mwa nyumba nane ambazo zilifanyiwa msako na maofisa wa FSB, naye aliwekwa kizuizini kwa muda
Septemba 30, 2022

Sergey alipelekwa mahabusu
Novemba 15, 2022

Sergey aliachiliwa kutoka mahabusu na kuwekwa kwenye kifungo cha nyumbani
Machi 22, 2023

Kesi ya uhalifu ilifunguliwa dhidi ya Yuriy. Alikamatwa, akahojiwa, na kuwekwa mahabusu
Machi 24, 2023

Yuriy aliachiliwa na kuwekwa kwenye kifungo cha nyumbani
Julai 12, 2023

Sergey na Yuriy waliachiliwa kutoka kwenye kifungo cha nyumbani na kuwekewa vizuizi vya kusafiri
Julai 28, 2023

Kesi ya uhalifu ilianza. Mwendesha-mashtaka aliwashtaki Sergey na Yuriy kwa sababu ya kuendelea “kujihusisha katika utendaji wa kihalifu na kuwatisha mashahidi.” Licha ya kwamba hakuwa na ushahidi wowote, hakimu aliamua kuwaweka kwenye kifungo cha nyumbani kwa mara nyingine tena

Ona Pia

TAARIFA ZA HABARI

Wamefungwa kwa Sababu ya Imani Yao—Crimea

Mashahidi wa Yehova huko Crimea wamefungwa kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI