MEI 9, 2022
HABARI ZA ULIMWENGUNI POTE

HABARI ZA KARIBUNI—NDUGU WANAFUNGWA | Familia Huko Crimea Zinaendelea Kuvumilia kwa Msaada wa Yehova

CHEZA

Oktoba 6, 2022, Mahakama ya Wilaya ya Nakhimovskiy iliyo Sevastopol iliwahukumu Ndugu Vladimir Maladyka, Ndugu Vladimir Sakada, na Ndugu Yevgeniy Zhukov. Kila mmoja wao alihukumiwa kifungo cha miaka sita gerezani. Hukumu yao ilianza mara moja.

Mfuatano wa Matukio

Oktoba 1, 2020

Maofisa wa FSB walivamia nyumba tisa za Mashahidi wa Yehova zilizo Sevastopol, kutia ndani nyumba ya familia ya Maladyka, ya Sakada, na ya Zhukov. Walipofanya msako kwenye nyumba ya Maladyka, maofisa hao walikuta pakiti ya maziwa ya unga. Wenye mamlaka walidai kwamba maziwa hayo ya unga yalifanana na “dawa za kulevya,” basi wakampeleka Ndugu Maladyka na mke wake kwenye hospitali ya watu wenye magonjwa ya akili ili kuwapima. Nataliya aliachiliwa baadaye siku hiyo. Ndugu Maladyka, Ndugu Sakada na Ndugu Zhukov walipelekwa kizuizini. Kisha siku iliyofuata walipelekwa mahabusu
Machi 23, 2021

Ndugu Sakada aliachiliwa kutoka mahabusu na akawekwa kwenye kifungo cha nyumbani. Alivishwa kifaa kinachoonyesha mahali popote anapoenda, na akakatazwa kutumia Intaneti, kupiga simu, au kuwasiliana na wenzake wanaohusika katika kesi hiyo
Machi 30, 2021

Ndugu Maladyka aliachiliwa kutoka mahabusu na kuwekwa kwenye kifungo cha nyumbani
Mei 17, 2021

Ndugu Zhukov aliachiliwa kutoka mahabusu baada ya kuwa huko kwa miezi saba kisha akawekwa kwenye kifungo cha nyumbani
Septemba 30, 2021

Kesi ya uhalifu ilianza

Maelezo Mafupi Kuwahusu

Vladimir Maladyka

Alizaliwa: 1963 (Yenakievo, Ukrainia)

Maisha Yake: Kwa miaka mingi alifanya kazi akiwa fundi wa kutengeneza ndege. Alifunga ndoa na Nataliya mwaka wa 1986

Alitaka kujifunza zaidi kumhusu Mungu familia yake ilipokabili magumu. Ndugu yake mdogo alimsaidia kuwajua Mashahidi wa Yehova. Alibatizwa pamoja na Nataliya mwaka 1997

Maelezo ya Kibinafsi

Yehova amesaidiaje familia yako kupitia ndugu na dada?

Nilipokuwa mahabusu, ndugu na dada walimpa mke wangu msaada wa kimwili, kihisia, na wa kiroho. Wangempigia simu mara kwa mara, wangemtumia ujumbe mfupi na kadi ili kumjulia hali. Wengine walimtembelea nyumbani ili kumtia moyo na kumtegemeza.

Wengi kutanikoni waliona ni pendeleo kufanya chochote ambacho kingesaidia. Kutaniko letu lilishirikiana kwa ukaribu na kufanya kazi “bega kwa bega” ili kutusaidia.—Sefania 3:9.

Vladimir Sakada

Alizaliwa: 1970 (Kyiv, Ukrainia)

Maisha Yake: Alizoezwa kuendesha mashine na pia alitumika jeshini. Anafanya kazi akiwa mjenzi. Alifunga ndoa na Svetlana mwaka 2005

Alilelewa katika familia isiyoamini kwamba kuna Mungu. Alianza kupendezwa na Biblia baada ya rafiki yake kumwonyesha jina la Mungu. Alivutiwa na hekima inayopatikana katika Neno la Mungu. Alibatizwa mwaka wa 1991

Maelezo ya Kibinafsi

Wewe na mke wako mmejifunza nini kuhusu umuhimu wa kuwa na ratiba nzuri ya kiroho?

Tunashiriki utendaji mbalimbali wa kiroho katika ibada yetu na utendaji huo wote unahusiana. Utendaji huo unategemezana kama misuli inavyotegemezana. Kwa njia ya mfano, tunaimarisha misuli hiyo ya kiroho kwa kujitayarisha kwa ajili ya mikutano, kushiriki katika mikutano hiyo na huduma pia, kwa kusali na kujifunza Biblia kila siku, na kwa kushirikiana na ndugu na dada zetu . . . Licha ya kazi yetu kupigwa marufuku, tunaendelea kutafuta njia mbalimbali za kutusaidia kubaki imara kiroho.

Yevgeniy Zhukov

Alizaliwa: 1969 (Sevastopol, Crimea)

Maisha Yake: Alizaliwa katika familia kubwa. Baba yao alikufa Yevgeniy alipokuwa na miaka 14

Alipokuwa kijana alijifunza kucheza piano kwenye shule ya muziki. Alipata mazoezi ya kufunga mabomba ya viwandani, kisha akafanya kazi katika kiwanda

Alianza kutafakari kusudi la maisha baada ya kutumikia jeshini. Mama yake alimweleza kuhusu Biblia, na humo alipata majibu ya kuridhisha. Alibatizwa mwaka wa 1997

Maelezo ya Kibinafsi

Yehova alikusaidiaje ulipokuwa mahabusu?

Mwanzoni mwa mwaka 2021, ninakumbuka nilikuwa na wasiwasi kuhusu jinsi ambavyo ningeshiriki Ukumbusho. Ilikuwa mara yangu ya kwanza kufanya hivyo nikiwa peke yangu tu, bila kutaniko. Kwa hiyo nikasali, na Yehova akajibu sala yangu kwa kunipa ujasiri na hekima. Kwa msaada wa Yehova, nilitoa hotuba ya Ukumbusho katika chumba cha gereza, na wafungwa wenzangu wawili walikuwepo. Walipata ushahidi mzuri.

Tuna uhakika kwamba Yehova ataimarisha mioyo ya ndugu hawa na wengine wote wanaokabili mateso huko Crimea.—1 Wathesalonike 3:12, 13.

Huenda Ukapenda Pia

TAARIFA ZA HABARI

Wamefungwa kwa Sababu ya Imani Yao—Crimea

Mashahidi wa Yehova huko Crimea wamefungwa kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI