Katika mwaka wa utumishi wa 2020, Mashahidi wa Yehova ulimwenguni pote wamekabili changamoto nyingi sana katika utumishi wao kwa Mungu. Hata hivyo, changamoto hizo zilionyesha azimio la ndugu na dada zetu la kudumisha ushikamanifu na umoja.

Changamoto kubwa ilitokana na ugonjwa wa corona (COVID-19), uliosababisha matatizo mengi ambayo nchi nyingi hazikuwahi kukabiliana nayo.

Ugonjwa huu ulipoanza, Mashahidi wa Yehova walichukua hatua bila kukawia. Walitafuta njia mpya za kuendelea kufanya ibada yao, kutiana moyo, na kuhubiri habari njema.

Zifuatazo ni baadhi ya “habari njema” tulizopata katika mwaka huu wa aina yake.—Methali 15:30.

Katika mwaka wa utumishi uliopita, tengenezo letu lilitoa Biblia Takatifu Tafsiri ya Ulimwengu Mpya ikiwa nzima au sehemu katika lugha 36. Kwa sababu ya vikwazo vilivyowekwa baada ya ugonjwa wa corona kuanza, Biblia nyingi zilitolewa katika mfumo wa kielektroni kwenye mikutano iliyofanywa kupitia mtandao. Sasa Tafsiri ya Ulimwengu Mpya inapatikana ikiwa nzima au sehemu katika lugha 193.

Kuanzia Machi 18, 2020, washiriki wa Baraza Linaloongoza wametoa ripoti za pekee kila mwezi zinazozungumzia ugonjwa wa corona kupitia jw.org na JW Library.

Katika ripoti ya kwanza, Ndugu Stephen Lett alisema kwamba ingawa ugonjwa wa corona unaleta mkazo, huo ni ushahidi wa kutosha kwamba “tunaishi katika siku za mwisho. Kipindi cha mwisho cha siku za mwisho!”

Licha ya hali hizi ngumu, Ndugu Lett alisema: “Tukiwa watu wa Yehova, hatuhitaji kuogopa.”

Kila ripoti ya video ilitia ndani mambo yaliyoonwa kutoka nchi mbalimbali. Ripoti hizo zinaonyesha hekima ya kutii mwongozo wa Baraza Linaloongoza. Katika visa vingi, maofisa wa serikali waliwasifu ndugu zetu kwa kuchukua hatua bila kukawia na kwa kutumia hekima ili kukabiliana na ugonjwa wa corona.

Kwa miaka mingi, watu wa Yehova katika siku zetu wamekuwa wakikusanyika kwa ajili ya Mlo wa Jioni wa Bwana. Katika maeneo mengi mwaka huu, watu hawakuruhusiwa kukutana pamoja. Hivyo, mtu mmoja-mmoja au familia, walitayarisha mifano ya Ukumbusho na kutazama hotuba ya Ukumbusho kupitia video mtandaoni.

Katika maeneo fulani, haikuwezekana kutazama hotuba hiyo kupitia mtandao. Hali ilikuwa hivyo katika ofisi za tawi 11 katika bara la Afrika. Ofisi hizo zilipanga programu ya Ukumbusho ionyeshwe kupitia vituo vya televisheni na redio. Mpango huo uliwawezesha wahubiri zaidi ya 407,000 na idadi kubwa ya watu wanaopendezwa kunufaika na programu hiyo.

Baraza Linaloongoza lilitoa idhini kwa baadhi ya ofisi za tawi kuendelea kutumia mpango uliotumiwa wakati wa Ukumbusho wa kutangaza mikutano ya kutaniko. Kwa njia hiyo, wahubiri katika nchi zilizo na uwezo mdogo kifedha wameweza kusikiliza mikutano ya kutaniko kila juma kupitia redio na televisheni. Kufikia sasa, ofisi za tawi 23 katika bara la Afrika, Ulaya, Amerika ya Kaskazini, na Amerika ya Kusini, zinatumia mpango huo.

Kwa sababu ya madhara yaliyoletwa na ugonjwa wa corona, ndugu na dada zetu wanakabiliana na changamoto ya kupata mahitaji ya msingi. Ulimwenguni pote, Halmashauri za Kutoa Msaada zaidi ya 400 zimeanzishwa ili kuwasaidia wahubiri ambao mahitaji yao ya msingi hayawezi kupatikana katika maeneo yao. Katika mwaka wa utumishi wa 2020, Baraza Linaloongoza liliidhinisha dola za Marekani milioni 18 kwa ajili ya kuwasaidia wahubiri zaidi ya 330,000 wakati wa ugonjwa huu wa corona.

Kwa mara ya kwanza kabisa, kusanyiko la eneo lilifanywa kupitia mtandao. Washiriki wa Baraza Linaloongoza na wasaidizi wao walitoa hotuba zote zilizorekodiwa mapema. Video hizo za hotuba zilitafsiriwa katika lugha zaidi ya 500. Programu ya kusanyiko ilipatikana kupitia jw.org na JW Library ili wahubiri na wanaopendezwa waweze kuitazama wakiwa salama nyumbani mwao.

Mbali na kukabiliana na ugonjwa wa corona, ndugu na dada katika nchi mbalimbali wanaendelea kuteswa sana.

Mwaka uliopita, mamia ya Mashahidi wa Yehova nchini Urusi wamekamatwa na nyumba zao kuvamiwa kinyume na sheria. Kufikia sasa, ndugu na dada 42 wamefungwa nchini Urusi, na wengine 2 katika eneo la Crimea. Baada ya hukumu ya Mahakama Kuu ya Urusi mwaka wa 2017, nyumba zaidi ya 1,000 za ndugu zetu zimevamiwa.

Mashahidi 52 wamefungwa gerezani nchini Eritrea. Hiyo ni idadi kubwa zaidi ya Mashahidi waliofungwa gerezani. Kuanzia Septemba 17, 1994, Paulos Eyasu, Isaac Mogos, na Negede Teklemariam, ni miongoni mwa Mashahidi hao waliofungwa baada ya kukataa utumishi wa kijeshi kwa sababu ya dhamiri zao. Ndugu na dada 26 wamefungwa gerezani kwa zaidi ya miaka kumi.

Tunaendelea kusali kwa ajili ya ndugu na dada wote waliofungwa gerezani ili waendelee kuwa jasiri. Tunajua kwamba kwa kuendelea kuvumilia licha ya majaribu, wanathibitisha kwamba wao ni waaminifu.—Ufunuo 2:10.

Katika mwaka wa utumishi uliopita, Mashahidi duniani pote walidumisha ushikamanifu wao kwa Yehova kwa kushiriki njia mbalimbali za kutoa ushahidi, kutumia njia mpya za kutiana moyo, na kutii kabisa mwongozo kutoka kwa Baraza Linaloongoza na mamlaka za serikali.

Katika matendo yao yote ya ujitoaji-kimungu, ndugu na dada zetu wameonyesha kwamba wanampenda Muumba wao. Ushikamanifu wao utawasaidia kuvumilia majaribu makubwa zaidi yatakayotukia hivi karibuni.—Yakobo 1:2, 3.