Kwa miaka mitano iliyopita, undugu wetu wa ulimwenguni pote umekuwa ukifurahia programu ya kila mwezi ya JW Broadcasting. Tunapoendelea kutazamia programu zilizopangwa kwa ajili ya mwaka wa utumishi wa 2020 na kuendelea, fikiria baadhi ya mambo yaliyotimizwa tangu kutolewa kwa programu ya kwanza mnamo Oktoba 2014.

Imetafsiriwa katika lugha 185. Mwanzoni, programu hiyo ya kila mwezi ilionyeshwa kwa Kiingereza tu. Kisha, mnamo Mei 2015, Baraza Linaloongoza lilitoa kibali cha kutafsiri programu hiyo katika lugha zaidi ya 40. Na sasa, baada ya miaka minne tu, inatafsiriwa katika lugha 185 hivi.

Inavutia watu ulimwenguni pote. Kwa kuwa programu hizo zilikusudiwa kwa ajili ya undugu wa ulimwenguni pote, visehemu vya programu hizo vimekuwa vikiandaliwa na vikundi vya kutayarisha video ulimwenguni pote. Mara nyingi, sehemu ya mwisho ya programu hizo huonyesha video fupi ya makutaniko katika maeneo ya mbali kutia ndani Ethiopia, Iceland, Mongolia, Saipan, Tuvalu, na Uganda. Ujumbe unaopatikana kwenye JW Broadcasting umefikia nchi 230, kutia ndani Kisiwa Heard na Visiwa vya McDonald ambavyo viko karibu na Antaktiki na havina wakaaji wa kudumu. Inakadiriwa kwamba programu mpya inapotolewa, wastani wa watu milioni 8.6 hivi huitazama au kuipakua ndani ya mwezi mmoja.

Wingi wa habari na unamna-namna. Video zote zilizotengenezwa zinaweza kuonyeshwa kwa jumla ya saa 60. Habari iliyomo inatia ndani hotuba, mahojiano, masimulizi ya maisha, habari za karibuni, na drama. Tangu wimbo wa kwanza uliotungwa wenye kichwa The Best Life Ever ulipotolewa, video za muziki zimekuwa sehemu ya kawaida ya programu ya kila mwezi. Nyimbo hizo zinatafsiriwa katika lugha 368.

Wasemaji. Mwanzoni, washiriki wa Baraza Linaloongoza ndio waliokuwa wasemaji katika kila programu. Baadaye, wasaidizi wa halmashauri za Baraza Linaloongoza walishirikiana na wasemaji au walitumiwa wakiwa wasemaji wakuu katika programu. Kwa ujumla, ndugu 29 wametumika wakiwa wasemaji wakuu au wakashirikiana na msemaji mkuu katika programu hizo za kila mwezi.

Shukrani. Ndugu mmoja anayeishi Marekani aliyepatwa na kiharusi na anayeendelea kupambana na madhara yake anafurahia sana nyimbo zilizotungwa. Anasema: “Nyimbo hizo tamu zenye mawazo ya kiroho zimenifanya niwe na maoni yanayofaa kuhusu hali yangu na kukabiliana na jaribu hili jipya maishani mwangu. Nimeshangaa jinsi nyimbo hizo zimenisaidia kuboresha sifa zangu za Kikristo. Asanteni sana kwa uandalizi huo!”

Baada ya kutazama programu ya Novemba 2016, familia moja nchini Marekani iliyofiwa na mwana wao kutokana na ugonjwa wa kansa iliandika hivi: “Tulilia sana tulipotazama video ya muziki yenye kichwa Paradiso Iko Karibu Sana. Tulihisi kana kwamba sisi ndio wazazi walioonyeshwa wakiwa katika paradiso. Kila tunapohisi kwamba hatuwezi kuvumilia tena hisia hizo zenye kulemea, Yehova hutuonyesha kwamba anatuelewa na atatusaidia kuvumilia hali tunayokabili. Video hiyo ilitufanya tuhisi kwamba Yehova amejibu sala nyingi tulizokuwa tumetoa kutoka moyoni.”

Wenzi wengine kutoka Ukrainia walisema: “Kwa sababu ya JW Broadcasting, tunahisi ni kana kwamba washiriki wa Baraza Linaloongoza wamekuwa sehemu ya familia yetu!”

Tunamshukuru Yehova kwa uandalizi huo unaotolewa kwa wakati unaofaa na unaoendelea kuwaunganisha watu wake ulimwenguni pote.—1 Petro 2:17.