DESEMBA 28, 2022
HABARI ZA ULIMWENGUNI POTE
JW.ORG YATIMIZA MIAKA 10—SEHEMU YA 1
Video na Machapisho Yanayotegemea Biblia Katika Mfumo wa Kielektroni
Kama tangazo la hivi karibuni lilivyosema, kufikia mwaka wa 2022, miaka 25 imepita tangu Mashahidi wa Yehova walipoanzisha tovuti yao binafsi. Lakini ni miaka kumi tangu Agosti 27, 2012 ambapo tovuti hiyo ya jw.org ilipoboreshwa na kutolewa. Mfululizo huu wenye sehemu tatu utafafanua jinsi ambavyo mamilioni ya watu wamenufaika kutokana na tovuti ya jw.org iliyoboreshwa.
Video: DVD iliyo na masomo mawili ya kwanza ya Uwe Rafiki ya Yehova ilitolewa katika makusanyiko yaliyofanywa mwaka wa 2012. Lakini sasa DVD hazitumiwi sana kama ilivyokuwa hapo awali na pia ni gharama kubwa kuzitokeza. Tovuti yetu iliyoboreshwa ilipoanza kutumika mwezi wa Agosti 2012, ilitokeza fursa bora na rahisi zaidi ya kusambaza video. Hivyo, Januari 2013 somo lingine la Uwe Rafiki ya Yehova lenye kichwa Sali Wakati Wowote lilitolewa katika mfumo wa kielektroni kwenye jw.org. Tangu mwaka huo kufikia sasa, zaidi ya masomo 40 yametolewa katika mfumo wa kielektroni.
Video nyingine yenye kichwa Kwa Nini Ujifunze Biblia? ilitolewa pia mwaka wa 2013 katika mfumo wa kielektroni. Video hiyo ni kifaa chenye thamani kubwa katika huduma na pia ni sehemu ya Sanduku la Vifaa vya Kufundishia. Baada ya video hiyo, jw.org iliendelea kutumiwa na inasaidia sana katika kazi ya kuhubiri. Kwa mfano, katika kampeni ya Agosti 2014 ya kutoa trakti inayotangaza jw.org, video milioni 15 hivi zilipakuliwa au kutazamwa.
Ndugu mmoja aliyeshiriki katika kazi ya kutokeza jw.org alisema: “Imani yangu iliimarishwa kuona jinsi Yehova alivyokuwa akitutayarisha kwa ajili ya matukio ambayo yangetokea wakati ujao. Wakati huo hatukuwazia kwamba jitihada tulizofanya za kutokeza njia mpya ya kusambaza video zingeandaa mfumo ambao ungekuwa muhimu sana wakati ujao.” Kwa mfano, JW Broadcasting ilipoanzishwa Oktoba 2014, zaidi ya video milioni 37 zilipakuliwa katika mwezi huo. Janga la COVID-19 lilipoanza mwaka wa 2020, video nyingi hata zaidi zilipakuliwa au kutazamwa kwenye jw.org. Na katika mwaka wa 2022 pekee, wastani wa video zaidi ya milioni 260 zilipakuliwa kila mwezi kutoka kwenye jw.org.
Machapisho ya Kielektroni: Katika miaka ya karibuni, wasomaji wengi wameanza kupendelea machapisho ya kielektroni yanayopatikana mtandaoni au katika programu ya simu ya mkononi kuliko yale yaliyochapishwa. Tovuti ilipoboreshwa mwaka wa 2012, watumiaji wangeweza kusoma magazeti yetu mtandaoni hata kabla ya yale yaliyochapishwa kufika. Kazi ya kutokeza machapisho kwenye tovuti hiyo ilisaidia katika kutokezwa kwa programu ya JW Library katika mwaka wa 2013. Programu hiyo pamoja na tovuti yetu ni vifaa vizuri vinavyoweza kumsaidia sana mtu kusoma na kujifunza machapisho ya kielektroni.
Mwanzoni, watu walisubiri machapisho yaliyotolewa katika makusanyiko ya eneo hadi Januari mwaka uliofuata ili kuyapata kwenye jw.org au kwenye JW Library. Lakini katika makusanyiko ya eneo ya mwaka wa 2015, wahudhuriaji walifurahi sana kujua kwamba wangeweza kupakua papo hapo nakala za kielektroni ya machapisho yaliyotolewa katika mwaka huo, yaani, Yesu—Njia, Kweli, na Uzima na Mrudie Yehova, na pia video Upendo wa Kweli Ni Nini? Mwaka uliofuata, katika programu ya JW Broadcasting ya Mei 2016, Ndugu Anthony Morris, mshiriki wa Baraza Linaloongoza, alitoa broshua Majibu ya Maswali 10 Ambayo Vijana Huuliza na kutangaza kwamba mtu angeweza kupakua broshua hiyo wakati huohuo. Hiyo ndiyo mara ya kwanza kwa chapisho kutolewa kwa undugu wa ulimwenguni pote wakati uleule.
Tengenezo la Yehova lina historia ya kutumia teknolojia kuendeleza kazi ya Ufalme. Tunafurahi sana kuona jinsi tovuti ya jw.org inavyotumiwa kusambaza “chakula . . . kwa wakati unaofaa.”—Mathayo 24:45.
Idadi ya video zinazopakuliwa kila mwezi
Idadi ya watu wanaoitembelea kila mwezi
Kutolewa kwa Sali Wakati Wowote, Januari 2013
Kutolewa kwa JW Library, Oktoba 2013
Kampeni iliyofanywa ulimwenguni pote kutangaza jw.org, Agosti 2014
Kutolewa kwa JW Broadcasting, Oktoba 2014
Video na machapisho yatolewa kwenye kusanyiko katika mfumo wa kielektroni, Mei 2015
Majibu ya Maswali 10 Ambayo Vijana Huuliza yatolewa ulimwenguni pote wakati uleule, Mei 2016