Kuanzia Novemba 1, 2023, hadi Januari 31, 2024, zaidi ya Mashahidi 19,000 wa Yehova walishiriki katika kampeni ya pekee ya kuhubiri nchini Bolivia na Kolombia. Wakati wa kampeni hiyo, ujumbe wa tumaini katika Biblia ulitangazwa katika Kihispania na lugha nyingine 18, kutia ndani Lugha ya Ishara ya Bolivia na Lugha ya Ishara ya Kolombia.

Ndugu anayezungumza Kihispania katika eneo la Guadalupe, nchini Kolombia, alishangaa sana mwanamke mmoja alipofungua mlango wa nyumba yake na kumsalimu akisema: “Tumekuwa tukiwasubiri!” Mwanamke huyo alieleza kwamba siku chache mapema, yeye na mume wake walikuwa wakijadiliana ikiwa watasherehekea sikukuu fulani za kidini. Mume wa mwanamke huyo alisema kwamba aliwaona ndugu zetu wakihubiri karibu na eneo hilo. Alikuwa na uhakika kwamba baada ya muda mfupi wangefika nyumbani kwao na kuwajibu maswali yao. Ndugu zetu walifurahi sana kuisaidia familia hiyo kujifunza kuhusu kile ambacho Biblia inafundisha, na wakafanya mipango ili mtu fulani aendelee kuwatembelea.

Walipokuwa wakihubiri katika mji wa Cuatro Cañadas, nchini Bolivia, dada wawili walimkaribia mwanamke anayeitwa Miguelina nje ya duka. Baada ya kuzungumza naye walitambua kwamba alikuwa amempoteza mpendwa wake katika kifo, dada zetu walisoma pamoja naye andiko la Ufunuo 21:3, 4. Miguelina akasema kwamba anatamani kujifunza mengi zaidi kuhusu Biblia. Inasikitisha kwamba anaishi katika eneo lililojitenga na hana simu. Siku kadhaa baadaye, dada wawili walikuwa wakimhubiria mwanamke kijana aliyekuwa akiishi katika mji huohuo ambao Miguelina anaishi. Bila hata kutarajia, Miguelina alitoka nje ya nyumba hiyo. Akina dada hao walishangaa sana kujua kwamba mwanamke huyo kijana waliyekuwa wakizungumza naye ni binti ya Miguelina. Walifurahi sana kukutana tena. Mipango ilifanywa ili familia yote ianze kujifunza Biblia.

Tuna uhakika kwamba Yehova anathamini sana jitihada za ndugu na dada zetu ambao wameshiriki katika kampeni hii na ataendelea kutubariki tunapoendelea kuhubiri habari njema “katika uumbaji wote chini ya mbingu.”​—Wakolosai 1:23.