SEPTEMBA 4, 2023
HABARI ZA ULIMWENGUNI POTE

Kuimarisha Imani Ili Kushinda Woga

CHEZA

Mahakama ya Wilaya ya Gagarinskiy iliyo Sevastopol, Crimea, itatangaza hivi karibuni uamuzi wake katika kesi inayowahusu Ndugu Viktor Kudinov na Ndugu Sergey Zhigalov. Mwendesha-mashtaka bado hajatoa ombi la hukumu anayopendekeza.

Maelezo Mafupi Kuwahusu

Viktor Kudinov

Alizaliwa: 1969 (Budapest, Hungaria)

Maisha Yake: Alikuwa dereva wa mabasi

Alifunga ndoa na Svetlana mwaka wa 1991. Wana mtoto mmoja wa kike na mmoja wa kiume

Svetlana alikuwa akijifunza Biblia pamoja na Mashahidi wa Yehova. Viktor alipoona jinsi mafundisho ya Biblia yalivyokuwa yakiisaidia familia yao, naye pia alianza kujifunza. Svetlana alibatizwa mwaka wa 2005 na Viktor mwaka wa 2010

Maelezo ya Kibinafsi

Mifano mizuri iliyowekwa na ndugu na dada imekutiaje moyo?

Nimewafikiria sana ndugu zangu hasa Viktor Stashevskiy. Amefungwa gerezani na maisha si rahisi kwake. Amenitumia barua kadhaa na ni rahisi kutambua kwamba hajifikirii kupita kiasi. Maneno yake yanaonyesha kwamba anawajali wengine na ana shangwe. Viktor pamoja na ndugu na dada wengine wengi wameniwekea mfano mzuri sana. Wanateswa na zaidi ya hilo bado wanapambana na mahangaiko mengine ya maisha kama vile magonjwa, kutafuta riziki, na kuzitunza familia zao. Iwapo wangeamua kuacha kumtumikia Yehova wasingeteswa lakini wameamua kubaki washikamanifu kwa Yehova na kwa ndugu zao. Ninapoona mambo yote ambayo wanavumilia, ninajua kwamba mimi pia ninaweza kuvumilia.

Sergey Zhigalov

Alizaliwa: 1971 (Snezhnoye, Ukrainia)

Maisha Yake: Alikuwa fundi bomba

Alianza kujifunza Biblia na Mashahidi wa Yehova mwaka wa 1994. Alivutiwa sana na hekima ya Biblia na usahihi wa unabii wa Biblia. Alibatizwa mwaka wa 1996

Alifunga ndoa na Olga mwaka wa 2007

Maelezo ya Kibinafsi

Hali hii imekufundisha nini kumhusu Yehova?

Yehova anaruhusu mateso yatupate. Hata hivyo, ninajua kwamba anakuwa chochote anachohitaji kuwa ili kunilinda na kunifariji katika njia ya pekee. Sasa ninayaelewa vizuri maneno yaliyo kwenye Isaya 30:15 yanayosema: “Mtakuwa na nguvu mkiendelea kuwa watulivu na kuwa na tumaini.” Kukumbuka maneno hayo kunanisaidia kuepuka kuwazia mambo mabaya ambayo huenda yakanipata. Ninajua kwamba nikishikwa na woga sitaweza kumtumikia Yehova kwa bidii na hivyo, ni kana kwamba mimi mwenyewe nitakuwa nimejipiga marufuku kumwabudu Yehova. Shetani angependa nifanye hivyo. Tofauti na hilo, ninapoendelea kumtegemea Yehova kikamili, ninapata amani ya moyoni inayotoka kwa Mungu.

Yehova ni Mungu “anayefurahia amani ya [watumishi] wake.” Kwa hiyo, tuna uhakika kwamba ataendelea kuwabariki Viktor na Sergey kwa sababu wanaonyesha subira na uvumilivu.—Zaburi 35:27.

Mfuatano wa Matukio

Agosti 24, 2022

Kesi ya uhalifu yafunguliwa. Nyumba zao zafanyiwa msako. Wanakamatwa na kuwekwa kizuizini
Agosti 26, 2022

Wanaachiliwa kutoka kizuizini na kuwekwa katika kifungo cha nyumbani
Oktoba 17, 2022

Wanaachiliwa kutoka kwenye kifungo cha nyumbani na kuwekewa vizuizi vingine
Aprili 13, 2023

Kesi ya uhalifu yaanza

Huenda Ukapenda Pia

TAARIFA ZA HABARI

Wamefungwa kwa Sababu ya Imani Yao—Crimea

Mashahidi wa Yehova huko Crimea wamefungwa kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI