Kuanzia Julai 20 hadi Agosti 20, 2023, zaidi ya watu milioni mbili walihudhuria michuano ya Kombe la Dunia la Wanawake la FIFA ili kupata timu bora zaidi ya mpira. Ilifanywa katika majiji mbalimbali nchini Australia na nchini New Zealand. Katika kipindi hicho, ndugu na dada 1,200 hivi walishiriki katika kampeni ya pekee iliyofanywa ya kuhubiri kwenye miji tisa katika nchi zote mbili. Angalau watu 18 waliomba funzo la Biblia.

Wanawake wawili ambao ni vijana waliotoka India walitembelea kigari kimoja katika jiji la Sydney, nchini Australia na kuona kwenye bango kwamba wanaweza kupata masomo ya Biblia bure. Waliwauliza dada waliokuwa kwenye kigari ikiwa wanaweza kuhudhuria masomo hayo. Dada hao waliwaeleza kwamba kwa kawaida kila mtu anayependa kupata masomo hayo anapata mwalimu wake mwenyewe wa Biblia na hata wangeweza kuomba kutembelewa na mwalimu kwa kutumia alama ya QR iliyo kwenye ukurasa wa nyuma wa broshua Furahia Maisha Milele! kisha wote wawili walijaza fomu hiyo ya mtandaoni papo hapo, na sasa kila mmoja wao anapata masomo hayo ya Biblia.

Wenzi fulani wa ndoa wanaoishi Brisbane, nchini Australia, walijitolea kumsaidia mwanamke ambaye ni kijana ambaye alionekana kama amepotea. Mwanamke huyo alisema kwamba alikuwa akitafuta hoteli aliyofikia. Wenzi hao waliamua kwa fadhili kumpeleka hadi kwenye hoteli hiyo. Walipokuwa njiani aliwaeleza kwamba anaishi Papua New Guinea naye alifurahi kujua kwamba wenzi hao wamewahi kuishi Papua New Guinea pia. Hivyo, walikuwa na mazungumzo mazuri na mwishowe walibadilishana habari za mawasiliano. Baadaye, wenzi hao walipanga kumtembeza mwanamke huyo jijini humo na hivyo walitumia fursa hiyo kumweleza kweli za Biblia. Baadaye, aliporudi Papua New Guinea, alikubali funzo la Biblia.

Jijini Auckland, nchini New Zealand, dada mmoja anayeitwa Terina alianzisha mazungumzo na walinzi wawili kwenye maegesho ya magari wanaozungumza Kipunjabi kisha mlinzi mwingine akakatisha mazungumzo hayo na kuzungumza na wale wanaume katika Kipunjabi. Dada yetu alijiuliza, je, anawakaripia kwa sababu nimezungumza nao wakati wa muda wa kazi? Terina alishangaa yule mwanamume alipomwambia kwamba alikuwa akiwaeleza katika lugha yao mambo ambayo yeye aliwaambia. Mwanamume huyo alisema: “Wameniuliza Biblia ni nini, nami nikawaambia ni kitabu kinachotoka kwa Mungu. Je, hilo ni sahihi?” Terina aliwahakikishia kwamba ni sahihi kisha akawaelekeza jinsi ya kuomba funzo la Biblia katika lugha yao kwa kutumia jw.org.

Nicholas ambaye anatoka Kolombia aliwauliza ndugu waliokuwa kwenye kigari jijini Brisbane, nchini Australia, kuhusu mikutano yetu. Aliwaeleza kwamba mama yake, nyanya yake, na pia babu yake ni Mashahidi wa Yehova, nao wamekuwa wakimtia moyo ahudhurie mikutano. Ndugu hao walifanya mpango ili Shahidi aliye katika kutaniko la Kihispania awasiliane naye. Baada ya lisaa limoja, ndugu fulani anayezungumza Kihispania aliwasiliana na Nicholas na kupanga jinsi atakavyohudhuria Kusanyiko la Eneo la “Iweni na Subira”! ambalo lingefanyika mwisho-juma huo.

Tunafurahi kwamba ndugu na dada zetu walio Australia na New Zealand walikuwa na fursa ya ‘kuangaza kama mianga’ kwa kushiriki habari njema za Ufalme na wengine katika tukio hilo.​—Wafilipi 2:15.