Aprili 25, 2020, Ndugu Mark Sanderson, mshiriki wa Baraza Linaloongoza, alitangaza kutolewa kwa Biblia Takatifu—Tafsiri ya Ulimwengu Mpya iliyorekebishwa katika Kikroatia na Kiserbia kupitia video iliyorekodiwa. Tafsiri ya Kiserbia ilitolewa katika maandishi ya Kiroma na ya Kisirili.

Kwa sababu ya kutii vizuizi vilivyowekwa na serikali kuhusiana na ugonjwa wa virusi vya corona, makutaniko nchini Bosnia na Herzegovina, Kroatia, Montenegro, na Serbia hayakukutana sehemu moja kwa ajili ya kutolewa kwa Biblia hiyo. Badala yake, mkutano wa pekee ulifanywa kupitia video iliyounganishwa kwenye mtandao. Jumla ya watu 12,705 walitazama programu hiyo.

Ndugu mmoja ambaye aliunganishwa kwa ajili ya programu hiyo aliifafanua Biblia hiyo kuwa “kito halisi,” na akasema kwamba anahisi “ni kana kwamba Yehova anazungumza [naye] moja kwa moja.” Ndugu mwingine anayetumikia akiwa mzee wa kutaniko alieleza hivi: “Niliposoma tafsiri hiyo mpya ya Biblia iliyorekebishwa katika lugha yangu ya mama, nilihisi upendo wa Yehova kwa njia kubwa zaidi—ninahisi kwamba ananijali na kunitunza. Na nikiwa mchungaji kutanikoni, sasa nitaweza kuwaeleza vizuri zaidi ndugu na dada jinsi Yehova anavyowapenda na kuwathamini.”

Kazi ya kutafsiri Biblia hiyo ilianza mwishoni mwa mwaka 1996. Baada ya muda usiozidi miaka mitatu, mnamo Julai 1999, Tafsiri ya Ulimwengu Mpya ya Maandiko ya Kigiriki ya Kikristo ilitolewa katika Kikroatia na Kiserbia. Miaka saba baadaye, mnamo 2006, Biblia Takatifu—Tafsiri ya Ulimwengu Mpya ilitolewa ikiwa nzima katika lugha hizo mbili.

Tuna uhakika kwamba matoleo hayo sahihi na rahisi kueleweka ya Tafsiri ya Ulimwengu Mpya iliyorekebishwa katika Kikroatia na Kiserbia yataendelea kuwasaidia wasomaji kuona kwamba “neno la Mungu liko hai.”—Waebrania 4:12.