Kwa sababu ugonjwa wa virusi vya corona unatokeza hatari kubwa kwa watu wenye umri mkubwa, kwa hekima ndugu na dada wenye umri mkubwa wametii maagizo ya maofisa wa afya kwamba wakae nyumbani. Hata hivyo, hawajatengwa wala hawaketi tu. Wanatumia mbinu mbalimbali za kiteknolojia ili kushiriki katika mikutano na huduma.

Jijini Rome, Italia, dada mmoja mgonjwa mwenye umri wa miaka 94, aliyebatizwa mwaka wa 1952, hajaweza kutoka nyumbani kwa muda mrefu hata kabla ya ugonjwa wa corona. Ingawa alikuwa akitazama mikutano kupitia JW Stream, kwa muda fulani hajafaulu kuona mikutano ya kutaniko lake. Hata hivyo, saa kwa kuwa wazee wa kutaniko lake wanafanya mikutano kupitia programu fulani inayowaunganisha kupitia Intaneti, ameweza kuwaona ndugu na dada wa kutaniko lake na kusikiliza mikutano ya kutaniko lake.

Dada Stephanie Aitken, ambaye ni kiziwi anayeishi katika makao ya kuwatunzia wazee yaliyoko Spanish Fork, Utah, Marekani, hawezi kutembelewa na watu kutoka nje. Kwa sababu makao hayo hayawaruhusu watu kuwatembelea kwa sasa, mzee mmoja na mke wake walimsaidia dada huyo kupakua programu ya kuunganisha mikutano kupitia Intaneti na kumwelezea maagizo hayo kupitia lugha ya ishara wakiwa nje ya mlango wa kioo wa makao hayo. Mara tu Dada Aiitken alipofaulu kupakua programu hiyo, aliikumbatia tablet yake. Anashukuru sana kwamba anaweza kuendelea kuwasiliana na kutaniko lake.

Kadiri ndugu na dada, kutia ndani wenye umri mkubwa ulimwenguni pote wanapotumia teknolojia kukabiliana na hali ngumu zinazotokezwa na ugonjwa huu, tunakumbuka ahadi ya Yehova kwamba watu wake wangetumia kwa hekima “maziwa ya mataifa.” (Isaya 60:16) Tunajua kwamba sikuzote atakuwa kile ambacho watumishi wake duniani wanahitaji awe katika nyakati za taabu.