Mfululizo wa makongamano ya wasomi na waandishi wa habari nchini Moldova, Urusi, na Ukrainia imefanywa kupitia mtandao ili kuadhimisha miaka 70 ya Oparesheni Kaskazini, yaani, tukio la mwaka 1951 la Muungano wa Sovieti kuwahamisha Mashahidi 9,793 wa Yehova na kuwapeleka Siberia.

Katika makongamano fulani, waliohudhuria walielekezwa kwenye tovuti iliyoitwa 1951deport.org, tovuti iliyozungumzia hasa Oparesheni Kaskazini. Tovuti hiyo, iliyoanzishwa na Mashahidi wa Yehova, inapatikana katika Kiingereza, Kirusi, na Kiukrainia. Ina habari nyingi sana ya kihistoria na uchanganuzi kuhusu uhamisho huo.

Dakt. Lidia Padureac wa Chuo Kikuu cha Taifa cha Alecu Russo huko Balti alisema hivi: “Ule Muungano wa Jamhuri za Kisoshalisti za Sovieti ulitelekeza uhamisho huo wa mwaka wa 1951 kama adhabu ya umma ili kuwazuia watu wasieneze maoni mengine isipokuwa Ukomunisti.”

Hata hivyo, Dakt. Nicolae Fustei, mtafiti wa kisayansi katika Taasisi ya Historia anasema hivi: “Oparesheni Kaskazini haikutimiza lengo lake. . . . Shirika la Mashahidi wa Yehova halikuharibiwa, na washiriki wake hawakuacha kutangaza imani yao badala yake walianza kufanya hivyo kwa ujasiri hata zaidi.”

Dakt. Virgiliu Birladeanu, mtafiti wa kisayansi katika Taasisi ya Historia na mwenyekiti wa kongamano hilo, alizungumza kuhusu mtazamo wenye kustaajabisha wa Mashahidi waliohamishwa ambao aliwahoji kama sehemu ya utafiti wake. Alisema hivi: “Nilistaajabishwa na jinsi walivyokuwa na amani na tumaini; hawakuwa na chuki kwa sababu ya mateso waliyokabili chini ya Serikali ya Sovieti.”

Ndugu Victor Dornicenco, anayetumikia kwenye ofisi ya tawi ya Moldova, alizungumzia jinsi historia ya ukandamizaji wa Serikali ya Sovieti inavyojirudia tena sasa nchini Urusi. Alisema hivi: “Inasikitisha kwamba hatujajifunza kutokana na historia. Katika mwaka wa 2017, bila misingi yoyote ya kisheria, Shirika la Kidini la Mashahidi wa Yehova nchini Urusi, yaani, watu 175,000, walipigwa marufuku. Ubaguzi na habari za uwongo kuhusu mazoea ya Mashahidi wa Yehova zimeongoza kwenye kuwanyima haki za msingi, kama vile haki ya kufikiri, dhamiri, na uhuru wa kidini.”

Kama ilivyoripotiwa awali, wasomi watano na wataalamu wa haki za kibinadamu, wakiwa na Ndugu Yaroslav Sivulskiy, mwakilishi wa European Association of Jehovah’s Witnesses, walizungumza na waandishi wa habari kuhusu Oparesheni Kaskazini na mateso ya sasa nchini Urusi. Kongamano lote lilipeperushwa moja kwa moja kwenye mtandao katika Kiingereza na Kirusi.

Kama ilivyoripotiwa awali, tukio hilo lilipeperushwa moja kwa moja kwenye mtandao katika Kirusi peke yake.

Wasomi 14 kutoka nchi sita, pamoja na Ndugu Ivan Riher wa ofisi ya tawi ya Ukrainia walitoa hotuba fupi. Kama sehemu ya utafiti wao, baadhi ya wasomi waliwahoji kirefu baadhi ya watu waliookoka uhamisho huo. Wahudhuriaji walionyeshwa video ya visehemu vya mahojiano hayo.

Dakt. Tomasz Bugaj, mwanahistoria na mtafiti katika Taasisi ya Sayansi ya Utamaduni Katika Chuo Kikuu cha Silesia nchini Poland, alisema hivi: “Licha ya hali mbaya za kuishi na kufanya kazi zilizokuwepo, viwango vya kiadili na kijamii vya Mashahidi wa Yehova na pia imani yao haikubadilika. Hawakufikiria hata kidogo kuvunja msimamo wao ili wapate hali nzuri za kazi na za maisha au hata ili kupata chakula.” Dakt. Bugaj alisema kwamba Mashahidi ni watu wa pekee kwa sababu walifaulu kuhifadhi na kusitawisha dini yao chini ya serikali ya Ukomunisti.

Profesa Liudmyla Fylypovych, naibu msimamizi wa Shirika la Mafunzo ya Kidini ya Ukrainia alisema kwamba kwa sasa Mashahidi wa Yehova nchini Ukrainia wanagawa machapisho yanayotegemea Biblia katika lugha 36. Pia alikazia jinsi huduma yao sasa inavyowanufaisha watu wengi zaidi ya Mashahidi. Anasema hivi: “Mashahidi wanatatua matatizo mengi sana ya kijamii ambayo raia wa Ukrainia wanakabili.” Kwa mfano, alisema kwamba Mashahidi huwatembelea wale walio na matatizo ya kusikia na kuona ili kuwafundisha Biblia na kuwafanya wajihisi wao ni sehemu muhimu katika jamii.

Tukio hilo lilipeperushwa moja kwa moja kwenye mtandao katika Kiingereza, Kirusi, na Kiukrainia.

Profesa Fylypovych aliwaambia waandishi wa habari hivi: “Mashahidi wa Yehova wameonyesha jinsi wanavyobadilika kwa njia inayofaa kulingana na hali tofauti-tofauti. Isitoshe, ingawa walikabili hali ngumu sana walihubiri kuhusu imani zao. Na kwa sababu walipelekwa uhamishoni walifaulu kuhubiri katika maeneo ambayo hayajawahi kuhubiriwa tena. . . . Chini ya Muungano wa Sovieti, Mashahidi wa Yehova waliheshimiwa na majirani wao kwa sababu ya kushikamana na kanuni zao.”

Profesa Igor Kozlovskyy, msimamizi wa Kituo cha Utafiti wa Sayansi ya Kidini na Mahusiano ya Kiroho ya Kimataifa nchini Ukrainia, alisema hivi: “Ili kuelewa sisi ni nani, tunahitaji kukumbuka historia yetu. . . . Tunapaswa kuzungumzia uhamisho wa Mashahidi wa Yehova mara nyingi zaidi. Inapaswa kutiwa ndani ya historia ya kawaida ya Ukrainia.” Aliongezea hivi: “Ni jukumu la wataalamu wa kidini kujaribu kukomesha maneno yenye chuki na uwongo kuwahusu Mashahidi wa Yehova na vikundi vingine vya kidini.”

Tukio hilo lilipeperushwa moja kwa moja kwenye mtandao katika Kiingereza na Kiukrainia.