Ijumaa, Agosti 18, 2023, Ndugu José Luis Peña, mshiriki wa Halmashauri ya Tawi ya Amerika ya Kati alitangaza kutolewa kwa Tafsiri ya Ulimwengu Mpya ya Maandiko ya Kigiriki ya Kikristo katika lugha ya Kekchi. Biblia hiyo ilitolewa katika siku ya kwanza ya Kusanyiko la 2023 la “Iweni na Subira”! lililofanywa San Juan Chamelco, Alta Verapaz, Guatemala. Watu 590 waliohudhuria walipata nakala zilizochapishwa za Biblia hiyo. Isitoshe, nakala za kielektroni na rekodi za kusikiliza zilikuwa tayari pia kwa ajili ya kupakuliwa. Kuna zaidi ya watu 1,300,000 wanaozungumza lugha ya Kekchi nchini Belize na nchini Guatemala. Kwa sasa, kuna wahubiri 520 wanaozungumza lugha ya Kekchi nao wanatumikia katika makutaniko 17 na vikundi 4.

Ndugu na dada mbalimbali walisema kwamba tafsiri hii mpya itawasaidia watu wanaozungumza lugha ya Kekchi waelewe Neno la Yehova vizuri zaidi. Kwa mfano, dada mmoja alisema: “Kwenye 1 Timotheo 1:11, Tafsiri ya Ulimwengu Mpya inasema kwamba Yehova ni “Mungu mwenye furaha.” Hata hivyo, baadhi ya tafsiri za Biblia za lugha ya Kekchi hazifafanui utu wa Yehova kwa njia hiyo. Ninapenda kutumia andiko hili kuwakumbusha watu kwamba kumjua Yehova kunatusaidia kuwa na shangwe hata tunapopitia nyakati ngumu.”

Tuna uhakika kwamba tafsiri hii mpya itawasaidia watu wengi zaidi wanaozungumza lugha ya Kekchi kumjua na kumpenda Yehova na kuthamini Neno lake.​—Methali 7:1, 2.