Huu utakuwa mwaka wa tatu kwa makusanyiko yetu ya kila mwaka kutumia maelezo ya video. Video zinazokuwa na maelezo zinatia ndani maelezo ya picha na kinachoendelea kwenye video. Maelezo hayo yanatumiwa hasa na vipofu na walio na matatizo ya kuona. Mashahidi wa Yehova wanaendelea kuandaa maelezo ya video ili kuhakikisha kwamba habari zinazotegemea Biblia zinapatikana kwa zaidi ya watu milioni 43 ambao ni vipofu na milioni 295 ambao wana matatizo ya kuona, ulimwenguni pote.

Dakt. Joel Snyder, raisi wa Audio Description Associates, LLC ambaye pia ni mtaalamu anayejulikana wa maelezo ya video, alisema hivi kuhusu jitihada hizo: “Nimevutiwa sana na jinsi ambavyo Mashahidi wa Yehova wamefanya habari ipatikane kwa ajili ya vipofu na walio na matatizo ya kuona. a Watu wengi hawaoni umuhimu wa kuweka maelezo kwenye video zao kwa ajili ya vipofu. Ningependa kuwashukuru sana Mashahidi wa Yehova kwa kufanya hivyo.”

Baraza Linaloongoza lilipoamua kwamba kusanyiko la kila mwaka la 2020 lingefanyiwa kwenye mtandao, iliamuliwa pia kwamba, maelezo ya video yangetiwa kwenye video. Mwaka wa 2020, idara ya Huduma za Tafsiri kwenye Makao Makuu ya Mashahidi wa Yehova yaliyo Warwick, New York, Marekani, iliandaa maelezo ya video za kusanyiko. Mwaka wa 2021, kazi hiyo ilihamishiwa kwenye idara ya Huduma za Kutokeza Maandishi kwenye Watchtower Educational Center ya Mashahidi wa Yehova iliyo Patterson, New York. Kikundi kinachotengeneza maelezo ya video, kilipata mazoezi ya jinsi ya kutengeneza maelezo mazuri kupitia darasa lililofanyiwa mtandaoni.

Dakt. Snyder anaeleza kwamba “unaweza kuwazoeza watu kufafanua mambo katika njia nzuri.” Anasema kufanya hivyo kunahusisha “kutumia maneno mafupi, yaliyo wazi, na yenye ubunifu.”

Kwanza, kikundi hicho cha Mashahidi husikiliza rekodi ya sauti ya sehemu ya kusanyiko ambayo wanataka kuweka maelezo. Hawatazami video ili waelewe jinsi ambavyo vipofu au walio na matatizo ya kuona, watakavyoelewa sehemu hiyo. Kisha kila mshiriki kwenye kikundi hicho anaandika jinsi anavyohisi kuhusu sehemu hiyo. Sasa wanacheza video, na kukazia sehemu ambazo hakuna maongezi, kwa maana hapo ndipo maelezo ya video yatakapowekwa.

Kuweka maelezo ya video kati ya maongezi kwenye video si rahisi. Michael Millen, mshiriki wa kikundi cha kuweka maelezo ya video anasema: “Kwa sababu nafasi ni ndogo, tunahitaji kuamua jambo muhimu zaidi, litakalomsaidia msikilizaji kuelewa video. Tunajitahidi kueleza wakati, mahali, wahusika, na jambo linalotendeka.”

Kikundi kinachoweka maelezo ya video kinaepuka kutoa maoni yao binafsi kuhusu yanayotendeka kwenye video. Katika kitabu chake The Visual Made Verbal, Dakt. Snyder anawapa ushauri huu wale wanaofanya kazi hiyo ya kuweka maelezo kwenye video: “Acheni wasikilizaji wawazie mambo yanayotendeka kwa kutegemea maelezo yaliyowekwa bila upendeleo. Maana yake ni kwamba, usiseme: “Ana ghadhabu” au “Amekasirika.” Unaweza kusema: ‘Amekunja ngumi,’ au ‘Analia.’”

Kikundi cha kuweka maelezo kwenye video kinapomaliza kuandika maelezo yao, mtu fulani aliyechaguliwa, anayasoma maelezo hayo kwa sauti, huku yakirekodiwa. Lazima mtu huyo asome kwa utaratibu na kwa utulivu. Michael Millen anaeleza hivi: “Mtu anayesoma maelezo hapaswi kushindana na wahusika walio katika video. Ikiwa ni mchangamfu au mwenye hisia kupita kiasi, huenda wasikilizaji wakafikiri kwamba yeye ni mhusika mwingine kwenye video.”

Baada ya hapo, kikundi kinachoshughulikia mambo ya kiufundi huhariri maelezo hayo na kuyatuma kwenye ofisi zote za tawi ili yatafsiriwe na kurekodiwa katika lugha za maeneo hayo. Michael anasema kwamba katika makusanyiko mawili yaliyopita, kutengeneza maelezo ya video kwa ajili ya dakika moja katika video kulichukua muda wa saa tatu.

Kufikia sasa, Mashahidi wa Yehova hutafsiri machapisho yanayotegemea Biblia kwa zaidi ya lugha 1,000. Ingawa maelezo ya video hayajatiwa ndani kwenye idadi hiyo, baadhi ya watu wanayaona maelezo hayo kuwa lugha hususa. Michael anasema hivi: “Kwa kweli maelezo ya video ni tafsiri kwa ajili ya walio vipofu. Picha kwenye video zinatafsiriwa kwa sauti.”

Tunashukuru kwa kuwa Yehova anahakikisha kwamba watu wa hali zote wananufaika kutokana na chakula kingi cha kiroho anachotupatia!—Isaya 65:13.