Makala za JW zinazozungumzia jinsi ndugu na dada zetu wanavyokabili mateso zinatutia moyo kuvumilia. Maelezo mafupi kuwahusu yanatusaidia kuwafahamu. Kujua hali wanazopitia na mambo wanayosimulia hutuimarisha, kutuunganisha, na kutuhakikishia kwamba wana shangwe licha ya hali zao. Masimulizi yafuatayo yanaonyesha jinsi ambavyo ndugu na dada ulimwenguni wanavyonufaika na makala hizo.

Kama ilivyo kwa wengi wetu, ratiba ya kila siku ya Ndugu Miguel Silva na mke wake, Mónica, (picha iliyo juu) ambao mapainia wa pekee nchini Ureno, ilivurugwa na janga la ugonjwa wa corona. Hali hiyo inaweza kutokeza mahangaiko mengi sana. Hata hivyo, walitiwa moyo na ripoti ya Habari za JW kuhusu Ndugu Konstantin Bazhenov. Konstantin alitaka kusoma Biblia lakini hakuweza kupata nakala akiwa gerezani. Badala ya kuvunjika moyo, alitengeneza “Biblia” yake mwenyewe kwa kutumia maandiko aliyokuwa amekariri. Jambo hilo lilimfundisha Miguel na Mónica jambo muhimu sana. Miguel anasema hivi: “Badala ya kukazia fikira mambo ambayo hatuwezi kufanya wakati huu wa janga, tunakazia fikira na kuthamini mambo tunayoweza kufanya tunapokuwa nyumbani.”

Kwa kuongezea, Miguel na Mónica waliamua kutumia wakati mwingi zaidi kusoma na kutafakari Biblia kila siku. Mónica anasema hivi: “Baada ya muda, tuna uhakika kwamba Yehova atatusaidia kukumbuka mambo yote tunayohifadhi katika mioyo yetu.” Miguel anaongezea hivi: “Simulizi la Ndugu Bazhenov limetuchochea pia kuona ‘kifungo chetu cha nyumbani’ wakati huu wa janga kuwa fursa ya kuwatia moyo wengine, kumwimbia Yehova kwa shangwe, na kuboresha sala zetu.”

Dada Christine Mouhima Etonde, painia wa kawaida nchini Kamerun, anakiri kwamba kwa miaka mingi masimulizi kuhusu mateso yalimtia hofu. Hata hivyo, alitaja jinsi maoni yake yalivyorekebishwa: “Kusoma makala za Habari za JW kuhusu jinsi ndugu na dada zetu wanavyokabiliana na mateso, kumenisaidia kubadili kabisa mtazamo wangu. Ninaposoma kuhusu mtazamo wa ndugu zangu na sala zao hususa, tabasamu lao na jinsi walivyojitayarisha mapema kabla ya kuteswa—licha ya umri wao—ninachochewa kumjua Yehova zaidi. Upendo wangu kwake umekua hatua kwa hatua hivi kwamba sasa ninaweza kujiwazia nikiteswa bila hofu yoyote. Ninajiona nikiwa na shangwe, nikisali, na kutafakari kumhusu Yehova.”

Ndugu Iulian Nistor na mke wake, Oana, kutoka Rumania, waliguswa moyo na jinsi Ndugu Anatoliy Tokarev alivyotetea imani yake mahakamani. Alikuwa mtulivu, mwenye heshima, na aliazimia kwa uthabiti kudumisha uaminifu wake. Mfano wake ulimchochea Iulian na Oana kutafakari jinsi wanavyoweza kutetea imani yao mahakamani. Oana alisema hivi: “Wakati wa ibada ya familia, tulijiwazia tukiwa mahakamani tukitetea imani yetu. Haikuwa rahisi kutetea mambo tunayoamini kwa busara na heshima kama ndugu yetu alivyofanya. Tulipomaliza funzo letu la familia, tulihisi tukiwa karibu zaidi na ndugu na dada zetu. Tuliona pia umuhimu wa kujitayarisha ili kutetea imani yetu na kukumbuka sababu zinazotufanya tujivunie kuwa Mashahidi wa Yehova.”

Dada Anna Ravoajarison kutoka Madagaska alichochewa kuchunguza ubora wa sala zake. Baada ya kusoma simulizi la Ndugu Jovidon Bobojonov, Anna anasema hivi: “Pindi nyingine ninapokuwa na shughuli nyingi za kila siku, ninahisi kwamba ninasali ili kutimiza wajibu tu. Nisipotumia dakika chache kutafakari mambo ninayotaka kumwambia Yehova, mimi hujipata nikisema mambo yaleyale.” Baada ya kutafakari zaidi kuhusu mfano wa Jovidon, alijiweka katika hali zake. Alijiuliza hivi: ‘Je, nitaweza kutaja mambo hususa nikikabili jaribu kama hilo?’ “Hilo limenifundisha kutenga wakati kabla ya kusali ili kutafakari mambo nitakayomweleza Yehova. Ninathamini sana ripoti hizo.”

Ndugu Ruben Catarino na mke wake, Andreia, mapainia wa kawaida nchini Ureno, wamekuwa na uhusiano wa karibu zaidi na ndugu zao. Ruben anasema: “Zamani tulifahamu kwamba ndugu zetu katika nchi nyingine walikuwa wakiteswa, lakini hatukuwajua. Hatukujua majina yao, maisha yao, au changamoto walizokabili. Hata hivyo, kwa msaada wa makala hizi, sasa tunawajua vizuri. Tunaweza kusali kihususa kwa niaba yao na hali zao. Hilo linafanya tuhisi tukiwa karibu na ndugu zetu na kwamba sala zetu zina matokeo mazuri.”

Bila shaka wengi wetu tunahisi kama Dada Cecilia Cardoso, painia wa kawaida anayeishi Ureno, aliyefikia mkataa huu: “Kutokana na mambo ambayo ndugu na dada zetu wamepitia, sasa ninathamini sana funzo la kibinafsi. Kwa kujifunza Biblia kwa kina zaidi, nitamtegemea Yehova zaidi, na upendo wangu kwake utaongezeka. Atanisaidia kuona woga wangu kuwa sawa na chembe ya mchanga. Nimejionea wazi kwamba tunapatwa na woga tunapoacha kumtegemea Yehova.”

Tunathamini sana kwamba mambo yaliyoonwa katika siku zetu kuhusu ujasiri na imani yanapatikana kwenye jw.org. Masimulizi hayo yanatusaidia tuwe “hodari na kusema: ‘Yehova ni msaidizi wangu; sitaogopa.’”—Waebrania 13:6.