Januari 2023, makusanyiko ya mzunguko yalianza kufanywa uso kwa uso ulimwenguni pote baada ya kusitishwa kwa miaka mitatu hivi. Wakati huohuo, shule za kitheokrasi za uso kwa uso zilianza tena katika nchi nyingi. Ni wazi kwamba Yehova amebariki matukio haya ya pekee.

Jijini Villahermosa katika Jimbo la Tabasco, Mexico, wahubiri 200 hivi walishiriki katika usafi wa Jumba la Kusanyiko kabla ya kusanyiko la mzunguko. Baadhi yao walisafiri umbali wa karibu saa sita ili kufika Villahermosa. Dada mmoja alisema hivi: “Kwa muda mrefu hatujaona ndugu na dada wengi hivi wakiwa wamekusanyika pamoja. Hatungeacha fursa hii itupite.”

Kwenye kusanyiko la mzunguko lililofanywa Crownsville, Maryland, Marekani, dada mmoja alisema: “Ninabubujikwa na shangwe. Tangu nilipofika nimekuwa tu nikilia. Nimelowesha vitambaa vyangu vyote na bado programu haijaanza. Nisingependa kukosa kusanyiko hilo kwa sababu yoyote ile.”

Katika nchi nyingi, wanafunzi walifurahi sana kuhudhuria uso kwa uso Shule ya Waeneza-Injili wa Ufalme na Shule ya Waangalizi wa Mzunguko na Wake Zao. Ndugu Giovanny Cabezas, ambaye ni mwalimu wa shule za kitheokrasi zinazofanywa Palm Coast, Florida, Marekani, alisema: “Nilifurahi sana niliposikia kwamba shule za kitheokrasi zitafanywa tena uso kwa uso. Kwa kweli, mahali hapa ni pazuri kwa sababu walimu, wanafunzi, na wajitoleaji waliopo wamejitoa kabisa kutimiza mapenzi ya Yehova.”

Dada Satoko Nakata na mume wake walihudhuria Shule ya Waangalizi wa Mzunguko na Wake Zao mnamo Januari 2023. Dada huyo alisema: “Tulifurahia mikutano na shule za mapainia zilizofanywa kupitia Zoom wakati wa janga. Hata hivyo, haikuwa rahisi kuzungumza na wengine, kuwasikia wakicheka, au wakiimba. Ninahisi kuhudhuria shule hii uso kwa uso ni zawadi kutoka Mungu wetu mwenye upendo, Yehova. Sisi wanafunzi tulipata nafasi ya kuzungumza pamoja, kucheka pamoja, na nyakati nyingine kulia pamoja, na pia kuimba pamoja kwa shangwe. Ninamshukuru sana Yehova na pia Baraza Linaloongoza.”

Bila shaka, Yehova anapata shangwe anapoona watu wake wakikusanyika ili kumwabudu na kufundishwa. Tunakubaliana na maneno haya ya Mfalme Daudi: “Nitakushukuru katika kutaniko kubwa; nitakusifu katikati ya umati wa watu.”​—Zaburi 35:18.