Septemba 1, 2022, Mashahidi wa Yehova ulimwenguni pote walisisimka sana kurudia njia yao ya msingi ya kuhubiri ya nyumba kwa nyumba. Hata kumekuwa na kampeni ya pekee mwezi wa Septemba ya kuanzisha mafunzo ya Biblia. Wengi kati ya ndugu na dada zetu wamefurahia kurudia njia hii ya kuhubiri ambayo wanaipenda sana. Kwa wengine, ilikuwa mara yao ya kwanza kuwatembelea majirani wao uso kwa uso ili kuwahubiria. Haya ni baadhi ya masimulizi kutoka sehemu mbalimbali ulimwenguni yanayoonyesha mwanzo huu wenye kusisimua wa mwaka wa utumishi wa 2023.

Septemba 2, 2022, Nicole na Tina, dada wawili huko Petershagen, North Rhine-Westphalia, walikuwa wakishiriki katika huduma kwenye jengo lenye nyumba kadhaa lakini hawakumpata yeyote nyumbani. Walipokuwa wakiondoka walimsikia mwanamke fulani akiwaita. Mwanamke huyo aliwaeleza kwamba hakufaulu kwenda kuwafungulia mlango walipobisha na aliwaomba warudi ili wawe na mazungumzo ya Biblia pamoja. Alipowakaribisha kwenye nyumba yake, waliona mezani nakala ya Biblia Takatifu—Tafsiri ya Ulimwengu Mpya ambayo ilionekana inatumiwa vizuri. Mwanamke huyo aliwaambia kwamba alipewa Biblia hiyo miaka mitatu iliyotangulia, alipokuwa akiishi Italia. Lakini alipohamia Ujerumani katika kipindi cha janga hakuweza kuwapata Mashahidi wa Yehova. Dada hao walimpa namba zao za simu na kuchukua zake pia, kisha wakamwalika kwenye mikutano. Siku mbili baadaye, mwanamke huyo na watoto wake wawili walihudhuria mkutano. Mipango imefanywa ili kuanzisha funzo la Biblia pamoja naye.

Manuel na Karol Gastelum, wanaotumikia wakiwa mapainia wa pekee katika eneo la watu wanaozungumza lugha ya Mam walikutana na mwanamke mwenye fadhili aliyewakaribisha nyumbani kwake. Mwanamke huyo hakujua kwamba Mungu ana jina, basi wakaanza kuzungumzia somo la 4 la kitabu Furahia Maisha Milele! lenye kichwa “Mungu Ni Nani?” Waliposoma andiko la Isaya 42:8, mwanamke huyo alishangaa kuona jina la Mungu, Yehova, kwenye nakala yake ya Biblia.

Mwanamke huyo alianza kulia, akasema ametambua kwamba haitoshi tu kuwa na Biblia bali alihitaji kujifunza Biblia na kutenda kupatana na aliyojifunza. Walipomaliza somo hilo, mwanamke huyo alishukuru sana. Alisema kwamba angemweleza mume wake mambo aliyojifunza. Ndugu na dada Gastelum wamefanya mipango ya kuendeleza mazungumzo hayo ya Biblia.

Ndugu na Dada Nukamori walipokuwa wakishiriki huduma jijini Yokohama walitembelea nyumba iliyokuwa na kamera mlangoni. Walipobisha, walisikia sauti ya mwanamke akiwasalimia. Walijitambulisha kwamba wao ni Mashahidi wa Yehova. Mwanamke huyo aliwaomba wamsubiri mlangoni. Muda mfupi baadaye, alikuja kuwafungulia mlango na akasema, “Nimekuwa nikisubiri kutembelewa na Mashahidi wa Yehova.”

Mwanamke huyo alisema kwamba alikuwa ameanza kujifunza Biblia na Mashahidi wa Yehova jijini Nagasaki. Alihamia Yokohama wakati wa janga ingawa aliendelea na funzo lake la Biblia kupitia Zoom. Mapema juma hilo, mwalimu wake alimwambia: “Kutakuwa na kampeni mwezi Septemba. Nina uhakika utatembelewa na Shahidi wa Yehova, tafadhali mwombe ajifunze Biblia pamoja nawe uso kwa uso.” Mwanamke huyo alishangaa sana alipowaona Mashahidi lakini alifurahi kwa sababu walimpata haraka sana. Aliwaambia kwamba alitamani kuhudhuria mikutano na aliwaambia siku ambayo angependa warudi ili waanze kujifunza Biblia.

Wenzi fulani wa ndoa walimweleza mwanamke mmoja kuhusu mpango wetu wa kujifunza Biblia pamoja na watu. Aliwaambia kwamba alikuwa amejifunza Biblia na Mashahidi wa Yehova na hata amewahi kuhudhuria mikutano miaka mingi iliyopita. Alipoteza mawasiliano na Mashahidi na aliaibika kuwatafuta tena kwa sababu hakuwa akiishi kupatana na kanuni za Biblia. Mara tu baada ya kusema hayo, alianza kulia. Walimsomea Zaburi 10:17 na kumhakikishia kwamba Yehova hakuwa amemsahau. Pia, walimpongeza kwa tamaa yake ya kuishi kupatana na viwango vya Yehova. Alikubali kujifunza Biblia na hata alisema mwana wake mwenye umri wa miaka 16 alitaka kujifunza mengi zaidi kuhusu Biblia.

Wenzi hao waliporudi siku inayofuata, walimkuta mwanamke huyo pamoja na mwana wake wakiwasubiri. Walipomaliza kujifunza somo la 01 la broshua Furahia Maisha Milele! walialikwa kuhudhuria mkutano wa mwisho-juma, nao wakahudhuria. Sasa, mwanamke huyo pamoja na mwana wake wameamua kuendelea kujifunza na kuhudhuria mikutano.

Ramon alimwomba Yehova amsaidie kupata mtu wa kumweleza kuhusu habari njema alipoenda kushiriki huduma ya nyumba kwa nyumba kwa mara ya kwanza baada ya muda mrefu. Alipopata fursa ya kufanya ziara ya kwanza, mwanamke mmoja alifungua mlango wake kidogo na kumchungulia. Ramon alimsalimia mwanamke huyo na kujitambulisha. Kabla ya kuanzisha mazungumzo ya Biblia, mwanamke huyo alisema hivi: “Hujui nimekuwa nikisubiri nafasi hii kwa muda gani. Nilikuwa nikisali kwamba mje kunitembelea nyumbani kwangu.”

Mwanamke huyo alisema kwamba amewahi kukutana na Mashahidi miaka kadhaa iliyopita na hata amewahi kuhudhuria mikutano kutanikoni. Alipohama hakuweza kuwapata Mashahidi. Ramon alimjulisha kwamba huduma yetu ya nyumba kwa nyumba ilisitishwa wakati wa janga. Baada ya hayo, Ramon alimsomea Zaburi 37:29 na kumweleza kuhusu mpango wetu wa kujifunza Biblia pamoja na watu, naye alikubali kujifunza mara moja. Ramon alimkabidhi kwa dada atakayemtembelea.

Baada ya tukio hilo, Ramon alisema hivi: “Ninajua kwamba Yehova na malaika wanatuongoza kwa wale wanaotaka kutusikiliza.”

Katelyn Thompson alipotembelea nyumba moja katika jimbo la Kentucky, aligundua kwamba kinara cha sanduku la barua lililo nje ya nyumba hiyo lina alama yenye maneno “Yesu Anakupenda.” Katelyn alibisha mlango kisha mwanamke akatoka. Katelyn alijitambulisha na kumweleza kwamba Mashahidi wa Yehova hawakuweza kuwatembelea majirani wao uso kwa uso kwa sababu ya janga la COVID-19. Pia, alimweleza kwamba Mashahidi waliwaandikia watu barua na kuwapigia simu katika kipindi hicho ili kuwatia moyo na kuwafariji. Katelyn alimwuliza kuhusu hali yake na ya familia yake baada ya janga hilo. Mwanamke huyo alisema kwamba baba yake alikufa katika kipindi cha janga. Kisha akasema: “Nilipokea barua zenu, nazo zilinifanya nihisi kana kwamba Mungu alikuwa akinipa nilikichohitaji kwa wakati mwafaka!” Katelyn alimfariji kisha wakasoma somo la 2 la broshua Furahia Maisha Milele! Walisoma maandiko yaliyo katika somo hilo yaliyohusiana na tumaini la ufufuo. Mwanamke huyo alianza kulia. Ilikuwa tarehe kama ya siku hiyo baba yake alipokufa mwaka mmoja uliopita. Mwanamke huyo alimpa Katelyn namba yake ya mawasiliano na akakubali kutembelewa kwa ukawaida. Baadaye siku hiyo, Katelyn alipokea ujumbe wa simu kutoka kwa mwanamke huyo uliosema hivi: Asante​—Kwa kweli nilihitaji sana kitia moyo kama hicho siku ya leo!”

Kwa hakika, Yehova amebariki kurudia huduma yetu ya nyumba kwa nyumba na kampeni yetu ya kuanzisha mafunzo ya Biblia. Tunatazamia kwa hamu kuona matokeo!—Yohana 4:35.