Miaka 25 iliyopita, Mashahidi wa Yehova walianzisha mradi wa pekee wa kuharakisha ujenzi wa Majumba ya Ufalme katika eneo la ofisi ya tawi ya Afrika Mashariki. Nchi zilizo chini ya usimamizi wa ofisi hiyo ya tawi zinatia ndani Kenya, Sudan Kusini, Sudan, na Tanzania.

Mwaka wa 1999, Baraza Linaloongoza liliidhinisha programu ya kujenga Majumba ya Ufalme katika nchi zisizo na uwezo mkubwa wa kifedha a ili kuharakisha ujenzi wa Majumba ya Ufalme katika nchi 88 zinazositawi. Chini ya mpango huo, ofisi za tawi zilizokuwa na pesa za ziada zilitoa fedha hizo kwa ukarimu ili zitumiwe katika nchi ambazo hazikuwa na uwezo mkubwa wa kifedha. (2 Wakorintho 8:13-15) Kwa kuongezea, Mashahidi wenye uzoefu katika kazi ya ujenzi wa Majumba ya Ufalme walisafiri kwenda nchi nyingine ili kuwazoeza ndugu na dada kufanya kazi hiyo. Baada ya kuzoezwa, wahubiri hao walikuwa na uwezo wa kuendeleza kazi ya ujenzi katika eneo lao. Matokeo mazuri ya mpango huu yanaonekana katika kazi ya ujenzi wa Majumba ya Ufalme inayoendelea katika eneo la ofisi ya tawi ya Afrika Mashariki.

Mwaka wa 1999, kulikuwa na zaidi ya wahubiri 23,000 katika eneo la ofisi ya tawi ya Afrika Mashariki na Majumba 51 tu ya Ufalme. Makutaniko mengi yalifanyia mikutano nje, katika nyumba za watu, au sehemu nyingine. Kabla ya programu hiyo ya ujenzi kuanza, akina ndugu walitumia vifaa vyovyote walivyopata ili kujenga Majumba ya Ufalme. Walitumia vifaa kama vile mbao, udongo, mabati, au hata kinyesi cha ng’ombe kilichochanganywa na majivu. Dada Nancy Ruitha, ambaye alikuwa katika Kutaniko la Kingspost mjini Embu, Kenya, anasema hivi: “Jumba letu lilikuwa la mabati. Kulipokuwa na joto, lilikuwa kama jiko, na kuliponyesha, kulikuwa na kelele nyingi za mvua hivi kwamba hatungemsikia msemaji. Tunafurahi sana kwamba sasa tuna kuta za mawe badala ya mabati. Sasa tuna mazingira mazuri ya kujifunza, na Jumba hilo la Ufalme linatoa ushahidi mzuri katika jamii.”

Akina ndugu wa Afrika Mashariki walijenga Jumba la kwanza la Ufalme chini ya mpango huo jijini Nairobi, Kenya. Inapendeza kwamba, katika miaka 25 iliyofuata, idadi ya Majumba ya Ufalme katika eneo lao iliongezeka kutoka 51 hadi karibu 1,000.

Watu wengi zaidi wanajifunza ujumbe wa Ufalme katika eneo la ofisi ya tawi ya Afrika Mashariki. Hivyo, kutaendelea kuwa na uhitaji wa Majumba mengine ya Ufalme. Ndugu Timothy Stephens, ambaye ni msaidizi wa mwangalizi wa Idara ya Usanifu-Majengo na Ujenzi katika ofisi ya tawi ya Afrika Mashariki, alisema hivi: “Kwa sasa, tunahitaji kujenga Majumba mapya 126 ya Ufalme na kukarabati zaidi ya Majumba 200 ya Ufalme. Tunatarajia kwamba katika miaka mitano ijayo, tutahitaji Majumba zaidi ya Ufalme.”

Tunathamini kazi kubwa ambayo imefanywa na pia jinsi ambavyo akina ndugu wamejidhabihu ili kuwasaidia ndugu na dada zetu walio Afrika Mashariki na ulimwenguni pote. Majumba zaidi ya Ufalme yanaendelea kujengwa, na tuna uhakika kwamba Yehova ataendelea kubariki jitihada zetu za kuendeleza na kuunga mkono ibada safi ili kumletea sifa na utukufu.​—Isaya 2:3.