Ukumbusho wa mwaka wa 2020 wa kifo cha Kristo ulikuwa wa pekee katika historia yetu ya kitheokrasi. Kwa mara ya kwanza, programu ya Ukumbusho ilipeperushwa kwenye stesheni za lugha kadhaa katika sehemu nyingi barani Afrika.

Mbinu hiyo iliwaruhusu zaidi ya wahubiri 407,000 na watu wengi sana wanaopendezwa kutazama programu ya Ukumbusho. Ingawa jumla ya watazamaji haijulikani, zaidi ya watu milioni 150 wanaishi katika eneo ambalo programu hiyo ilipeperushwa.

Ingawa watu wengi walitazama Ukumbusho kupitia video iliyounganishwa kwenye Intaneti kwa sababu ya ugonjwa wa virusi vya corona, wahubiri fulani barani Afrika wanaishi katika maeneo ambapo kupata huduma za Intaneti na za simu ambazo zinawawezesha kutazama au kupakua video kupitia Intaneti ni gharama kubwa. Kwa sababu hiyo, Baraza Linaloongoza liliidhinisha kwamba ofisi fulani za tawi zifanye mapatano fulani na kampuni za televisheni na za redio ili kupeperusha programu ya Ukumbusho kwenye stesheni za nchi zao.

Kabla ya Ukumbusho, jumla ya ofisi 11 za tawi—Angola, Benin, Kamerun, Côte d’Ivoire, Jamhuri ya Kidemokrasia ya Kongo, Ghana, Malawi, Msumbiji, Senegal, Zambia, na Zimbabwe—ziliwasiliana na stesheni za utangazaji na kupanga hotuba ya Ukumbusho ipeperushwe katika zaidi ya maeneo 36, katika nchi 16.

Angola

Jumla ya stesheni sita za redio zilikubali kupeperusha programu ya Ukumbusho katika lugha sita tofauti: Kiibinda, Kikongo, Kimbundu, Kinyaneka, Kireo, na Kiumbundu. Stesheni za redio zilipeperusha programu hiyo katika maeneo fulani yaliyo na watu wengi zaidi nchini humo.

Jamhuri ya Kidemokrasia ya Kongo

Mwanafunzi mmoja wa Biblia alipanga kutazama programu ya Ukumbusho akiwa peke yake, kwa kuwa familia yake iliwapinga Mashahidi wa Yehova. Hata hivyo, alipokuwa akijitayarisha kuanza kutazama programu hiyo, baba yake alimwita kutoka sebuleni, “Njoo huku, imeanza!” Alipoenda sebuleni alishangaa kuona kwamba familia yake yote ilikuwa imekutana ili kutazama programu ya Ukumbusho kwenye televisheni. Jumla ya washiriki kumi wa familia ya mwanafunzi huyo wa Biblia walitazama Ukumbusho.

Katika kijiji kilicho karibu na Luena, mtu fulani ambaye si Shahidi alisema: “Mapasta wetu hawakufanya chochote. Lakini ninyi mnaendelea kumwabudu Mungu wenu hata wakati wa ugonjwa huu wa virusi vya corona. Tutajiunga nanyi!”

Ghana

Stesheni ya televisheni ilikubali kupeperusha programu ya Ukumbusho katika lugha ya Twi. Stesheni hiyo ilipeperusha tangazo la kuwakaribisha watu wote kutazama programu ya Ukumbusho. Mbali na kupeperusha Ukumbusho, stesheni hiyo pia ilionyesha video zenye kichwa Kwa Nini Yesu Alikufa? na Kwa Nini Mungu Anaruhusu Kuteseka?, kutia ndani video za muziki zenye kichwa Tunatazamia Ulimwengu Mpya na Paradiso Ipo Karibu Sana.

Senegal

Dada mmoja alisema hivi: “Ilipendeza sana kwamba watu wangeweza kujifunza kumhusu Yehova kwenye televisheni na redio. Tunafurahi na kujivunia sana kwamba Yehova ni Mungu wetu.”

Dada mmoja alisema hivi: “Niliposikia kwamba hotuba ya Ukumbusho itapeperushwa kwenye televisheni, nilijiambia, ‘Sasa hii ni nafasi yetu ya kufanya kampeni ya kugawa mialiko ambayo ilizuiwa na ugonjwa wa virusi vya corona.’ Niliwasiliana upesi na wanafunzi wangu wa Biblia, ziara za kurudia, na marafiki wote ambao si Mashahidi ili kuwajulisha kuhusu programu hiyo. Wanafunzi tisa wa Biblia na familia zao walitazama hotuba hiyo. Binamu yangu mmoja ambaye alitazama programu hiyo kwenye televisheni akiwa Ziguinchor aliniomba tuzungumzie habari hiyo zaidi, nami nilikubali kwa shangwe.”

Mpango huo wa pekee ni uthibitisho mwingine kwamba kwa Yehova, “mambo yote yanawezekana.”—Mathayo 19:26.