Kwa sababu ya ugonjwa wa virusi vya corona, kulikuwa na changamoto kwa akina ndugu na dada wanaoishi katika makao ya kuwatunzia wazee kuadhimisha Ukumbusho. Katika visa vingi, hawangeweza kuondoka kwenye makao hayo na wageni hawakuruhusiwa kuingia. Licha ya changamoto hizo, kwa msaada wa wazee wa makutaniko yao, ndugu na dada hao walifaulu kuadhimisha tukio hilo muhimu zaidi katika mwaka.

Katika Jiji la Naju, Dada Lee Jeom-soon aliye na umri wa miaka 91 na Dada Kwon Ae-soon aliye na umri wa miaka 88, pamoja na mwanamke anayependezwa mwenye umri wa miaka 96, waliazimia kuadhimisha Ukumbusho. Mmoja wa madaktari katika kituo chao ni Shahidi wa Yehova. Baada ya kuadhimisha Ukumbusho nyumbani pamoja na kutaniko lake, alirudi kwenye kituo hicho. Aliwasaidia dada hao wawili pamoja na mwanamke huyo anayependezwa kutazama programu ya Ukumbusho kupitia jw.org. Pia ndugu huyo aliwaandalia mkate na divai.

Katika Jiji la Uijeongbu, Ndugu Choi Jae-cheol anafanya kazi katika makao ya wazee ambako ndugu na dada 14 wenye umri mkubwa wanaishi. Licha ya ugonjwa wa corona, ndugu yetu alifaulu kuwasaidia ndugu na dada wanaoishi humo, pamoja na wanaopendezwa, kuadhimisha Ukumbusho kupitia video. Mafunzo ya Biblia yalianzishwa na baadhi ya wanaopendezwa waliohudhuria.

Dada Kim Tae-sun ana umri wa miaka 59 na anaishi Cheonan. Dada Tae-sun aligunduliwa ana kansa miaka mitano iliyopita. Hivi karibuni alilazwa hospitalini kwa sababu ya maumivu makali. Dada Tae-sun yuko katika chumba kimoja na dada mwingine anayeitwa Kim Jeong-mi. Dada huyo ana umri wa miaka 69 na amegunduliwa kuwa ana kansa pia. Dada zetu hawawezi kutoka hospitalini wakati huu ambapo ugonjwa wa virusi vya corona unazidi kuenea. Hata hivyo, kwa msaada wa wazee wa eneo lao, wote wawili walifanikiwa kuhudhuria Ukumbusho na kushirikiana na kutaniko lao kupitia video iliyounganishwa kwenye mtandao.

Dada hao wawili waliwaandikia wazee barua ya shukrani. Walisema hivi: “Asanteni sana kwa kutusaidia kuhudhuria Ukumbusho na kufurahia ushirika mzuri pamoja na waabudu wenzetu licha ya kuenea kwa ugonjwa wa virusi vya corona na afya yetu mbaya.”

Dada Mieko Fujiwara, dada aliye na umri wa miaka 70 anayeishi katika Wilaya ya Mie, Japani, alilazwa hospitalini. Kwa kuwa hospitali hiyo haina Wi-Fi ya Intaneti, dada yetu hangeweza kuungana na kutaniko lake kwenye Ukumbusho kupitia video iliyounganishwa kwenye mtandao. Hata hivyo, mzee mmoja na mke wake walifaulu kumtumia rekodi ya hotuba ya Ukumbusho kwenye simu yake, ambayo ilimruhusu kuona na kusikiliza hotuba hiyo akiwa katika chumba chake.

Katika Jiji la Zama, Wilaya ya Kanagawa, Dada Yuki Takeuchi anaishi katika makao ya wazee. Kabla ya Ukumbusho, binti yake pamoja na mwana wake mkwe walimtumia Dada Takeuchi mkate na divai katika kifurushi kidogo. Kisha alifaulu kuadhimisha Ukumbusho pamoja na binti yake na mwana mkwe wake kupitia simu.

Ndugu Mimura, mwana mkwe wake, alisema hivi: “Mama mkwe wangu alibatizwa mnamo 1954 na hajawahi kukosa kuhudhuria Ukumbusho. Ingawa Ukumbusho huu ulikuwa wa pekee, alifurahi sana kwamba hakukosa kuhudhuria mwaka huu.”

Tuna uhakika kwamba Yehova anatambua jitihada za wahubiri hao za kuadhimisha Ukumbusho kwa msaada wa wazee wa makutaniko yao.—Waebrania 6:10.