DESEMBA 8, 2022
HABARI ZA ULIMWENGUNI POTE

Ndugu Dubovenko na Ndugu Litvinyuk Wahukumiwa Miaka Sita Gerezani

CHEZA

Novemba 30, 2022, Mahakama ya Jiji la Armyanskiy iliyo katika Jamhuri ya Crimea iliwahukumu Ndugu Aleksandr Dubovenko na Ndugu Aleksandr Litvinyuk. Ndugu wote wawili walihukumiwa kifungo cha miaka sita gerezani na kupelekwa gerezani moja kwa moja.

Maelezo Mafupi Kuwahusu

Aleksandr Dubovenko

Alizaliwa: 1973 (Ochakiv, Ukrainia)

Maisha Yake: Alifanya kazi ya kuchomelea vyuma, pia alikuwa fundi-umeme na seremala. Alifunga ndoa na Irina mwaka wa 1999

Baada ya mama yake kuwa Shahidi wa Yehova, alimweleza kuhusu kweli. Alijifunza kwamba Biblia inaahidi dunia itakuwa paradiso, na jambo hilo lilimfurahisha sana. Alibatizwa mwaka wa 1999

Maelezo ya Kibinafsi a

Uliwezaje kuvumilia kifungo cha nyumbani?

Kwa zaidi ya miezi 13, nilikatazwa kuwasiliana na mtu yeyote nje ya familia yangu isipokuwa wapelelezi na mawakili. Kwa sasa, bado nimezuiwa kuzungumza na ndugu na dada ambao wametajwa katika kesi yangu. Licha ya hayo, nilitafakari kuhusu kielelezo cha Eliya. Alikuwa nyikani na alikuwa ameshuka moyo sana. Yehova alimwiimarisha Eliya na kumhakikishia kwamba hakuwa peke yake. Yehova hakumwacha Eliya nami nina uhakika kwamba hataniacha.

Aleksandr Litvinyuk

Alizaliwa: 1960 (Amangeldi, Kazakhstan)

Maisha Yake: Alifanya kazi katika kiwanda cha kemikali na pia alifanya kazi ya kuchomelea vyuma. Alifunga ndoa na Nadezhda mwaka wa 1979. Wana watoto watatu wakubwa, wawili wa kiume na binti mmoja

Alikuwa akijiuliza kwa nini Mungu anaruhusu uovu na kuteseka. Alipata jibu baada ya yeye na Nadezhda kuanza kujifunza Biblia na Mashahidi wa Yehova. Alibatizwa mwaka wa 1993

Maelezo ya Kibinafsi b

Ulijitayarishaje kukabiliana na mateso?

Nilipopata habari kuhusu mambo ambayo yalikuwa yakiwapata ndugu na dada zangu, nilijiuliza ikiwa ningeweza kuvumilia mateso. Nilihisi kwamba nilihitaji kufanya matayarisho. Nilianza kusoma na kutafakari kuhusu watu waliovumilia majaribu magumu ambao wanatajwa katika Biblia. Nilikazia mambo yaliyowasaidia kuvumilia na kumtumaini Yehova. Nilifanya utafiti kuhusu masimulizi hayo nikiwa na lengo la kuyafanya yawe halisi kwangu. Isitoshe, mimi na mke wangu tulichanganua masimulizi ya kisasa ya ndugu na dada waaminifu. Mambo hayo yaliimarisha imani yetu na tulihisi tukiwa tayari zaidi kukabiliana na mateso ambayo yangekuja.

Sala za wengine kwa niaba yako zimekusaidiaje?

Ninatokwa na machozi ninaposikia kuhusu jinsi ndugu na dada wanasali kwa bidii kwa ajili yangu. Wanamwomba Yehova anipe utulivu, ujasiri, na nguvu ninazohitaji. Kabla ya kesi yangu kusikilizwa mahakamani, ndugu mmoja alikuwa ananiuliza mambo hususa kuhusu kesi niliyotaja katika sala zangu siku hiyo. Kisha alisali kuhusu mambo hayohayo alipokuwa akisubiri nje ya mahakama huku kesi ikiendelea. Jambo hilo lilinigusa moyo sana.

Tunafarijiwa kujua kwamba sikuzote Yehova yuko kando yetu, popote tulipo na wakati wowote tunapokabili majaribu.—Zaburi 139:7-12.

Mfuatano wa Matukio

Agosti 2, 2021

Kesi ya uhalifu ilifunguliwa. Ndugu wote wawili walishtakiwa kwa kutumia programu za kufanya mikutano kupitia video mtandaoni kuendeleza utendaji wa shirika lenye msimamo mkali
Agosti 5, 2021

Misako ilifanywa katika nyumba za familia nane za Mashahidi wa Yehova kutia ndani nyumba ya familia ya Dubovenko na ya Litvinyuk. Ndugu Litvinyuk alikamatwa na kupelekwa mahabusu
Agosti 6, 2021

Ndugu Litvinyuk aliachiliwa kutoka mahabusu na kuwekwa chini ya kifungo cha nyumbani
Agosti 9, 2021

Maofisa wa polisi walifanya tena msako katika nyumba ya Dubovenko. Aleksandr alihojiwa na kuwekwa chini ya kifungo cha nyumbani
Agosti 11, 2021

Ndugu Litvinyuk alishtakiwa rasmi kwamba alipanga utendaji wa shirika lenye msimamo mkali
Februari 8, 2022

Ndugu Dubovenko alishtakiwa rasmi kwamba alipanga utendaji wa shirika lenye msimamo mkali
Aprili 29, 2022

Kesi ya uhalifu ilianza. Hakimu alikataa ombi la Ndugu Litvinyuk la kumwona daktari na kupata matibabu alipokuwa chini ya kifungo cha nyumbani
Septemba 8, 2022

Ndugu wote wawili waliruhusiwa kuondoka nyumbani kila siku kati ya saa moja asubuhi na saa moja jioni
Novemba 30, 2022

Ndugu wote wawili walihukumiwa kifungo cha miaka sita gerezani

a b Maelezo ya kibinafsi yalitolewa kabla ya kuhukumiwa.

Huenda Ukapenda Pia

TAARIFA ZA HABARI

Wamefungwa kwa Sababu ya Imani Yao—Urusi

Mashahidi wa Yehova nchini Urusi wamefungwa gerezani kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI