Tangu 2019, vifaa vinavyotumia Amazon Alexa au Google Assistant vimekuwa vikicheza baadhi ya habari zinazopatikana katika tovuti ya jw.org. Maagizo zaidi ya kucheza habari yanawawezesha watumiaji kusikiliza habari zaidi tunazotumia katika mikutano na huduma yetu. Hata hivyo, Google ina mipango ya kusitisha huduma za maongezi za Google Assistant mnamo Juni 2023. Watumiaji wanaweza kuendelea kufurahia huduma hizo kabla ya muda huo kufika. Programu ya Jw.org skill kwenye Amazon Alexa itaendelea kufanya kazi.

Watumiaji wanaweza kuomba kifaa chao kusoma ratiba ya kila juma iliyo katika Daftari la Mkutano wa Huduma na Maisha na masomo ya broshua Boresha Uwezo Wako wa Kusoma na Kufundisha. Isitoshe, mtu anaweza kuomba kifaa chake kusoma somo fulani katika kitabu Furahia Maisha Milele! anapojitayarisha kwa ajili ya Funzo la Biblia.

Kwa kuongezea, watumiaji wanaweza kusikiliza nyimbo tunazotumia katika mikutano yetu zilizo katika mkusanyo wa nyimbo unaoitwa ‘Mwimbieni Yehova kwa Shangwe’ au hata muziki wa sauti au wa ala. Ripoti za hivi karibuni za Baraza Linaloongoza pia zinaweza kuchezwa.

Ili kujifunza kuhusu maagizo ya kucheza habari unayoweza kutumia kwenye Amazon Alexa na Google Assistant, soma makala “Tumia JW.ORG Skill Kwenye Amazon Alexa” au “Tumia JW.ORG Action Kwenye Google Assistant.”

Kwa wale ambao vifaa vyao havina programu hizo za kielektroni za kusikiliza habari, wanaweza kupata huduma hizo kwa kupakua programu ya Alexa kwa kuwa simu nyingi, tablet, na kompyuta zinawaruhusu watumiaji kupakua programu hiyo.

Huduma hizi zinaweza kuwasaidia sana wale ambao ni vipofu au wenye matatizo ya kuona. Ikiwa una rafiki ambaye ana matatizo ya kuona, je, unaweza kumsaidia kupata programu hizi na kumfundisha jinsi ya kuzitumia?