Oktoba 9, 2022, toleo lililorekebishwa la Biblia Takatifu—Tafsiri ya Ulimwengu Mpya lilitolewa katika Kisamoa. Ndugu Geoffrey Jackson, mshiriki wa Baraza Linaloongoza, alitoa Biblia hiyo katika hotuba iliyorekodiwa mapema, iliyotazamwa na wahubiri katika Samoa ya Marekani, Australia, New Zealand, na Samoa. Punde tu baada ya hotuba hiyo, wasikilizaji walipata nakala za Biblia zilizochapishwa, na pia wangeweza kupakua Biblia hiyo katika mfumo wa kielektroni.

Mashahidi wa Yehova walianza kuhubiri nchini Samoa katika mwaka wa 1931, na kutaniko la kwanza lilianzishwa katika jiji la Apia mwaka wa 1953. Tafsiri ya Ulimwengu Mpya ilipatikana katika Kisamoa kwa mara ya kwanza katika mwaka wa 2009. Mashahidi wa Yehova na watu wengine pia, walifurahia kupata Tafsiri ya Ulimwengu Mpya. Tafsiri hiyo ilikuwa sahihi na rahisi kupatikana.

Sasa, katika toleo hili lililorekebishwa, jitihada nyingi zaidi zilifanywa ili kutumia lugha ya kisasa inayoeleweka kwa urahisi, na wakati uleule kudumisha usahihi wa Biblia. Mtafsiri mmoja alisema hivi: “Wasamoa wanaheshimu sana Biblia. Kikundi cha watafsiri kilizingatia maoni hayo na kilitumia lugha ambayo ni rahisi kueleweka lakini si ya mtaani. Kwa msaada wa Yehova, sasa tuna Biblia nzima ya Kisamoa iliyorekebishwa na itatunufaisha sisi sote.”

Tuna uhakika kwamba tafsiri hii itawasaidia wasomaji wanufaike kutokana na mawazo yenye thamani sana ya Mungu wetu Yehova.​—Zaburi 139:17.