Katika miezi michache iliyopita, Biblia Takatifu—Tafsiri ya Ulimwengu Mpya ilitolewa katika lugha tatu za maandishi ya vipofu: Kijerumani, Kikorea, na Kiukrainia. Faili za kielektroni ziliwekwa kwenye tovuti ya jw.org. Faili za kielektroni za maandishi ya Kikorea na ya Ukrainia zinaweza kutumiwa katika mashine ndogo za kuandika maandishi ya vipofu zinazoitwa notetaker. Faili za kielektroni za Kijerumani zinaweza kusomwa kupitia programu inayosoma maandishi kwenye skrini kwa sauti.

Vipofu wengi wanasikiliza machapisho yaliyorekodiwa na kutumia mashine za kunakili. Lakini wengi wanapendelea machapisho yenye maandishi ya vipofu. Mabuku ya maandishi ya vipofu ya lugha ya Kijerumani tayari yamechapishwa na kusafirishwa ili yawafikie wahubiri. Wahubiri wanaozungumza Kikorea wataweza kupata nakala zilizochapishwa za Biblia za lugha ya vipofu katika miezi michache ijayo. Kwa sababu ya vita vinavyoendelea Ukrainia, hatujui usambazaji wa Biblia hizo utafanywa lini.

Ili kutokeza Tafsiri ya Ulimwengu Mpya katika maandishi ya vipofu, lazima maneno yote, kutia ndani marejeo yote, yaandikwe kwa kutumia alama za maandishi hayo. Vitu kama vile picha, michoro, na ramani vinapaswa kubadilishwa pia na kuwekwa katika mfumo ambao utaeleweka kwa urahisi na vipofu.

Dada mmoja anayeishi Ujerumani ambaye ni kipofu alisema hivi:“Ninakumbuka mambo ninayosoma katika maandishi ya vipofu. Ni afadhali zaidi kuliko kusikiliza tu. Upendo wangu kwa Yehova umeongezeka na ninamtegemea zaidi.”

Biblia zote za maandishi ya vipofu zinachapishwa Wallkill, New York, Marekani, kwa kutumia mashine ya kuchapisha maandishi ya vipofu. Mashine hiyo hutokeza nukta nundu kwenye karatasi za pekee, ambazo baadaye zinaunganishwa pamoja na kufanyiza mabuku yatakayosafirishwa hadi kwenye ofisi za tawi kwa ajili ya wahubiri. Toleo lililokamilika la Tafsiri ya Ulimwengu Mpya katika maandishi ya vipofu linaweza kujaza mabuku zaidi ya 30 na mabuku hayo yanaweza kuhifadhiwa kwenye kabati lenye upana wa mita mbili.

Mwandishi mmoja aliyeshiriki katika kutayarisha toleo la Kikorea alisema hivi: “Tunapofikiria jinsi Biblia hii itakavyowasaidia ndugu na dada zetu ambao ni vipofu kumkaribia Yehova zaidi na kupata faraja, tunachochewa kumshukuru Yehova Mungu hata zaidi.”

Tuna uhakika kwamba matoleo haya ya Tafsiri ya Ulimwengu Mpya katika maandishi ya vipofu yatawanufaisha ndugu na dada zetu ambao ni vipofu huku Yehova akiwashibisha “kwa vitu vyema.”​—Zaburi 107:9.