Agosti 13, 2023, Ndugu Roy Zeeman, mshiriki wa Halmashauri ya Tawi ya Suriname, alitangaza kutolewa kwa vitabu vya Biblia vya Mathayo, Marko, Luka, na Yohana katika lugha ya Aukan. Watu 2,713 walihudhuria mkutano wa pekee uliofanywa katika Jumba la Kusanyiko la Mashahidi wa Yehova katika jiji la Paramaribo, Suriname. Watu wengine 691 waliunganishwa mubashara kupitia mtandao kwenye Jumba la Ufalme la Cayenne, lililoko Guiana ya Ufaransa, na katika maeneo mengine kadhaa. Vitabu vyote vinne vya Injili vilitolewa mara moja katika mfumo wa kidijitali. Mbali na hilo, nakala zilizochapishwa za Biblia—Habari Njema Kulingana na Mathayo zilipatikana. Vitabu vile vingine vitatu vya Injili vitachapishwa wakati ambapo Tafsiri ya Ulimwengu Mpya ya Maandiko ya Kigiriki ya Kikristo itatolewa ikiwa nzima katika lugha ya Aukan.

Watu wengi wanaozungumza lugha ya Aukan wanaishi nchini Suriname na katika nchi jirani ya Guiana ya Ufaransa. Ni lugha inayozungumzwa hasa na kuna vitabu vichache sana vilivyochapishwa. Kwa sasa, wahubiri katika makutaniko ya lugha ya Aukan wanatumia Tafsiri ya Ulimwengu Mpya katika Kisranantongo kwa ajili ya mikutano na huduma. Ingawa Kisranantongo kinazungumzwa na watu wengi nchini Suriname, watu wengi wanaozungumza lugha ya Aukan hawawezi kuelewa vizuri Kisranantongo. Kwa sababu hiyo, wahubiri hukabili changamoto ya kutafsiri maandiko ya Biblia katika lugha ya Aukan wanapokuwa katika huduma. Mtafsiri mmoja alisema hivi: “Tunafurahi sana kupata toleo hili jipya ambalo litawawezesha watu wanaozungumza lugha ya Aukan wenye umri mbalimbali na viwango tofauti vya elimu kunufaika kikamili kutokana na Neno la Mungu.”

Kama ndugu na dada wanaozungumza lugha ya Aukan, tuna uhakika kwamba toleo hili jipya la Biblia litawasaidia watu wengi zaidi walio na mioyo minyoofu kumtukuza Yehova.​—Zaburi 34:1.