NEW YORK—Mei 19, 2017, Mashahidi wa Yehova wataanza makusanyiko yao ya kila mwaka ya siku tatu yenye kichwa “Usife Moyo!” Programu hiyo itafanyiwa katika maeneo mbalimbali ulimwenguni pote na yataendelea hadi mwanzoni mwa mwaka wa 2018. Kama ilivyokuwa katika miaka iliyopita, Mashahidi wanashiriki katika kampeni ya ulimwenguni pote ya kumwalika kila mtu ahudhurie.

Hakuna kiingilio na sadaka hazikusanywi. David A. Semonian, msemaji wa Mashahidi wa Yehova katika makao yao makuu yaliyoko Warwick, New York, anasema hivi: “Watu milioni kumi na tatu hivi walihudhuria makusanyiko yetu ulimwenguni pote mwaka jana. Tunatumaini kuwa na wahudhuriaji wengi hata zaidi mwaka huu.”

Programu imegawanywa katika sehemu 52 na itatolewa kwa njia mbalimbali, kutia ndani hotuba fupi, mahojiano, na video fupi. Isitoshe, sehemu moja kati ya sehemu tatu za video inayoitwa Mkumbuke Mke wa Loti itaonyeshwa kila siku saa za mchana. Tarehe na maeneo ambayo kila kusanyiko litafanywa inapatikana kwenye Tovuti rasmi ya Mashahidi, jw.org/sw. Waandishi wa habari wanaweza kuwasiliana na ofisi ya tawi iliyo karibu ya Mashahidi wa Yehova ili kupata habari zaidi, kutia ndani jina la mtu wanayeweza kuwasiliana naye katika eneo hilo ikiwa wanapanga kuripoti kuhusu kusanyiko fulani.

“Changamoto za maisha zinaweza kutunyima amani na hata kuwafanya watu fulani wafikirie kukata tamaa,” anasema Bw. Semonian. “Kusanyiko la mwaka huu litawanufaisha Mashahidi na wasio Mashahidi kwa sababu litamwimarisha mtu mmoja-mmoja aendelee kuvumilia na kukabiliana na hali ngumu kwa njia inayofaa.”

Wanahabari Wanaweza Kuwasiliana na:

David A. Semonian, Ofisi ya Habari za Umma, +1-845-524-3000