Desemba 17, 2020, a  Mahakama ya Wilaya ya Leninskiy huko Rostov-on-Don imepanga kutangaza uamuzi wake katika kesi kumhusu Ndugu Ruslan Alyev. Mwendesha-mashtaka ameiomba mahakama imhukumu Ndugu Ruslan kifungo cha nje cha miaka mitatu.

Ruslan Alyev

• Alizaliwa: 1987 (Chunoyar, Eneo la Krasnoyarsk)

• Maisha Yake: Familia yao ilihama mara kwa mara. Waliishi Azerbaijan na Ukrainia pia. Alifanya kazi akiwa mjenzi, mfanyabiashara, mwalimu wa gitaa, na mwalimu wa Kiingereza na Kichina. Anafurahia michezo na kuandika mashairi na muziki. Anazungumza lugha nne. Mke wake, Kristina, anaweza pia kuzungumza Kichina.

  Alianza kusoma na kujifunza Biblia alipokuwa na umri wa miaka 13. Kadiri alivyoendelea kujifunza, ndivyo alivyotambua kwamba Biblia ina majibu ya maswali yake yote kuhusu uhai. Alijiweka wakfu na kubatizwa mnamo 2006

Juni 6, 2019, kesi ya uhalifu ilifunguliwa dhidi ya Ndugu Ruslan Alyev na hivyo Juni 10, 2019 akawekwa mahabusu. Baada ya kuzuiliwa kwa saa 24, Ruslan pamoja na ndugu mwingine, Semyon Baybak, waliwekwa katika kifungo cha nyumbani. Mwanzoni, Ruslan alipaswa kuwekwa katika kifungo hicho kwa majuma manane, lakini muda huo umeongezwa mara tisa. Kwa sababu hiyo, amekuwa katika kifungo cha nyumbani kwa miezi 18. Akiwa katika kifungo hicho, Ruslan hawezi kuonana na mtu mwingine yeyote isipokuwa wakili wake, mpelelezi, ofisa wa polisi, na mke wake. Haruhusiwi kutumia Intaneti, wala kutuma au kupokea barua au ujumbe wa aina yoyote.

Ruslan anasema kwamba kabla ya kufungwa, yeye na mke wake, Kristina, mara nyingi walizungumzia jinsi mateso ya aina hiyo yangewapata hatimaye. Anasema hivi: “Tulijitahidi kudumisha ratiba nzuri ya mambo ya kiroho. Tulielewa ni mambo gani ambayo yanaweza kutupata tunapoteswa kupitia kusoma Vitabu vya Mwaka na masimulizi ya maisha ya ndugu zetu. Tuliona jinsi walivyotafuta mambo yaliyowachekesha na kuepuka kuvunjika moyo hata walipokabili hali ngumu sana.” Ruslan anaongezea hivi: “Tulimwomba Yehova atupe nguvu za kushughulika na hali ambazo tungekabili wakati ujao.”

Kuzungumza na wengine kuhusu mateso ambayo huenda yangetokea kulimsaidia Ruslan pia. “Nilifanya utafiti na kupata mambo mengi yenye kufariji kutoka katika Biblia na makala zenye kutia moyo ambazo zingewatuliza na kuwatia moyo wahubiri wengi kutanikoni. Kisha, nilipohitaji faraja, maandiko na makala zilezile ambazo nilikuwa nimepata na kukariri zilinitia moyo.”

Ruslan na Kristina wamenufaika kwa kujitayarisha kwa ajili ya mateso. Nyumba yao ilipokuwa ikifanyiwa msako, anasema hivi: “Nilikuwa mtulivu na ni kana kwamba sikuwa na wasiwasi wowote.” Wakati wa uchunguzi, mpelelezi alinitisha kwamba angemfungulia Kristina kesi ya uhalifu. Ruslan anasema hivi: “Mke wangu Kristina, hakuogopa kufunguliwa kesi ya uhalifu. Hilo lilinitia moyo sana na kuniimarisha.”

Kifungo cha nyumbani cha Ruslan kimetokeza changamoto nyingi. Licha ya hilo, Ruslan anasema hivi: “Sikuzote Yehova hutupatia tunachohitaji ili kutusaidia kuendelea kuwa hai na kudumisha hali nzuri ya kiroho na ya kihisia. Nilikuwa na uhakika atafanya hivyo. Kwa upande wetu, tulijifunza zamani kumtegemea na kuridhika na maisha rahisi. Kwa sababu hiyo, hatukuwa na mahangaiko yoyote.”

Pindi moja, wakati wa kesi ya kuendeleza muda wa kifungo cha nyumbani cha Ruslan, rafiki zake hawakuruhusiwa kuingia mahakamani. Lakini ndugu na dada zetu walikusanyika nje ya mahakama na kupiga makofi alipotoka nje, na wakasema kwa sauti kubwa: “Ruslan, tuko pamoja!”

Tunashukuru sana kwa mifano mizuri ya ndugu na dada zetu nchini Urusi. Ingawa wanateswa bila sababu, wanaendelea kumtumaini Yehova kikamili.​—Zaburi 118:6-9.