Agosti 19, 2021, Mahakama ya Wilaya ya Birobidzhan iliyo katika Eneo Lililotengewa Wayahudi ilimhukumu Dada Guzeva kifungo cha nje cha miezi 30.

Anastasiya Guzeva

• Alizaliwa: 1979 (Birobidzhan)

• Maisha Yake: Yeye na ndugu zake wawili walilelewa na mama yao ambaye hakuwa na mwenzi. Alipokuwa mtoto alifurahia kusoma, kujihusisha katika michezo, na kucheza dansi. Alipokuwa na umri wa miaka kumi alipata Biblia nyumbani kwa nyanya yake. Hilo lilimchochea kujifunza kumhusu Mungu. Baadaye, yeye na mama yake walijifunza Biblia na Mashahidi wa Yehova. Wote wawili walibatizwa mnamo 1995. Aliolewa na Konstantin mnamo 2001

Wenye mamlaka nchini Urusi walivamia nyumba ya Anastasiya na Konstantin katika mwezi wa Mei 2018. Julai 2019, Konstantin alishtakiwa kuwa mwenye “msimamo mkali,” naye Anastasiya akafunguliwa shtaka hilohilo mnamo Februari 2020. Jumla ya kesi 19 zimefunguliwa dhidi ya Mashahidi 23 katika Eneo Lililotengewa Wayahudi.

Mashtaka hayo ya uhalifu yameathiri sana maisha ya Anastasiya na Konstantin. Kwa kuwa wameshtakiwa kuwa wenye “msimamo mkali,” walilazimishwa kujiuzulu kutoka kwenye shule ya muziki ambapo walikuwa wakifanya kazi. Februari 2021 Konstantin alihukumiwa kifungo cha nje cha miaka miwili na nusu.

Anastasiya anaeleza jambo ambalo limemsaidia kuvumilia: “Ni afadhali kutambua kwamba utapatwa na mateso na kuwazia akilini jinsi utakavyotenda unapokabili hali ngumu. Kwa mfano, unaposoma kuhusu matukio ya siku ya mwisho ya Yesu duniani, ni wazi kwamba alikuwa amefikiria jinsi atakavyotenda atakapokamatwa, . . . ni wakati gani ambapo atazungumza, ni wakati gani ambapo atakaa kimya, na ni nini ambacho atasema.”

Anastasiya anasema kwamba sasa anatambua jinsi maneno ya Waroma 8:38, 39 yalivyo yenye kutia moyo sana. Anasema hivi: “Maneno hayo yanapaswa kutufanya tuwe na shangwe. Yehova na Yesu, ambao ndio wenye nguvu zaidi ulimwenguni, wananipenda, na hakuna yeyote anayeweza kuninyang’anya upendo huo. Kutambua hilo hunichochea kuvumilia na kuwa na ujasiri.”