Mahakama ya Wilaya ya Leninskiy ya Rostov-on-Don itatangaza hivi karibuni uamuzi katika kesi inayomhusu Dada Lyudmila Ponomarenko. a

Lyudmila Ponomarenko

• Alizaliwa: 1950 (Ola, Eneo la Magadan)

• Maisha Yake: Kabla ya kustaaafu, alifanya kazi akiwa fundi umeme katika kiwanda. Ana binti wawili na wajukuu wawili. Anapenda kusoma na kufuma. Anamtunza mume wake ambaye ana matatizo makubwa ya afya

• Kujifunza jina la kibinafsi la Muumba kulimfurahisha sana. Pia kujifunza kuhusu kusudi la Mungu kwa dunia na wanadamu kuligusa moyo wake. Alibatizwa na kuwa Shahidi wa Yehova mnamo 1998

Juni 6, 2019, kesi ya uhalifu ilifunguliwa dhidi ya Dada Lyudmila Ponomarenko. Ameshtakiwa kwa madai ya kwamba alifanya uhalifu kuruhusu shirika linalodaiwa kuwa lenye “msimamo mkali” kufanyia mikutano ya kidini nyumbani kwake na kwa kuwaeleza wengine ujumbe wa Biblia.

Lyudmila alitarajia kwamba atapatwa na mateso yanayowapata ndugu na dada wengine nchini Urusi. Anaeleza hivi: “Walipoanza kuwatesa ndugu na dada wanaoishi Moscow na pia ndugu na dada katika jiji la Taganrog, ilikuwa wazi kwangu kwamba baada ya muda mateso yatatupata sisi sote.”

Kwa sababu ya vizuizi vya COVID-19, Mashahidi wengine hawawezi kuwepo kesi inapoendeshwa ili kuandaa msaada na kitia-moyo. Lyudmila anasema hivi kuhusu hilo: “Mwanzoni nilikuwa na hofu kwa sababu ningekuwa peke yangu kesi inapoendeshwa, kwa hiyo, nilianza kuimba nyimbo za Ufalme kwa sauti ya chini na kusali kwa Yehova nilipokuwa njiani kwenda mahakamani. Nilitambua kwamba hilo lilinipa nguvu. Sina wasiwasi kesi inapoendelea mahakamani, na muda unaonekana kuwa unasonga upesi sana.”

Lyudmila anaeleza pia jinsi kesi yake inavyomwathiri mume wake na binti zake wawili ambao si Mashahidi wa Yehova. Anasema hivi: “Ni vigumu kwao kuelewa kwa nini nimeshtakiwa. Wana wasiwasi kwa sababu wanaona jinsi mateso hayo yanavyoathiri afya yangu. Lakini kadiri ambavyo muda umepita, washiriki wa familia yangu wameona kuwa [hali hii] ni upuuzi na [utegemezo wao] unanisaidia kuvumilia.”

Kuteswa hakujapunguza bidii yake. Anasema hivi: “Moyo wangu umejawa na shangwe kwa sababu sihitaji kuhofu mambo yanayonipata sasa hivi wala kuhofu mambo yatakayotokea hivi karibuni, kupatana na unabii wa Biblia. Uhusiano wangu na Yehova unazidi kuimarika. Sala zangu zimekuwa zenye maana zaidi, ndefu zaidi, na za kutoka moyoni.”

Tunajua kwamba Dada Ponomarenko ataendelea kupokea roho ya Yehova na baraka za kuwa “katika kivuli cha Mweza-Yote.”—Zaburi 91:1.