Juni 11, 2024, Dada Olga Ivanova aliachiliwa kutoka katika gereza lililo jijini Zelenokumsk, Urusi. Oktoba 25, 2021, Olga alihukumiwa kifungo cha miaka mitatu na miezi sita gerezani. Kwa kuwa alikuwa katika kifungo cha nyumbani kwa zaidi ya mwaka mmoja na miezi minne kabla ya kupelekewa gerezani, amemaliza kutumikia kifungo chake. Mume wake, Yevgeniy, alihukumiwa kifungo cha miaka minane gerezani katika kesi hiyohiyo, naye anaendelea kutumikia kifungo chake.

Mara nyingi Olga alipokuwa gerezani, alipewa kazi ngumu za mikono ambazo alipaswa kufanya siku 6 kila juma kwa saa 12. Pia, alihamishwa mara kadhaa na kupelekwa magereza mbalimbali nchini Urusi. Kwa sababu hiyo, Svetlana mama yake, ambaye ni mjane, hakuweza kumtembelea na kumtegemeza. Svetlana alieleza jinsi alivyoona msaada wa Yehova: “Kila mara binti yangu alipohamishiwa jiji lingine, ndugu na dada wa jiji hilo walimwandalia mahitaji yake kwa upendo. Walisimama kwenye mistari kwa saa nyingi ili kumpelekea chakula na mahitaji mengine, nao walijaribu kumwona hali iliporuhusu. Kwa kuongezea, nilipoweza kumtembelea, huwa nilifikia kwa akina ndugu na hata walinipa msaada wowote niliohitaji. Niliguswa moyo sana!”

Tunamshukuru Yehova kwa kumtunza Olga alipokuwa gerezani. Ingawa tunashangilia kwamba ameachiliwa huru, tunaendelea kusali kwa ajili ya mume wake pamoja na wengine wote walio gerezani, tuna uhakika kwamba Yehova ataendelea kuwaonyesha upendo wake mshikamanifu.​—Mwanzo 39:21.