Machi 31, 2021, Mahakama ya Wilaya ya Birobidzhan iliyo katika Eneo Lililotengewa Wayahudi ilimhukumu Dada Tatyana Zagulina kifungo cha nje cha miaka miwili na miezi sita.

Tatyana Zagulina

• Alizaliwa: 1984 (Kijiji cha Selektsionnaya, Eneo la Trans-Baikal)

• Maisha Yake: Alijifunza kushona nguo za mitindo. Alifanya kazi ya kutengeneza kucha na akiwa fundi-cherehani, hasa akishona nguo za harusi. Anapenda kucheza mpira wa wavu, mpira wa tenisi unaochezwa juu ya meza, kucheza dansi, na kufuma

  Sikuzote amependa kutazama vitu vya asili na anaamini kwamba uhai uliumbwa. Hilo lilimwongoza hatimaye kujifunza Biblia na Mashahidi wa Yehova. Alibatizwa mwaka wa 2010. Alifunga ndoa na Dmitriy mnamo 2012

Mei 17, 2018, maofisa 150 wa usalama walivamia nyumba 22 za Mashahidi wa Yehova. Wenye mamlaka walisema jina la uvamizi huo lilikuwa “Siku ya Hukumu.” Tangu wakati huo, ofisi ya mpelelezi wa eneo hilo imefungua mashtaka ya uhalifu dhidi ya ndugu na dada 22 katika eneo hilo. Februari 6, 2020, mashtaka ya uhalifu yalifunguliwa dhidi ya akina dada sita, kutia ndani Tatyana, kwa sababu ya kushiriki katika utendaji unaodaiwa kuwa wenye “msimamo mkali.”

Kesi ya uhalifu ya Tatyana ilianza kusikilizwa Septemba 17, 2020. Anaposubiri uamuzi, wenye mamlaka wamemzuia kusafiri nje ya eneo lao na wamemzuia asipate pesa zozote kwenye akaunti yake ya benki.

Tatyana anasema kwamba sala na ratiba nzuri ya kiroho ndizo zimemsaidia kuvumilia, kuendelea kuhubiri, na kutetea imani yake. Anasema hivi: “Wenye mamlaka walipokuja, niliogopa walipobisha mlango kwa kishindo, lakini nikasali mara moja. Baada ya hapo nilijihisi nikiwa mtulivu zaidi.”

Kwa mfano, walipokuwa wakipekua nyumba yake, alimwambia ofisa mmoja kwamba matukio ya siku hiyo yaliimarisha imani yake zaidi. Ofisa huyo alipomuuliza sababu, alimwambia anahisi anatimiza maneno ya Yesu kwenye Yohana 15:20 ambapo alisema hivi: “Mtumwa si mkuu kuliko bwana wake. Ikiwa wamenitesa mimi, watawatesa ninyi pia.” Anaendelea kusema hivi: “Ofisa mmoja akamjibu na kusema, ‘Jinsi unavyozungumza sasa, unanifanya nijihisi kama mmoja wa watu waliomtundika Yesu kwenye mti wa mateso.’ Wakati huo, mbali tu na kuhisi kwamba imani yangu imeimarishwa, nilihisi pia amani na shangwe moyoni. Ningeweza kuhisi Yehova alikuwa hapohapo kando yangu!” Kesi yake ilipoanza, aliogopa mahakama hiyo kidogo. Lakini baada ya kusali kuomba ujasiri, anaelezea hivi, “Sasa ninazungumza kwa uhakika.”

Tunamshukuru Yehova kwa kusaidia na kubariki ‘kazi ya uaminifu, kazi ngumu ya upendo, na uvumilivu’ wa ndugu na dada zetu wapendwa nchini Urusi.—1 Wathesalonike 1:2, 3.