JUNI 28, 2024
URUSI

Dada Watatu Wahukumiwa Katika Jamhuri ya Kalmykia, Nchini Urusi

CHEZA

Juni 24, 2024, Mahakama ya Jiji la Elista iliyo katika Jamhuri ya Kalmykia iliwahukumu Dada Tsagan Khalgaeva, Dada Yekaterina Menkova, na Dada Kishta Tutinova. Tsagan na Yekaterina walihukumiwa kifungo cha nje cha miaka miwili kila mmoja. Kishta alihukumiwa kifungo cha nje cha miaka mitatu. Hawahitaji kwenda gerezani wakati huu.

Maelezo Mafupi Kuwahusu

Tsagan Khalgaeva

Alizaliwa: 1978 (Lagan, Jamhuri ya Kalmykia)

Maisha Yake: Alifanya kazi akiwa fundi wa kushona nguo

Alitafuta majibu ya maswali yake katika dini mbalimbali. Alianza kujifunza Biblia na Mashahidi wa Yehova na akapata majibu yenye kuridhisha katika Biblia

Alibatizwa mwaka wa 2004

Maelezo ya Kibinafsi

Ni nini kilichokusaidia kukabiliana na hali hii ngumu?

Ninathamini sana sala ambazo ndugu na dada walisali kwa niaba yangu. Pindi fulani ninapovunjika moyo, ninahisi kwamba jambo pekee ninaloweza kufanya ni kusali kwa Yehova. Si rahisi mara kwa mara kupata maneno yanayofaa ya kutaja katika sala. Lakini ninajua kwamba wengine pia wanasali kwa ajili yangu, na kwa kweli, ninaona jinsi Yehova anavyojibu sala hizo. Jambo hilo hunichochea kusali hata zaidi kwa ajili ya wengine. Kwa kweli inafariji sana kuwategemeza wengine, hilo hunikumbusha kwamba sote tunakabiliana na hali hii pamoja.

Yekaterina Menkova

Alizaliwa: 1982 (Tavn-Gashun, Jamhuri ya Kalmykia)

Maisha Yake: Alifanya kazi akiwa msaidizi wa maabara

Alifunga ndoa mwaka wa 2009. Ana mwana mmoja

Alivutiwa sana kuona jinsi Mashahidi wa Yehova wanavyoishi kupatana na Biblia na jinsi ambavyo kutumia kanuni za Biblia kumeboresha maisha yake. Alibatizwa mwaka wa 2017

Maelezo ya Kibinafsi

Ni mistari gani ya Biblia ambayo imejenga uhakika wako katika Yehova?

Nilitiwa moyo sana na maneno ya Zaburi 8:3, 4 inayosema: “Ninapoziona mbingu zako, kazi za vidole vyako, Mwezi na nyota ambazo umetayarisha, Mwanadamu anayeweza kufa ni nini hivi kwamba unamweka akilini, Na mwana wa mtu hivi kwamba unamtunza?” Biblia inaonyesha kwamba, Yehova aliweza kuumba ulimwengu wote mzima na kila kitu kilichomo kwa kutumia tu vidole vyake. Kufikiria kuhusu hilo kunanihakikishia kwamba kwa msaada wa Yehova sihitaji kuogopa chochote.

Kishta Tutinova

Alizaliwa: 1961 (Novolesnoy, Eneo la Astrakhan)

Maisha Yake: Alifanya kazi ya kushona nguo. Aliwalea wana wake wawili akiwa peke yake

Anatoka katika familia ya Wabudha. Mteja wake mmoja ambaye ni Shahidi wa Yehova alimsaidia kujifunza kuhusu Biblia. Kishta alifurahi sana kujifunza jinsi anavyoweza kumwabudu Mungu bila kushiriki katika mapokeo na ushirikina. Alibatizwa mwaka wa 2003

Maelezo ya Kibinafsi

Ni nini kimekusaidia kudumisha mtazamo mzuri?

Nilipokamatwa, nililazimika kukaa ndani kwa muda wa miezi minne. Ilikuwa changamoto kwa kuwa wakati huo nilikuwa nikitumia chumba kimoja na mwana wangu na familia yake. Tulikuwa watu saba ndani ya chumba hicho kimoja. Haikuwa rahisi kukaa ndani ya chumba kimoja bila kutoka nje, na hilo liliathiri afya yangu. Lakini kutafakari andiko la Methali 24:10 kulinisaidia sana. Andiko hilo linasema: “Ukivunjika moyo siku ya taabu, nguvu zako zitakuwa chache.” Nilitambua kwamba nilihitaji kuchagua kati ya kukazia fikira mambo mabaya na kukazia fikira mambo mazuri. Nilijikumbusha mfano wa Yosefu. Alipokuwa gerezani, hakuruhusu hali zake zimkasirishe. Hivyo niliamua kufikiria kuhusu mambo mazuri maishani mwangu, na hivyo nikafaulu kudumisha shangwe yangu.

Tunathamini sana mifano hiyo ya imani ya siku zetu. Na tunafurahi kujua kwamba Yehova anaona majaribu yote tunayokabili na atatuthawabisha kwa sababu ya uaminifu wetu.—Zaburi 37:18.

Mfuatano wa Matukio

Februari 16, 2023

Kesi ya uhalifu ilifunguliwa dhidi ya Kishta
Februari 28, 2023

Nyumba ilifanyiwa msako. Kishta alipelekwa mahabusu
Machi 1, 2023

Tsagan alifukuzwa kazi kwa kuwa watu wengi walijua kwamba alifunguliwa kesi ya uhalifu. Kishta aliachiliwa kutoka mahabusu na akazuiliwa kutoka nyumbani
Julai 21, 2023

Kishta aliruhusiwa kutoka nyumbani
Desemba 19, 2023

Kesi ya uhalifu ilifunguliwa dhidi ya Yekaterina na Tsagan. Wote wawili waliwekewa vizuizi vya kusafiri
Februari 9, 2024

Kishta aliwekewa vizuizi vya kusafiri
Aprili 1, 2024

Kesi ya uhalifu ilianza
Juni 24, 2024

Hukumu ya kifungo cha nje ilitolewa

Ona Pia

TAARIFA ZA HABARI

Wamefungwa kwa Sababu ya Imani Yao—Urusi

Mashahidi wa Yehova nchini Urusi wamefungwa gerezani kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI