SEPTEMBA 28, 2020
URUSI
Dada Yelena Barmakina Anakabili Mashtaka ya Uhalifu kwa Sababu ya Kusali na Kusoma Biblia Yake
Hukumu Inatarajiwa
Septemba 29, 2020, a Mahakama ya Wilaya ya Pervorechensky iliyo katika eneo la Vladivostok inapanga kutangaza hukumu yake dhidi ya Dada Yelena Barmakina. Anakabili kifungo cha nje cha miaka mitatu. Dada Barmakina anaposubiri hukumu yake, kesi nyingine dhidi ya mume wake Dmitriy, bado inaendelea.
Maelezo Mafupi Kumhusu
Yelena Barmakina
Tarehe ya Kuzaliwa: 1967 (Cherepanovo, Eneo la Novosibirsk)
Maisha Yake: Yeye ndiye anayewatunza wazazi wake waliozeeka na nyanya yake. Anaipenda kazi yake ya kupiga picha. Anafurahia kuogelea na matembezi
Alipoanza kujifunza Biblia na Mashahidi wa Yehova, alisadiki kwamba unabii mbalimbali uliotimia ni ushahidi wa kutosha kwamba Mungu ana nguvu. Imani iliimarika alipoona Yehova akijibu sala zake. Alifunga ndoa na mume wake, Dmitriy, mwaka wa 2003
Historia ya Kesi
Saa moja asubuhi, Julai 28, 2018, kikundi cha maofisa waliokuwa wamefunika nyuso zao, walivamia nyumba ya nyanya wa Dada Yelena Barmakina mwenye umri wa miaka 90. Dada Barmakina na mume wake, Dmitriy, walikuwa wakiishi naye ili kumtunza. Ndugu Barmakin alikamatwa na kuwekwa mahabusu. Wenye mamlaka walimtisha Dada Barmakina kwa kumwambia, “Zamu yako itafika!”
Baada ya mwaka mmoja, wenye mamlaka walizuia akaunti za benki za Dada Barmakina. Agosti 6, 2019, mpelelezi katika eneo hilo alifungua kesi ya uhalifu dhidi ya Dada Barmakina kwa sababu ya kusali, kusoma Biblia, na kutazama hotuba zinazotegemea Biblia. Mwanasheria wake aliomba mahakama ifute mashtaka hayo, kwa kuwa madai yao hayana msingi na mambo aliyofanya Dada Barmakina ni sehemu tu ya ibada. Hata hivyo, hakimu aliunga mkono madai ya mwendesha-mashtaka ya kwamba Dada Barmakina alijihusisha katika “shughuli zenye msimamo mkali” zilizopigwa marufuku na sheria za Urusi.
Dada Barmakina amepata mkazo wa kihisia na kimwili kutokana na kesi hiyo ya uhalifu. Hakuonana na mume wake kwa siku 447 kwa sababu alikuwa mahabusu. Pia, ni vigumu sana kwa Dada Barmakina kupata kazi kwa sababu anapaswa kuwa tayari muda wowote ili kuhudhuria kesi au kuhojiwa.
Kutokana na mambo tunayojifunza katika Biblia, hatushangai kwamba serikali ya Urusi inaendelea ‘kusukuma kwa nguvu’ ndugu na dada zetu ili kuvunja utimilifu wao. Hata hivyo, tunafarijika kujua kwamba Yehova ataendelea kuwa ‘mahali pao pa kujificha na nguvu zao.’—Zaburi 118:13, 14.
a Inaweza Kubadilishwa
Huenda Ukapenda Pia
TAARIFA ZA HABARI
Wamefungwa kwa Sababu ya Imani Yao—Urusi
Mashahidi wa Yehova nchini Urusi wamefungwa gerezani kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.