MEI 20, 2022
URUSI

Familia Zinavumilia Mateso Kwa Msaada wa Yehova

CHEZA

Mahakama ya Wilaya ya Sovietskiy iliyo katika jiji la Oryol itatangaza hivi karibuni uamuzi wake katika kesi inayowahusu Ndugu Vladimir Melnik, Ndugu Vladimir Piskarev, na Ndugu Artur Putintsev. Mwendesha-mashtaka bado hajatoa hukumu anayopendekeza.

Mfuatano wa Matukio

Desemba 8, 2020

Kesi ya uhalifu ilifunguliwa dhidi ya Ndugu Melnik, Ndugu Piskarev, na Ndugu Putintsev
Desemba 9, 2020

Maofisa wa usalama walipekua nyumba za familia nane za Mashahidi wa Yehova zilizo Oryol, kutia ndani nyumba za ndugu hao watatu. Ndugu hao watatu walipelekwa kizuizini
Desemba 11, 2020

Ndugu Melnik na Ndugu Piskarev walipelekwa mahabusu
Desemba 14, 2020

Ndugu Putintsev alipelekwa mahabusu
Januari 19, 2021

Wenye mamlaka walijulishwa kwamba Ndugu Piskarev alikuwa amezidiwa na ugonjwa lakini alikatazwa kumwona daktari na kupata matibabu
Januari 21, 2021

Ndugu Piskarev aliruhusiwa kutumia dawa alizoletewa na mke wake lakini bado alikatazwa kwenda hospitali
Juni 24, 2021

Ndugu Piskarev alichunguzwa kwenye hospitali na ikagunduliwa kwamba amepatwa na kiharusi. Licha ya hali yake mbaya ya afya alirudishwa mahabusu.
Oktoba 29, 2021

Mashtaka yalifunguliwa dhidi ya ndugu hao kwa kupanga utendaji wa shirika lenye msimamo mkali
Januari 31, 2022

Kesi ya uhalifu ilianza

Maelezo Mafupi Kuwahusu

Vladimir Melnik

Alizaliwa: 1965 (Donetsk, Ukrainia)

Maisha Yake: Alitumika jeshini. Baadaye alifanya kazi akiwa injinia

Alifunga ndoa na Irina mwaka 1987. Wana mabinti watatu. Mwana wao wa kiume alikufa mwaka 1991

Alilelewa katika familia ambayo haikuamini kwamba kuna Mungu. Yeye na mke wake walivutiwa na Biblia baada kujifunza kuhusu maisha ya Yesu. Alibatizwa mwaka 1992

Maelezo ya Kibinafsi ya Irina a, mke wa Vladimir

Vladimir anawasaidiaje wengine akiwa mahabusu?

Mimi na mabinti wetu tunanufaika na ibada ya familia [kupitia barua ambazo Vladimir anatuandikia]. Huwa anatuandalia mashairi, hadithi, mifano, michezo ya chemsha bongo, mafumbo ya kujaza maneno, na mistari ya Biblia.

Vladimir hata ameongoza funzo la Biblia na mfungwa mwingine. . . . Mfungwa huyo ambaye ni kijana, kwa sasa amehamishiwa mji tofauti. Vladimir ameniambia kwamba kijana huyo anashiriki pamoja na wafungwa wengine huko mambo ambayo amejifunza.

Vladimir Piskarev

Alizaliwa: 1956 (Karpinsk, Eneo la Sverdlovsk)

Maisha Yake: Amefanya kazi akiwa injinia. Alifunga ndoa na Tatyana mwaka 1976. Wana binti mmoja na mwana mmoja wa kiume. Kujifunza ukweli kumhusu Yesu kuliwachochea Vladimir na mke wake kujifunza Biblia pamoja na Mashahidi wa Yehova. Alibatizwa mwaka 1995

Maelezo ya Kibinafsi ya Tatyana b, mke wa Vladimir

Ni nini kinachomsaidia mume wako kuvumilia akiwa mahabusu?

Vladimir anapokutana na mtu mwenye maswali mengi anaona hilo kuwa baraka na kitia moyo. Anasema hivi: “Inafurahisha sana kuwa na mengi ya kufanya katika kazi ya Bwana—hata ukiwa mahabusu!” Hata awe wapi, kwa kawaida mume wangu anapenda kuimba nyimbo za Ufalme. Anapenda sana wimbo wenye kichwa “Tutaendelea Kuvumilia.” Wimbo huo unaimarisha imani yake na kumsaidia kubaki mwaminifu kwa Yehova. Mara nyingi ameniandikia barua na kutia humo maneno ya wimbo huo kama vile: “Basi tuvumilie./Tulinde imani./Kwa kuwa Atupenda./Tutavumilia hadi mwisho.”

Artur Putintsev

Alizaliwa: 1970 (Chita, Eneo la Trans-Baikal)

Maisha Yake: Ni mwana wa kwanza kati ya watoto sita. Amefanya kazi akiwa fundi umeme, mkulima, na dereva wa teksi. Alifunga ndoa na Lyudmila mwaka 1993. Alibatizwa mwaka 2005

Maelezo ya Kibinafsi ya Lyudmila c, mke wa Artur

Je, unakumbuka pindi ambayo Yehova amekusaidia kwa njia ya pekee?

Mume wangu alipokamatwa na kuwekwa kizuizini, mpelelezi alichukua vifaa vyetu vyote vya kielektroni kutia ndani simu zetu. Nilikuwa peke yangu [na nisingeweza kuwasiliana na yeyote.] Nilikuwa katika hali ya mshtuko, na nilisali kwa Yehova ili kuomba msaada. Nilimwomba anisaidie kupata njia ya kuwasiliana na akina ndugu ili niwaeleze kilichotokea. Punde tu baada ya gari lililomchukua Artur kuondoka, akina ndugu waliwasili. Walinitia moyo na kunipatia simu. Wamenitunza kwa mwaka mzima, na bado wanaendelea kunitunza. Ninajua kwamba Yehova hujibu sala kwa wakati unaofaa na kwamba anaelewa hisia zangu.

Licha ya kwamba familia hizo zimetenganishwa kwa muda, tunafarijika kujua kwamba hakuna chochote ambacho kimewatenganisha na upendo wa Yehova na ulinzi wake.—Waroma 8:38, 39.

a b c Kwa kuwa kwa sasa Ndugu Melnik, Ndugu Piskarev, na Ndugu Putintsev wako mahabusu, hatukuweza kupata maelezo kutoka kwao.

Huenda Ukapenda Pia

TAARIFA ZA HABARI

Wamefungwa kwa Sababu ya Imani Yao—Urusi

Mashahidi wa Yehova nchini Urusi wamefungwa gerezani kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI