MEI 30, 2023 | HABARI ZIMEONGEZWA: Machi 6, 2024
URUSI

HABARI ZA KARIBUNI—APIGWA FAINI | Ndugu Huko Teykovo Wakazia Fikira Msaada wa Yehova

CHEZA

Februari 29, 2024, Mahakama ya Wilaya ya Teykovskiy iliyo katika Eneo la Ivanovo iliwahukumu Ndugu Sergey Galyamin, Ndugu Anatoliy Lyamo, Ndugu Vladimir Spivak, na Ndugu Aleksandr Vasichkin. Kila ndugu alitozwa faini. Vladimir alitozwa faini ya rubo 600,000 (dola 6,564 za Marekani), Sergey alitozwa faini ya rubo 650,000 (dola 7,111 za Marekani) na Aleksandr na Anatoliy walitozwa faini ya rubo 1,100,000 kila mmoja (dola 12,034 za Marekani).

Maelezo Mafupi Kuwahusu

Sergey Galyamin

Alizaliwa: 1967 (Teykovo, Eneo la Ivanovo)

Maisha Yake: Anamiliki na kuendesha duka la kurekebisha viatu

Alifunga ndoa na Lyudmila mwaka wa 1991. Wana mabinti watatu

Alishangaa sana kujifunza Mungu ana jina. Alihudhuria mkutano wa Mashahidi wa Yehova na walimtendea kwa fadhili. Jambo hilo lilimsadikishia kwamba amepata kweli. Sergey alibatizwa mwaka wa 2001 na Lyudmila mwaka wa 2002

Maelezo ya Kibinafsi

Umejifunza somo gani muhimu kupitia hali hii ngumu?

Niliposikia kwa mara ya kwanza jinsi ndugu na dada zetu wanavyotendewa, nilikasirika sana. Kisha nikaanza kuhofia mambo yatakayonipata. Nilikumbushwa maneno ya Zaburi 73:26: “Mwili wangu na moyo wangu unaweza kudhoofika, lakini Mungu ni mwamba wa moyo wangu.” Hicho ndicho kikumbusho nilichohitaji. Nilitambua kwamba kukasirika na kuwazia mambo mabaya ambayo huenda yangetokea, hakungenisaidia hata kidogo. Jambo la hekima zaidi ninaloweza kufanya ni kuendelea kuimarisha uhusiano wangu na Yehova na kumtegemea kikamili.

Anatoliy Lyamo

Alizaliwa: 1963 (Pogar, Eneo la Bryansk)

Maisha Yake: Alifanya kazi ya ujenzi wa reli za chini ya ardhi

Alifunga ndoa na Galina mwaka wa 1993. Wana watoto wawili na wajukuu wawili

Alikuwa akitafuta kweli na alivutiwa na hekima ya Biblia. Anatoliy alibatizwa mwaka wa 1995 na Galina mwaka wa 1997

Maelezo ya Kibinafsi

Familia yako ya kiroho imekutegemeza jinsi gani?

Sasa ninawathamini hata zaidi ndugu na dada zangu. Kwa kweli, maneno hayatoshi kuelezea jinsi ambavyo Yehova amewatumia ndugu na dada kunisaidia. Katika kipindi hiki chote cha uchunguzi na hata kesi yenyewe, Yehova ameitunza familia yangu kupitia fadhili ambayo akina ndugu na dada wameonyesha. Isitoshe, ndugu na dada huja mahakamani ili kunitegemeza, na kufanya hivyo kunahitaji ujasiri mwingi. Kila siku, ninapata jumbe kutoka kwa akina ndugu zinazosema kwamba wanasali kwa ajili yangu na familia yangu. Mambo hayo yamenichochea kuwasaidia wengine ambao pia wanakabili majaribu.

Vladimir Spivak

Alizaliwa: 1955 (Litin, Ukrainia)

Maisha Yake: Alikuwa mwanajeshi kabla ya kuwa Shahidi wa Yehova

Alifunga ndoa na Nellie mwaka wa 1979. Nellie ndiye aliyejifunza Biblia kwanza. Walihudhuria kusanyiko la Mashahidi wa Yehova pamoja mwaka wa 1992. Vladimir alivutiwa sana na mambo ambayo alijionea na kusikia. Nellie alibatizwa mwaka wa 1994 na Vladimir mwaka wa 1997

Maelezo ya Kibinafsi

Ni nini kinachokusaidia kushinda hisia za kuvunjika moyo?

Mojawapo ya mambo ninayotamani sana ni kuhudhuria makusanyiko tena. Na si hilo tu, nimewekewa vizuizi vingine pia. Wakati mwingine mambo hayo hunimaliza nguvu na kunivunja moyo. Lakini ninajua kwamba siko peke yangu. Yehova na ndugu na dada zangu wapendwa wako tayari kunisaidia daima. Ninaamini kwamba sikuzote Yehova atanitegemeza, atanilinda, na kunisaidia kuvumilia majaribu.

Aleksandr Vasichkin

Alizaliwa: 1969 (Bryansk, Eneo la Bryansk)

Maisha Yake: Alikuwa mwanajeshi kabla ya kuwa Shahidi wa Yehova. Hivi karibuni amekuwa akifanya kazi ya kutunza bustani

Alifunga ndoa na Nataliya mwaka wa 1993. Wana watoto wawili

Alivutiwa sana na jinsi alivyotendewa kwa fadhili alipohudhuria mikutano ya Mashahidi wa Yehova. Wote wawili, yaani, yeye na mke wake walianza kujifunza Biblia. Nataliya alibatizwa mwaka wa 1994 na Aleksandr mwaka wa 1995

Maelezo ya Kibinafsi

Ni nini kinachokusaidia usiwe na wasiwasi kupita kiasi kuhusu majaribu unayopitia?

Nimetambua kwamba ninapoanza kujihurumia, huo ndio wakati ninapovunjika moyo hata zaidi. Badala ya kujihurumia, ninakazia fikira pendeleo kubwa la kutoa ushahidi kumhusu Yehova. Vilevile, mimi hujikumbusha kwamba mambo ninayokabili sasa ni ukurasa mmoja tu katika hadithi ya maisha yangu, yaani, ni ya muda tu. Hivi karibuni, ukurasa huu utaisha, matatizo yangu yatakoma. Nikibaki mwaminifu, nitafurahia uhusiano wangu na Yehova na uhusiano wangu pamoja na ndugu na dada zangu milele.

Tunajua kwamba majaribu yoyote yale tutakayopata katika mfumo huu ni ya muda tu yakilinganishwa na baraka za milele ambazo Yehova amewawekea watumishi wake waaminifu.—2 Wakorintho 4:17, 18.

Mfuatano wa Matukio

Aprili 10, 2020

Kesi ya uhalifu yafunguliwa
Aprili 11, 2020

Nyumba zafanyiwa msako
Aprili 16, 2020

Akina ndugu wawekewa vizuizi vya kusafiri
Februari 2, 2023

Kesi ya uhalifu yaanza

Huenda Ukapenda Pia

TAARIFA ZA HABARI

Wamefungwa kwa Sababu ya Imani Yao—Urusi

Mashahidi wa Yehova nchini Urusi wamefungwa gerezani kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI