JANUARI 17, 2023| HABARI ZILIONGEZWA: APRILI 17, 2023
URUSI

HABARI ZA KARIBUNI—DADA AHUKUMIWA | “Yehova Yuko Karibu na Mimi Kila Wakati”

CHEZA

Aprili 17, 2023, Mahakama ya Metallurgicheskiy iliyo katika Wilaya ya Chelyabinsk ilimhukumu Dada Olga Zhelavskaya kifungo cha nje cha miaka miwili. Hatahitaji kwenda gerezani wakati huu.

Maelezo Mafupi Kumhusu

Olga Zhelavskaya

Alizaliwa: 1962 (Potapovo, Eneo la Chelyabinsk)

Maisha Yake: Alifanya kazi ya udumishaji wa lifti

Aliwafahamu Mashahidi wa Yehova kupitia rafiki yake aliyekuwa ameanza kusoma Biblia. Alipata majibu ya maswali aliyokuwa nayo kuhusu kifo na kuwepo kwa Mungu. Alibatizwa mwaka wa 2012

Maelezo ya Kibinafsi

Ni simulizi gani la Biblia ambalo limekutia moyo?

Muda mfupi kabla ya kesi yangu kusikilizwa, ndugu mmoja alinitia moyo kufikiria mfano wa nabii Yona na mambo aliyopitia ambayo yalionyeshwa kwenye drama yenye kichwa Simulizi la Yona—Somo Kuhusu Ujasiri na Rehema. Yona aliogopa sana kutangaza ujumbe wa Yehova wa hukumu kwa Waninawi. Mwanzoni, alipoingia katika jiji hilo, alitangaza ujumbe huo kwa sauti ndogo. Hata hivyo, baadaye alipata ujasiri. Simulizi hilo lilinitia moyo sana. Nimetambua kwamba changamoto hizi zimeimarisha imani na uvumilivu wangu. Simulizi hilo linanikumbusha kwamba Yehova yuko karibu na mimi kila wakati na sihitaji kuogopa chochote.

Tuna uhakika kwamba hata tukikabili mateso ya aina gani, watumishi wa Yehova ‘hawatatikiswa kamwe’ kwa sababu anawategemeza kwa upendo.—Zaburi 16:8.

Mfuatano wa Matukio

Juni 16, 2018

Wenye mamlaka waliweka vifaa vya kurekodi video na sauti katika nyumba ya Olga ili kufuatilia utendaji wake
Machi 26, 2019

Nyumba yake ilifanyiwa msako kwa sababu ya uchunguzi uliokuwa unafanywa katika kesi ya Ndugu Vladimir Suvorov
Agosti 31, 2021

Kesi ya uhalifu ilifunguliwa. Alishtakiwa kwa madai ya kuunga mkono utendaji wa shirika lenye msimamo mkali kwa kufanya mikutano ya shirika hilo nyumbani mwake
Oktoba 22, 2021

Alipatwa na ugonjwa wa kiharusi na kulazwa hospitalini
Septemba 28, 2022

Kesi ya uhalifu ilianza

Ona Pia

TAARIFA ZA HABARI

Wamefungwa kwa Sababu ya Imani Yao—Urusi

Mashahidi wa Yehova nchini Urusi wamefungwa gerezani kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI