SEPTEMBA 14, 2023 | HABARI ZIMEONGEZWA: SEPTEMBA 22, 2023
URUSI

HABARI ZA KARIBUNI—DADA WAMEFUNGWA | Dada Watatu Wanaimarishwa na Sala

CHEZA

Septemba 21, 2023, Mahakama ya Wilaya ya Zeya katika Eneo la Amur ilimhukumu Dada Margarita Moiseyenko kifungo cha nje cha miaka mitatu, Dada Galina Yatsik kifungo cha nje cha miaka miwili, na Dada Yelena Yatsyk kifungo cha nje cha miaka miwili na nusu. Hawahitaji kwenda gerezani wakati huu.

Maelezo Mafupi Kuwahusu

Margarita Moiseyenko

Alizaliwa: 1978 (Krasnoyarsk, Eneo la Krasnoyarsk)

Maisha Yake: Anafanya kazi akiwa fundi wa nguo. Alifunga ndoa na Konstantin mwaka wa 1998. Julai 14, 2021, Konstantin alihukumiwa kifungo cha nje cha miaka sita

Alianza kujifunza Biblia alipokuwa na umri wa miaka 18 baada ya mtu wa ukoo wa karibu kufa. Alibatizwa na kuwa Shahidi wa Yehova mwaka wa 2001

Maelezo ya Kibinafsi

Ni nini kinachokusaidia kudumisha uvumilivu?

Ninakumbuka kusikia andiko la Methali 21:31 likizungumziwa kwenye Kusanyiko la Eneo la 2018 lenye kichwa “Uwe Jasiri”! Mstari huo unasema: “Farasi hutayarishwa kwa ajili ya siku ya vita, lakini wokovu ni wa Yehova.” Kwa kawaida farasi ni waoga. Ili kuwasaidia wasiogope wakati wa vita, lazima ‘watayarishwe’ au kuzoezwa. Hilo linatuhusu sisi pia. Hatuzaliwi tukiwa na imani na ujasiri. Lazima tujitayarishe kwa ajili ya vita tutakavyokabili kwa kusitawisha sifa hizo. Ili kufanya hivyo, ninatambua jinsi ilivyo muhimu kujilisha kiroho, kujifunza Biblia kwa kina, na kusali kwamba hata nini kitendeke, imani yangu haitatikisika.

Galina Yatsik a

Alizaliwa: 1950 (Zeya)

Maisha Yake: Alifanya kazi akiwa mkaguzi wa ugharama katika idara ya jiji ya ujenzi na udumishaji. Sasa amestaafu

Alifunga ndoa na Valeriy mwaka wa 1971. Walikuwa na binti mmoja na mwana mmoja. Mume wake alikufa mwaka wa 1995

Alilelewa akiamini kwamba hakuna Mungu lakini sikuzote alijiuliza kuhusu chanzo cha uhai. Alianza kusoma magazeti ya Mnara wa Mlinzi na Amkeni! na kuhudhuria mikutano. Alipata uthibitisho wenye kusadikisha kwamba kuna Muumba. Alibatizwa mwaka wa 1994

Maelezo ya Kibinafsi

Umejifunza nini kuhusu nguvu za sala wakati wa kipindi hiki kigumu?

Nimejifunza kwamba ni muhimu sana kutoa sala fupi unapokabili hali zisizotarajiwa. Hilo hunisaidia kutuliza hisia zangu na kutenda kwa njia inayofaa. Pia, inapendeza kujua kwamba wengine wanasali kwa ajili yangu. Yakobo 5:16 inasema: “Dua ya mtu mwadilifu ina nguvu nyingi.” Ninatambua kwamba sala ambazo wengine wanatoa kwa ajili yangu zinanisaidia kudumisha amani ya moyoni na kunifanya nisiwe na woga. Sala zangu na pia za wengine, ni kama mashua inayonisaidia kuendelea kuelea.

Yelena Yatsyk

Alizaliwa: 1972 (Zeya)

Maisha Yake: Yeye ni fundi wa nguo

Alifunga ndoa na Andrey mwaka wa 1994. Wana binti mmoja

Mama ya Yelena na ndugu yake mdogo, Yevgeniy Bitusov, ndio walioanza kujifunza Biblia na Mashahidi wa Yehova. Yelena alitambua umuhimu wa kutumia kanuni za Biblia na kujionea jinsi kuzitumia kulivyoboresha maisha yake. Alibatizwa mwaka wa 1997

Maelezo ya Kibinafsi

Mateso hayo yamekuathiri kwa njia gani?

Uhusiano wangu na Mungu umeimarishwa. Ninasali kwa Yehova anisaidie kuwa mtulivu, na nimejionea akinisaidia kupata amani ya moyoni. Pia uthamini wangu kuelekea ndugu na dada zangu umeongezeka. Inafariji kujua kwamba wako tayari kuja kunisaidia. Ninahisi kabisa kwamba mimi ni sehemu ya familia kubwa. Pia, nimetambua zaidi umuhimu wa kusali kwa ajili ya wale ambao wako gerezani, kama vile ndugu yangu Yevgeniy. Ninasali kwa ajili yao kila siku.

Mambo ambayo dada zetu wamekabili yanatukumbusha kwamba Yehova husikiliza sala zetu naye atatusaidia kusitawisha sifa tunazohitaji ili kukabiliana na jaribu lolote.—1 Yohana 5:14.

Mfuatano wa Matukio

Machi 21, 2019

Nyumba ya akina Moiseyenkos yafanyiwa upekuzi
Oktoba 13, 2020

Nyumba ya Yelena na Galina zafanyiwa upekuzi
Novemba 22, 2021

Kesi ya uhalifu yafunguliwa
Februari 15, 2022

Anawekewa vizuizi vya kusafiri
Aprili 24, 2023

Kesi ya uhalifu yaanza

a Dada Galina Yatsik na Dada Yelena Yatsyk hawana uhusiano wa ukoo.

Ona Pia

TAARIFA ZA HABARI

Wamefungwa kwa Sababu ya Imani Yao—Urusi

Mashahidi wa Yehova nchini Urusi wamefungwa gerezani kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI