JANUARI 28, 2022
URUSI

HABARI ZA KARIBUNI | Dada Anna Safronova Amehukumiwa Kifungo cha Miaka Sita

Hukumu Kali na Ndefu Zaidi Kupewa Dada Tangu Marufuku ya 2017

CHEZA

Aprili 14, 2022, Mahakama ya Eneo la Astrakhan ilikataa rufaa ya Dada Anna Safronova. Ataendelea kukaa gerezani.

Januari 25, 2022, Mahakama ya Wilaya ya Trusovskiy katika Eneo la Astrakhan ilimhukumu Anna, mwenye umri wa miaka 56, kifungo cha miaka sita gerezani. Alipelekwa kizuizini mara moja.

Mfuatano wa Matukio

Mei 28, 2021

Kesi ya uhalifu ilianzishwa
Juni 2, 2021

Wenye mamlaka walifanya upekuzi katika nyumba anayoishi na mama yake mwenye umri wa miaka 81. Anna aliwekwa kizuizini
Juni 3, 2021

Aliachiliwa kutoka mahabusu na kuwekwa katika kifungo cha nyumbani. Alizuiwa asiondoke nyumbani kwake isipokuwa tu kwenda matembezi kwa saa moja kwa siku, kuanzia saa 3:00 asubuhi hadi saa 4:00 asubuhi
Juni 10, 2021

Aliongezwa kwenye orodha ya watu wenye msimamo mkali na akaunti zake za benki zikafungwa
Januari 24, 2022

Katika maelezo yake ya kumalizia mahakamani alisema hivi: “Yesu aliwafundisha wafuasi wake katika Mathayo 5:44 ‘wawapende adui zao na kusali kwa ajili ya wale wanaowatesa.’ Kwa nini? Kwa sababu kuna mifano mingi ya watu waliokuwa wakiwatesa lakini baadaye wakawa waabudu wa Yehova.

“Ninatumaini kwamba angalau ofisa mmoja wa FSB, mpelelezi, mlinzi, wakili, au yeyote anayenisikia na kuona tabia zangu atabadili mtazamo wake kuelekea Mashahidi wa Yehova . . . Huenda angalau mtu mmoja atataka kusoma Biblia, atafute majibu ya maswali, na kusitawisha tamaa ya kumjua Mungu, au hata kuwa mtumishi wake.”
Januari 25, 2022

Alishtakiwa na kuhukumiwa miaka sita gerezani

Maelezo Mafupi Kumhusu

Anna Safronova

Alizaliwa: 1965 (Volgograd, Eneo la Volgograd)

Maisha Yake: Alipokuwa mtoto, alijifunza muziki na kuimba katika kwaya. Alifanya kazi akiwa injinia. Mume wake alikufa mwana wake alipokuwa na umri wa miaka 11. Anamtunza mama yake aliyezeeka

Anapenda kutengeneza kadi zilizo na michoro na kuwaandikia rafiki zake mashairi

Alisikia kuhusu kweli baada ya mama yake kuanza kujifunza Biblia na Mashahidi wa Yehova. Ujumbe wa Biblia kwamba Mungu atawafanya watu wa mataifa yote waishi kwa umoja uligusa moyo wake. Alibatizwa mwaka wa 1996

Maelezo ya Kibinafsi a

Umepata msaada gani wakati wa kipindi hiki kigumu?

Nimepata utegemezo mwingi sana kutoka kwa ndugu na dada zangu. . . . Wananitumia mimi na mama yangu ujumbe wenye kutia moyo, kadi za kielektroni, na video.

Kadi moja ambayo nilipewa ilikuwa yenye kuimarisha. Kadi hiyo ilisema hivi: “Anayesimama mbele yako si muhimu. Yule anayesimama nyuma yako ndiye muhimu.”

[Hilo lilinikumbusha andiko] ambalo limekuwa likinitegemeza . . . Isaya 12:2 inasema: “Mungu ni wokovu wangu. Nitamtumaini nami sitaogopa; kwa maana Yah Yehova ni nguvu zangu na uwezo wangu, naye amekuwa wokovu wangu.” . . . Ninajua kwamba hata ikiwa nitakabili hali ngumu zaidi wakati ujao, ushindi utakuwa wa Yehova.

Umejifunza mambo gani kutokana hali hii?

[Nimejifunza] kudumisha usawaziko . . . Hakuna faida ya kuzingatia kupita kiasi matatizo yanayoweza kutokea. Hilo litakufanya tu ushuke moyo na kutokeza woga bandia na uliopita kiasi unaoweza kunilemaza na kuninyima tamaa ya kuendelea kumtumikia Yehova. Anaandaa msaada kwa wakati unaofaa kabisa. [Kujua jambo hilo] kunaimarisha imani yangu na kunanisaidia kuendelea kusitawisha uhusiano wa karibu na Rafiki yangu anayetegemeka zaidi, Yehova.

Tunatiwa moyo na mifano ya uaminifu ya ndugu na dada zetu nchini Urusi na Crimea tunapoendelea kumtegemea Baba yetu wa mbinguni ili tupate nguvu za kuvumilia.—2 Wathesalonike 1:4.

a Alihojiwa kabla ya kuhukumiwa.

Huenda Ukapenda Pia

TAARIFA ZA HABARI

Wamefungwa kwa Sababu ya Imani Yao—Urusi

Mashahidi wa Yehova nchini Urusi wamefungwa gerezani kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI