JUNI 7, 2022 | HABARI ZILIONGEZWA: APRILI 3, 2023
URUSI

HABARI ZA KARIBUNI—HUKUMU YA GEREZANI | Kumtegemea Yehova Kunawasaidia Akina Ndugu Kuvumilia

CHEZA

Machi 31, 2023, Mahakama ya Wilaya ya Babushkinskiy ya Moscow iliwahukumu Ndugu Ivan Chaykovskiy, Ndugu Yuriy Chernyshev, Ndugu Vitaliy Komarov, na Ndugu Sergey Shatalov vifungo vya miaka sita na miezi mitatu gerezani. Ndugu Vardan Zakaryan alihukumiwa kifungo cha miaka minne na miezi mitatu gerezani. Walipelekwa gerezani moja kwa moja kutoka mahakamani.

Mfuatano wa Matukio

Novemba 24, 2020

Maofisa wa polisi nchini Urusi walivamia nyumba 20 hivi za Mashahidi wa Yehova jijini Moscow. Maofisa hao waliwapeleka kizuizini Ivan, Yuriy, Vitaliy, na Sergey na kila mmoja akafungiwa katika chumba tofauti cha gereza. Wanahabari walikuwepo wakati nyumba ya Yuriy ilipokuwa ikipekuliwa na yeye na familia yake kuhojiwa. Baadaye habari walizokusanya zilionyeshwa kwenye vituo vya televisheni vinavyomilikiwa na Serikali
Novemba 26, 2020

Sergey aliachiliwa kutoka kizuizini na kuwekwa chini ya kifungo cha nyumbani. Vardan, aliyekuwa amelazwa hospitalini kwa sababu ya majeraha aliyopata wakati wa uvamizi huo, alipelekwa mahabusu na kuwekwa kwenye chumba cha gereza akiwa ametengwa na wengine
Novemba 27, 2020

Mahakama iliwaachilia Ivan, Yuriy, na Vitaliy kutoka kizuizini na kuwaweka chini ya kifungo cha nyumbani
Novemba 30, 2020

Wenye mamlaka walimwachilia Vardan kutoka mahabusu na wakamweka chini ya kifungo cha nyumbani. Baada ya hayo, Vardan alituma malalamiko kwenye ofisi ya mwendesha-mashtaka kuhusu jinsi maofisa walivyotumia mabavu kwa njia isiyo halali walipokuwa wakifanya upekuzi
Februari 16, 2022

Kesi ya uhalifu ilianza

Maelezo Mafupi Kuwahusu

Vitaliy Komarov

Alizaliwa: 1976 (Moscow)

Maisha Yake: Alikuwa mkurugenzi wa ofisi ya Moscow ya Shirika la Utangazaji la Urusi la Televisheni na Radio. Anapenda kufuga nyuki

Alifunga ndoa na Yelena mwaka wa 1999. Alisadiki kwamba Biblia ni sahihi kwa sababu sikuzote unabii wa Biblia hutimia. Alibatizwa mwaka wa 2003

Maelezo ya Kibinafsi

Umejifunza mambo gani kupitia majaribu haya?

Kabla tu ya wenye mamlaka kunizuilia, nilikuwa nimetazama tena video Vijana Huuliza—Nitayatumiaje Maisha Yangu? Nilifurahia sana sehemu iliyoonyesha ndugu mwenye umri mkubwa akimweleza kijana kuhusu somo ambalo alijifunza alipokuwa kwenye kambi ya mateso. Hakuhitaji vitu vingi. Akiwa tu na bakuli na kijiko chake, angeweza kula na kuishi. Niliona ukweli wa maneno hayo katika siku yangu ya pili kizuizini. Nilikuwa mahakamani siku nzima na nilirudi kwenye chumba changu cha gereza saa tatu za usiku na tayari muda wa kula ulikuwa umepita. Mfungwa mwenzangu alinipa kikombe chake, angalau niwaombe walinzi maji moto ili nitayarishe chai. Papo hapo nikakumbuka video niliyokuwa nimetazama. Katika kipindi hiki, kikombe cha chai kilikuwa muhimu zaidi kuliko gari au simu, vitu ambavyo hapo mwanzoni nilifikiri siwezi kuishi bila kuwa navyo.

Sergey Shatalov

Alizaliwa: 1969 (Stavropol, Eneo la Stavropol)

Maisha Yake: Akiwa kijana alipenda kucheza mpira wa tenisi unaochezwa juu ya meza, mpira wa wavu, na mchezo wa chesi. Alipokuwa akitumika katika jeshi la wanamaji, alijeruhiwa na akawa mlemavu. Anafanya kazi ya kusafirisha mizigo

Yeye na Yelena walifunga ndoa mwaka wa 1995 na wakabatizwa baadaye mwaka huo

Maelezo ya Kibinafsi

Ni nini kinachokuhakikishia kwamba Yehova atakusaidia kuendelea kuvumilia majaribu haya?

Nina uhakika kwamba Yehova Mungu anasikiliza sala ambazo ndugu na dada ulimwenguni pote wanatoa kwa ajili yangu. Nina uhakika huo ksi kwa sababu tu ya ujuzi wangu wa Biblia bali pia kwa sababu nina shangwe na amani moyoni.

Umesali kuhusu nini kihususa na jambo hilo limekusaidiaje?

Nimemwomba Mungu mara nyingi anisaidie niwe jasiri kama simba. Nikiwa jasiri, sitaogopa mtu yeyote au mambo yoyote mabaya ambayo huenda yakanipata. Pia ninasali kwa ajili ya ndugu zangu walio gerezani, kwa ajili ya familia zao, na pia kwa ajili ya wengine ambao, ingawa hawapo gerezani, wanakabili hali ngumu sana mara kwa mara.

Tunatiwa moyo tunapoona kwamba Yehova anaendelea kuwakaribia ndugu na dada zetu wapendwa pamoja na familia zao kwa sababu wanajitahidi sana kumkaribia.—Yakobo 4:8.

Huenda Ukapenda Pia

TAARIFA ZA HABARI

Wamefungwa kwa Sababu ya Imani Yao—Urusi

Mashahidi wa Yehova nchini Urusi wamefungwa gerezani kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI