MACHI 23, 2022 | HABARI ZIMEONGEZWA: JUNI 24, 2024
URUSI

HABARI ZA KARIBUNI—HUKUMU YA GEREZANI NA KIFUNGO CHA NJE | Yehova Anaendelea Kuwategemeza Ndugu na Dada Sita Waaminifu

CHEZA

Juni 20, 2024, Mahakama ya Wilaya ya Industrialniy iliyo katika Eneo la Khabarovsk iliwahukumu Dada Maya Karpushkina, Ndugu Stanislav Kim, Ndugu Nikolay Polevodov, Dada Svetlana Sedova, Ndugu Vitaliy Zhuk, na mke wake, Tatyana. Maya alihukumiwa kifungo cha nje cha miaka minne. Svetlana na Tatyana walipokea hukumu ya kifungo cha nje cha miaka mitano kila mmoja. Dada hao hawahitaji kwenda gerezani wakati huu. Stanislav alihukumiwa kifungo cha miaka minane na miezi miwili gerezani, Vitaliy alihukumiwa kifungo cha miaka minane na miezi minne, na Nikolay alihukumiwa kifungo cha miaka minane na miezi sita. Hivi ni vifungo virefu zaidi tangu marufuku iliyotangazwa mwaka wa 2017. Akina ndugu walipelekwa gerezani moja kwa moja kutoka mahakamani.

Mfuatano wa Matukio

Novemba 10, 2018

Wenye mamlaka walivuruga tafrija ya watu 55 hivi katika mkahawa. Watu wote waliohudhuria kutia ndani watoto walihojiwa, alama za vidole zikachukuliwa, na wakapigwa picha
Novemba 12, 2018

Stanislav, Nikolay, na Vitaliy walipelekwa mahabusu. Maya, Svetlana, na Tatyana waliwekewa vizuizi vya kusafiri
Januari 14, 2019

Nikolay na Vitaliy walitolewa mahabusu na kuwekwa katika kifungo cha nyumbani
Januari 29, 2019

Stanislav alitolewa mahabusu na kuwekwa katika kifungo cha nyumbani
Julai 18, 2019

Kesi hiyo iliwasilishwa kwenye Mahakama ya Wilaya ya Industrialniy iliyo katika Eneo la Khabarovsk
Agosti 2, 2019

Nikolay aliachiliwa kutoka kwenye kifungo cha nyumbani
Septemba 9, 2019

Kesi tofauti iliyowahusisha Stanislav na Nikolay iliwasilishwa kwenye Mahakama ya Zheleznodorozhniy iliyo katika Eneo la Khabarovsk
Novemba 5, 2019

Nikolay aliwekewa vizuizi vya kusafiri
Januari 18, 2020

Stanislav na Vitaliy waliachiliwa kutoka kwenye kifungo cha nyumbani
Februari 4, 2020

Stanislav na Nikolay walihukumiwa katika ile kesi tofauti kuwa wenye hatia. Mahama ya Wilaya ya Zheleznodorozhniy iliyo Khabarovsk iliwapa kila mmoja wao kifungo cha nje cha miaka miwili ili kuwachunguza tabia
Agosti 3, 2020

Kesi iliyokuwa katika Mahakama ya Wilaya ya Industrialniy ilirudishwa kwenye ofisi ya mwendesha-mashtaka. Basi mwendesha-mashtaka akaamua kukata rufaa
Septemba 29, 2020

Mahakama ya Eneo la Khabarovsk ilikubali rufaa ya mwendesha-mashtaka. Stanislav na Nikolay waliruhusiwa kujieleza mbele ya hakimu. Walisema kwamba kama vile tu mataifa mengine Shirikisho la Urusi limeahidi kutokiuka haki za raia wake na uhuru wao wa kuabudu
Oktoba 12, 2020

Mahakama ya Eneo la Khabarovsk iliunga mkono uamuzi wa Mahakama ya Wilaya ya Industrialniy na kurudisha kesi kwenye ofisi ya mwendesha-mashtaka
Desemba 15, 2021

Kesi iliwasilishwa tena kwenye Mahakama ya Wilaya ya Industrialniy

Maelezo Mafupi Kuwahusu

Stanislav Kim

Alizaliwa: 1968 (Khabarovsk, Eneo la Khabarovsk)

Maisha Yake: Alipokuwa mtoto alifurahia kuimba na kucheza chesi na drafti. Amefanya kazi akiwa mtafiti katika Wizara ya Mambo ya Ndani

Alikutana na Mashahidi wa Yehova baada ya kupata aksidenti mbaya. Kujifunza Biblia kulimsaidia kukabiliana na hali ya kushuka moyo. Alibatizwa mwaka 2004. Alifunga ndoa na Olesya mwaka 2008. Wana watoto wawili

Maelezo ya Kibinafsi

Ulichukua hatua gani kudumisha uhusiano wako na Yehova?

Nilipokuwa mahabusu sikuwa na Biblia, nilijaribu kukumbuka mistari kumi ya Biblia kila siku na kutafakari kuihusu. Niliweka malengo kuhusu sala zangu: Nilijaribu kutafuta mambo kumi kila siku ambayo ningemshukuru Mungu kwa kunitendea, na nilimwomba anifanyie mambo mengine kumi hususa. Nilimmiminia Yehova kabisa moyo wangu.

Nikolay Polevodov

Alizaliwa: 1970 (Khabarovsk, Eneo la Khabarovsk)

Maisha Yake: Alilewa katika familia ambayo si ya kidini. Anafanya kazi akiwa fundi umeme

Hakuamini kwamba kuna Mungu hadi alipopata uthibitisho kwamba Mungu yupo na kwamba Biblia inategemeka. Alibatizwa mwaka 1995. Baadaye alifunga ndoa na Tatyana. Wana mwana mmoja

Maelezo ya Kibinafsi

Ulipokuwa mahabusu, ulikuwa na wasiwasi gani, na ulifanya nini ili kushughulika na hali hiyo?

Nilikuwa na wasiwasi kuhusu jinsi ya kumtia moyo mwanangu ambaye alikuwa na umri wa miaka kumi tu wakati huo. . . . Mimi [pamoja na mke wangu] tulipanga programu ya Ibada ya Familia kila juma. Nyakati nyingine, nilitayarisha michezo ya kutafuta maneno na kuyaunganisha, nilichora picha, au kutengeneza chati. Wakati mwingine, ningechagua mada fulani na kubuni maswali ambayo tungetumia ili kujadili mada hiyo. Kisha nilituma habari hizo nyumbani kila juma.

Ni nini kilichokuhakikishia kwamba Yehova anakutegemeza katika kipindi hiki kigumu?

Kwa kawaida, walinzi walikuja kutukagua kila asubuhi. Siku mmoja, mlinzi mmoja alinijia na kunipa kitabu na kuniambia: “Wewe unamwamini Mungu, sivyo? Soma hiki.” Kisha mwanamke huyo akageuka na kuondoka. Nilipoangalia kitabu alichonipa, niliona kwamba ni Biblia Takatifu—Tafsiri ya Ulimwengu Mpya! . . . Muda wote ambao nilikuwa mahabusu nilifaulu kusoma tafsiri bora kabisa ya Neno la Mungu.

Svetlana Sedova

Alizaliwa: 1969 (Komsomolsk-on-Amur, Eneo la Khabarovsk)

Maisha Yake: Baba yake alikufa Svetlana akiwa na umri wa miaka 3, na mama yake alikufa Svetlana akiwa na miaka 14. Alifanya kazi katika kiwanda cha kutengeneza nguo. Sasa anafanya kazi ya kutunza nyumba za watu. Anapenda kupanda maua. Mume wake alikufa watoto wao wakiwa wadogo, na hivyo akabeba jukumu la kuwatunza wanawe wawili na binti yake pia

Alipokuwa tineja, alitambua kwamba sayari yetu na ulimwengu mzima ziliumbwa na mtu mwenye hekima. Alibatizwa mwaka 1984

Maelezo ya Kibinafsi

Umesali kuhusu nini katika kipindi hiki kigumu?

Nimemwomba Yehova aniimarishe na pia ndugu na dada wote ambao wanapitia majaribu na mateso ambayo mimi ninapitia. Bila msaada wa Mungu hatuwezi kuvumilia mikazo inayotokana na ulimwengu wa Shetani.

Nimekuwa na uhakika zaidi kwamba Yehova yuko upande wangu siku zote. Neno lake linasema: “Kwa mtu mshikamanifu unatenda kwa ushikamanifu.”—2 Samweli 22:26.

Tatyana Zhuk

Alizaliwa: 1973 (Khabarovsk, Eneo la Khabarovsk)

Maisha Yake: Alifanya kazi akiwa mwalimu wa chekechea na sasa anafanya kazi ya kutunza nyumba za watu.

Akiwa na umri wa miaka 19, alivutiwa sana na Biblia. Biblia ilimsaidia kupata majibu ya maswali yake kuhusu uhai. Alibatizwa mwaka 1994. Alifunga ndoa na Vitaliy mwaka 1994.

Maelezo ya Kibinafsi

Ulifauluje kubaki mtulivu wakati wa majaribu?

Akina ndugu, na hata mume wangu, wamenisaidia nisifikiri kuhusu matatizo ambayo tutakabili katika ulimwengu huu, badala yake nikazie fikira jinsi mambo yatakavyokuwa katika ulimwengu mpya. . . . Jambo hilo lilinisaidia sana.

Singewahi kuwazia kwamba Yehova angenipatia utulivu kama huo. . . . Walipokuwa wakifanya msako nyumbani kwetu, ofisa mmoja aliuliza: “Kwa nini huna wasiwasi? Kwani ulikuwa unatazamia tutakuja?” Hakujua tu jinsi maswali yake yalivyonifurahisha!

Vitaliy Zhuk

Alizaliwa: 1972 (Khabarovsk, Eneo la Khabarovsk)

Maisha Yake: Anafanya kazi ya kuchomelea vyuma

Alipokuwa na umri wa miaka 20, alianza kufikiria kuhusu kusudi la uhai. Alipokuwa akitafuta kweli alianza kujifunza Biblia na Mashahidi wa Yehova, akapata majibu ya kuridhisha sana ya maswali yake. Alibatizwa mwaka 1994. Alifunga ndoa na Tatyana baadaye mwaka huo

Maelezo ya Kibinafsi

Umejifunza mambo gani kutokana na majaribu uliyopitia?

Nimejifunza kumtegemea Yehova badala ya kufikiria mambo yote mabaya ambayo huenda yakatokea wakati ujao. Mara nyingi, mambo tunayowazia hayatokei. . . . Pia, nimejifunza kuwathamini zaidi akina ndugu na dada. Kuna zaidi ya akina ndugu na dada milioni nane ulimwenguni pote na wapo karibu na sisi kuliko tunavyofikiri. Wako tayari kututegemeza kwa sala zao, maneno yenye kutia moyo, na matendo yao ya fadhili.

Tunajua kwamba Yehova ataendelea kuwategemeza ndugu na dada hawa wapendwa na wengine wengi ambao wanafanyiza ‘wingu kubwa la mashahidi.’—Waebrania 12:1.

Huenda Ukapenda Pia

TAARIFA ZA HABARI

Wamefungwa kwa Sababu ya Imani Yao—Urusi

Mashahidi wa Yehova nchini Urusi wamefungwa gerezani kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI