DESEMBA 23, 2021
URUSI

HABARI ZA KARIBUNI— HUKUMU YAFUTWA | Maandalizi ya Yehova Yanaipa Amani Familia ya Postnikov

CHEZA

Oktoba 11, 2022, Mahakama ya Eneo Lililotengewa Wayahudi ilipindua uamuzi wa hukumu iliyotolewa dhidi ya Ndugu Oleg Postnikov na Dada Agnessa Postnikova. Kesi yao itasikilizwa upya.

Aprili 25, 2022, Mahakama ya Jiji la Birobidzhan katika Eneo Lililotengewa Wayahudiilimhukumu Oleg kifungo cha nje cha miaka mitano na nusu na Agnessa miaka mitano. Hawahitaji kwenda gerezani wakati huu.

Mfuatano wa Matukio

Februari 12, 2021

FSB ilianzisha kesi ya uhalifu dhidi ya Agnessa. Familia ya Postnikov ilishtakiwa kwamba imeanzisha kikundi cha “wahalifu” na kwamba wanawatangazia wengine malengo yenye “msimamo mkali” ya kikundi hicho. Oleg na Agnessa wamekatazwa kuondoka eneo hilo, akaunti zao za benki zimezuiwa, na majina yao yameongezwa kwenye orodha ya Urusi ya magaidi
Februari 12, 2020

FSB ilianzisha kesi ya uhalifu dhidi ya Oleg

Maelezo Mafupi Kuwahusu

Oleg Postnikov

Alizaliwa: 1965 (Vyazemsky, Eneo la Khabarovsk)

Maisha Yake: Amewahi kufanya kazi akiwa fundi-bomba. Alipokuwa kijana alijiunga na genge. Alifungwa kwa sababu ya uhalifu. Alianza kujifunza Biblia akiwa gerezani. Baada ya kuachiliwa, alibatizwa akawa Shahidi wa Yehova mwaka wa 1986

Mwaka wa 1989, alifunga ndoa na Agnessa. Wana watoto wawili wenye umri mkubwa

Maelezo ya Kibinafsi

Ulijifunzaje ukweli huko gerezani?

Kuna Shahidi aliyekuwa amefungwa kwa sababu ya kukataa kutumikia jeshini. . . . Tulizungumza kwa muda mrefu kuhusu uthibitisho wa kwamba Mungu yupo na pia makosa yaliyo katika nadharia ya mageuzi. Pia tulizungumza kuhusu utata na ubunifu wa vitu mbalimbali ulimwenguni. Mazungumzo hayo yaligeuza kabisa kufikiri kwangu. . . . Baadaye, nilisoma machapisho kadhaa ya Mashahidi wa Yehova. . . . Baada ya kuachiliwa, niliendelea kujifunza na nikabatizwa.

Umejifunza nini kuhusu kumtumaini Yehova?

Nilianza kusali zaidi, hasa nilipokuwa nikihojiwa na mpelelezi. Nilipokutana na mpelelezi mara kadhaa, niliona kwamba uwezo wangu na hekima yangu haikutosha kukabiliana na njia zenye udanganyifu na hila alizotumia ili kujaribu kunifanya nikane imani yangu. Nilitambua kwamba ikiwa ningependa kuwa mtulivu na mwenye uhakika nilihitaji kumtumaini kabisa Yehova na kutokuwa na wasiwasi kupita kiasi kuhusu mambo ambayo huenda yangetokea.

Je, kuna andiko lolote ambalo limekutia moyo?

Mara nyingi ninafikiria kuhusu maneno yaliyo kwenye Yoshua 1:9: “Mimi Yehova Mungu wako nipo pamoja nawe mahali popote utakapoenda.” Maneno hayo yananikumbusha kwamba huenda nikalazimika kuenda mahali ambapo singependa. Hata hivyo, Yehova ananifariji, ni kana kwamba ananiambia: ‘Nitaenda huko pamoja nawe, usiogope. Kama tu nilivyoenda pamoja [na wanaume waaminifu kama] Yosefu, nitaenda pamoja nawe pia.’ Maneno hayo yananisaidia nisiwe na wasiwasi kuhusu mambo ambayo huenda yakatukia kesho. Pia, yananisaidia kudhibiti mawazo yenye kuvunja moyo.

Agnessa Postnikova

Alizaliwa: 1963 (Kazakhstan)

Maisha yake: Alikuwa wa tano kati ya watoto saba. Akiwa kijana alifurahia kucheza dansi na kwenda sinema. Pia, alipenda kuteleza kwenye theluji na barafu. Sasa anapenda kuwa mashambani, kutunza maua, na kwenda matembezi. Aliwahi kufanya kazi kwenye duka la kushona nguo

Alibatizwa mwaka wa 1979. Alifunga ndoa na Oleg mwaka wa 1989

Maelezo ya Kibinafsi

Umepata utegemezo gani katika kipindi hiki kigumu?

Ningependa kushukuru sana Baraza Linaloongoza kwa kuandaa chakula cha kiroho kwa wakati unaofaa. Pia, ningependa kuwashukuru ndugu na dada wote wanaosaidia katika kutengeza nyimbo, filamu, video, makusanyiko, na tafsiri mpya za Biblia. Ninamshukuru Yehova kwa sababu nina familia nzuri na changamfu ambayo inaniimarisha katika kipindi hiki kigumu.

Umefurahia zaidi maandalizi gani hususa kutoka kwa Yehova?

Ninapata msaada ninaposali kwa Yehova na kutafakari nyimbo kama vile, ‘Ulimwengu Mpya’ na ‘Paradiso Ipo Karibu Sana.’ Nyimbo hizo zinaeleza kuhusu ulimwengu mpya. Zinanituliza na kunifanya nihisi kwamba Yehova ananipenda.

Masimulizi hayo yanathibitisha hata zaidi kwamba Yehova amewatayarisha watu wake ili waweze kubaki waaminifu licha ya majaribu mbalimbali. Sote na tuendelee kutegemea ‘upendo mshikamanifu wa Yehova na uaminifu wake.’—Zaburi 115:1

Huenda Ukapenda Pia

TAARIFA ZA HABARI

Wamefungwa kwa Sababu ya Imani Yao—Urusi

Mashahidi wa Yehova nchini Urusi wamefungwa gerezani kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI