AGOSTI 20, 2021 | HABARI ZILIZOONGEZWA: NOVEMBA 28, 2022
URUSI

HABARI ZA KARIBUNI—HUKUMU YATANGAZWA | Ndugu Watatu na Dada Mmoja Huko Dagestan Wapokea Utegemezo wa Yehova Wakiwa Kizuizini

CHEZA

Novemba 24, 2022, Mahakama ya Wilaya ya Kirovskiy iliyo Makhachkala imewahukumu Ndugu Marat Abdulgalimov, Ndugu Arsen Abdullaev, Ndugu Anton Dergalev, na Dada Mariya Karpova. Kila mmoja amepewa kifungo cha nje cha miaka sita au miaka sita na nusu. Hawahitaji kwenda gerezani wakati huu.

Mfuatano wa Matukio

Mei 27, 2020

Baada ya siku 362, Marat, Arsen, Anton, na Mariya walihamishwa kutoka mahabusu kwenda kifungo cha nyumbani
Juni 4, 2019

Mahakama ya Wilaya ya Sovetskiy huko Makhachkala iliwaweka wote mahabusu
Juni 1, 2019

Maofisa wa FSB, yaani, polisi wa siri wa Urusi, walivamia nyumba 13 za Mashahidi wa Yehova katika eneo lote la Dagestan
Mei 27, 2019

Ofisi ya FSB katika eneo la Dagestan ilifungua kesi ya uhalifu dhidi ya Marat, Arsen, Anton, na Mariya

Maelezo Mafupi Kuwahusu

Marat Abdulgalimov

Alizaliwa: 1991 (Makhachkala, Jamhuri ya Dagestan)

Maisha Yake: Amezaliwa katika familia ya watoto wanne. Anapenda kucheza mpira. Amesomea kazi ya kuchomelea vyuma na hivi karibuni alifanya kazi katika duka la viatu

Tangu alipokuwa na umri mdogo, alipenda kusoma Biblia. Alivutiwa na watu wanaomwiga Kristo na wanaowapenda jirani zao. Alibatizwa na kuwa Shahidi wa Yehova mwaka wa 2013

Maelezo ya Kibinafsi

Ni nini kilichokusaidia kuvumilia kwa karibu mwaka mmoja mahabusu?

Nilitafakari hali yangu na kuilinganisha na ya Yosefu. Kifungo cha juu zaidi ambacho ningeweza kufungwa ni miaka kumi. Lakini Yosefu alikuwa gerezani kwa miaka 13. Kwa hiyo, kwa msaada wa Yehova mimi pia ninaweza kuendelea kuwa mwaminifu licha ya hali yangu. Nilipoona jinsi Yehova alivyojibu sala zangu, nilianza kumtupia mizigo yangu yote. Zaburi 55:22 ilinisaidia kuvumilia jaribu hili. Andiko hilo linaahidi kwamba nikimtupia Yehova mizigo yangu, atanitegemeza. Kwa hiyo, hivyo ndivyo nilivyofanya.

Arsen Abdullaev

Alizaliwa: 1979 (Kasumkent, Jamhuri ya Dagestan)

Maelezo Yake: Tangu alipokuwa kijana, alipenda kucheza mpira wa wavu na kusoma vitabu. Alipata digrii ya kutengeneza divai. Hivi karibuni alifanya kazi ya kukarabati mifumo ya joto na ya maji

Ingawa mwanzoni wazazi wake walimpinga, Arsen alibatizwa na kuwa Shahidi wa Yehova mwaka wa 2000. Alifunga ndoa na Suat. Wana mwana mchanga

Maelezo ya Kibinafsi

Ulishindaje mambo yenye kuvunja moyo ulipokuwa kizuizini?

Nyimbo zetu zilinisaidia sana. Zilinifanya nijihisi vizuri. Mara nyingi niliimba mwenyewe. Ninaupenda sana Wimbo 45, “Kutafakari kwa Moyo Wangu.” Bila shaka, kuna pindi ambazo nilivunjika moyo, nilichoshwa na kila kitu, nilikasirika, na sikutaka kufanya jambo lolote. Hata hivyo, nilijaribu sana nisiruhusu hisia hizo ziendelee kwa zaidi ya siku moja. Katika pindi hizo, nilijiambia: ‘Utaamka kesho na kila kitu kitakuwa sawa. Hisia hizo zitapita. Jipe nguvu, familia yako inakuhitaji, na pia ndugu na dada zako wanakuhitaji.’

Anton Dergalev

Alizaliwa: 1985 (Rostov-on-Don, Eneo la Rostov)

Maisha Yake: Mama ya Anton alimlea yeye pamoja na ndugu yake akiwa peke yake. Mama yake na nyanya (bibi) yake walimfundisha kupenda kanuni za Biblia. Alifanya kazi akiwa fundi-umeme na msanifu-bustani. Alibatizwa na kuwa Shahidi wa Yehova mwaka wa 2002

Maelezo ya Kibinafsi

Yehova amekutegemezaje wakati wa jaribu hili?

Ndugu na dada wametia jitihada nyingi ili kututunza. Mmoja wa wale niliofungwa nao alisema kwamba baada ya miezi michache nitaacha kupokea barua kutoka kwa rafiki zangu. Alishangaa kuona kwamba ziliendelea kuja zikiwa na mahitaji mengine hata baada ya miezi sita na pia baada ya karibu mwaka mzima!

Ni mapendekezo gani ambayo ungependa kuwapa wengine ili wajitayarishe kwa ajili ya mateso ambayo huenda wakapata?

Ushauri wangu ni kwamba wasiache kukutana. Ninaikosa sana mikutano. Tumia kila nafasi ambayo Yehova anaandaa. Dumisha hali yako ya kiroho na usiogope jambo lolote. Sikuzote Yehova yuko upande wako!

Mariya Karpova

Alizaliwa: 1980 (Magadan, Eneo la Magadan)

Maelezo Yake: Ana ndugu wawili. Anapenda kuteleza kwenye theluji, kusafiri, na kusoma. Alihitimu na kupata digrii ya kuwatibu wanyama

Alipata majibu yenye kuridhisha kuhusu wakati ujao katika Biblia, naye akaamua kuwa Shahidi wa Yehova. Alibatizwa mwaka wa 1998

Maelezo ya Kibinafsi

Ni nini kilichokusaidia usilemewe na wasiwasi ulipokuwa mahabusu?

Nilikumbuka mistari mingi ya Biblia na kuiandika katika kitabu changu. Mistari hiyo iliniimarisha katika miezi mitatu ambayo sikuwa na Biblia. Wafilipi 4:6, 7 ilinitia moyo sana. Jambo fulani jipya lenye kuhangaisha lilipotokea, nilifungua kitabu changu, nikaangalia mstari huo na kujiambia: ‘Usihangaike kuhusiana na jambo lolote.’ Baada ya hapo nilijihisi vizuri.

Ni nini kilichokusadikisha kwamba Yehova amekuwa akikusaidia katika kipindi hicho kigumu?

Njia moja aliyonisaidia ni kukabiliana na kifo cha baba yangu [nilipokuwa mahabusu]. Nilipata habari hizo kutoka kwa mama yangu na si kutoka kwa mtu mwingine nisiyemjua, kwa sababu mpelelezi aliniruhusu nizungumze naye kwenye simu. Pia, rafiki zangu wa karibu walichukua sehemu yangu na kumtegemeza mama yangu. Walisafiri ili wakawe pamoja naye na kumsaidia wakati wa mazishi. Pia, akina ndugu na dada hawakumsahau mama yangu. Walimpigia simu, wakamwandikia barua, wakamtumia kadi, na kumwandalia msaada wa kusafiri ili awepo kila mara kesi yangu ilipokuwa ikisikilizwa.

Tuna uhakika kamili kwamba sikuzote Yehova Mungu atakuwa kile kinachohitajika ili kuwalinda na kuwategemeza watu wake kama jina lake linavyomaanisha.—Kutoka 3:14.

Huenda Ukapenda Pia

TAARIFA ZA HABARI

Wamefungwa kwa Sababu ya Imani Yao—Urusi

Mashahidi wa Yehova nchini Urusi wamefungwa gerezani kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI