JANUARI 31, 2022 | HABARI ZILIONGEZWA: MACHI 27, 2023
URUSI

HABARI ZA KARIBUNI—KIFUNGO CHAPUNGUZWA | Dada Lyudmila Salikova Anapata Nguvu na Faraja Katika Yehova

CHEZA

Machi 23, 2023, Mahakama ya Eneo la Chelyabinsk ilitangaza uamuzi wake baada ya Dada Lyudmila Salikova kukata rufaa kwa mara ya pili. Mahakama hiyo ilipunguza urefu wa kifungo chake cha nje kutoka miaka sita hadi miaka miwili na nusu. Hatahitaji kwenda gerezani wakati huu.

Machi 17, 2022, Mahakama ya Eneo la Chelyabinsk ilikataa ombi la rufaa la Lyudmila.

Januari 20, 2022, Mahakama ya Jiji la Snezhinsk katika Eneo la Chelyabinsk ilimhukumu Lyudmila kifungo cha nje cha miaka sita.

Mfuatano wa Matukio

Novemba 2020

Maofisa wa usalama katika jiji la Snezhinsk walifanya upekuzi katika nyumba za familia nne za Mashahidi wa Yehova, kutia ndani nyumba ya Lyudmila. Pia, maofisa walifanya upekuzi katika eneo lake la kazi. Kwa sababu hiyo, alilazimishwa kujiuzulu kazini
Agosti 26, 2021

Kesi ya uhalifu ilifunguliwa dhidi ya Lyudmila kwa sababu ya kupanga shughuli za shirika la kidini lililopigwa marufuku na kuingiza nchini machapisho yaliyopigwa marufuku
Desemba 8, 2021

Kesi yake ya uhalifu ilianza

Maelezo Mafupi Kumhusu

Lyudmila Salikova

Alizaliwa: 1951 (Sysert)

Maisha Yake: Aliolewa mwaka wa 1971. Alilea wana watatu. Mume wake alikufa mnamo 2009. Alifanya kazi katika idara ya nishati ya jiji la Snezhinsk. Anafurahia kusafiri

Dada yake mkubwa alianza kujifunza Biblia mwaka wa 1999. Miezi sita baadaye, Lyudmila alijiunga naye. Alipata maelezo yenye kuridhisha kuhusu kusudi la uhai na kwa nini kuna ukosefu wa haki, jeuri, na vita. Alibatizwa mwaka wa 2002

Maelezo ya Kibinafsi

Majaribu haya yameboreshaje uhusiano wako na Yehova?

Kabla ya matukio hayo, mara nyingi nilijichambua na kuhisi kwamba Yehova hakunithamini . . . Sasa kufikiri kwangu kumebadilika, na imekuwa rahisi kwangu kujihakikishia kwamba hali haiko hivyo. Pia, kujionea jinsi ambavyo amenipa pendeleo la kulitakasa jina lake mbele ya mahakama hapa Snezhinsk, kumenifanya nitambue kwamba Yehova ananipenda na kuniamini. Ninaona hali yoyote ambayo Yehova anaruhusu inipate kuwa nafasi ya kumwonyesha kwamba ana sababu nzuri ya kuniamini.

Je, kuna jambo lenye kutia moyo ambalo ndugu au dada alikuambia ambalo limekusaidia kuvumilia?

Kabla ya kesi yangu kusikilizwa kwa mara ya kwanza, nilikuwa na wasiwasi mwingi . . . Nilisali hivi: “. . . Tafadhali nipe roho yako takatifu. Ninakusihi, Yehova!” Muda mfupi baada ya hapo, nilipokea ujumbe wa simu kutoka kwa dada mmoja. Ulisema hivi: “. . . Jaribu la imani ni kama mashine ya kufua nguo. ‘Inatuzungusha, inatugeuza, inatupindua, kisha inatukamua.’ Baada ya hapo, tunatoka tukiwa watu safi na bora kuliko tulivyokuwa. Upekuzi wote, kuhojiwa, na kufanyiwa upelelezi ‘kumekukamua na kukupindua’ ndani na nje. Hata hivyo, mahangaiko na changamoto zote hizo zimekufanya uwe wenye thamani zaidi machoni pa Yehova na machoni petu pia . . . Tuna uhakika kwamba kesho asubuhi hutakuwa tu mahakamani bali pia utakuwa katika mikono yenye nguvu ya Yehova.” Nilihisi kwamba kwa kuwa Yehova alijua hali niliyokuwa nikikabili, alimtumia dada huyo mpendwa kueleza jinsi anavyohisi kunielekea.

Ndugu na dada zetu nchini Urusi wanaendelea kupata nguvu na faraja kutoka kwa Yehova. Mungu wetu mwenye upendo anatuhakikishia kwamba atawatendea “haki mayatima na wale wanaopondwa, ili mwanadamu anayeweza kufa ambaye ni mavumbi asiwaogopeshe tena.”—Zaburi 10:18.

Huenda Ukapenda Pia

TAARIFA ZA HABARI

Wamefungwa kwa Sababu ya Imani Yao—Urusi

Mashahidi wa Yehova nchini Urusi wamefungwa gerezani kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI