NOVEMBA 1, 2021 | HABARI ZILIONGEZWA: APRILI 27, 2023
URUSI

HABARI ZA KARIBUNI—NDUGU AFUNGWA | Ndugu Dmitriy Barmakin Adumisha Shangwe Yake Licha ya Kuwa Mahabusu kwa Muda Mrefu

CHEZA

Aprili 27, 2023, Mahakama ya Wilaya ya Pervorechenskiy iliyo Vladivostok katika Eneo la Primorye ilimhukumu Ndugu Dmitriy Barmakin kifungo cha miaka nane gerezani. Alipelekwa gerezani moja kwa moja kutoka mahakamani.

Aprili 8, 2022, Mahakama ya Eneo la Primorye ilibadili uamuzi uliokuwa umetolewa wa kumwondolea hatia Dmitriy. Kesi yake itaanza kusikilizwa upya.

Mfuatano wa Matukio

Novemba 22, 2021, Mahakama ya Wilaya ya Pervorechenskiy iliyo Vladivostok katika Eneo la Primorye, ilitangaza kwamba Dmitriy hana hatia na ikamwondolea mashtaka yote ya uhalifu. Hii ndio mara ya kwanza mahakama ya Urusi imetangaza kwamba Shahidi wa Yehova hana hatia chini ya kifungu cha 282.2(1) cha Sheria ya Uhalifu ya Urusi (kuhusu kupanga utendaji wa shirika lenye msimamo mkali). Mahakama itamwondolea vizuizi vyote alivyokuwa amewekewa. Hukumu hiyo itatekelezwa Desemba 3, 2021, ikiwa ofisi ya mwendesha-mashtaka haitakata rufaa
Aprili 20, 2021

Kesi ya uhalifu ilianza kusikilizwa tena
Desemba 18, 2020

Kesi ya uhalifu ilirudishwa kwa mwendesha-mashtaka kwa sababu ya ukosefu wa ushahidi wa kutosha. Vizuizi kuhusu utendaji wake bado viliendelea kuwepo
Oktoba 18, 2019

Baada ya siku 447, Dmitriy aliachiliwa lakini akawekewa vizuizi vikali vya utendaji wake. Mahakama iliongeza mara kumi muda wa Dmitriy kuzuiliwa mahabusu
Julai 28, 2018

Saa 1:00 asubuhi Julai 28, 2018, kikundi cha wanaume waliokuwa na silaha na waliofunika nyuso zao waliingia kwa nguvu katika nyumba ambayo Dmitriy na Yelena walikuwa wakimtunzia nyanya ya Yelena mwenye umri wa miaka 90. Dmitriy na Yelena walirudishwa katika jiji la nyumbani kwao lililoko umbali wa kilomita 177 huko Vladivostok. Dmitriy alikamatwa na kuwekwa mahabusu mara moja
Julai 27, 2018

Kesi ya uhalifu ilifunguliwa dhidi ya Ndugu Dmitriy Barmakin
Oktoba 2017

Mwanamke mwenye umri wa miaka 30 ambaye ni mfanyakazi wa Idara ya Usalama wa Taifa (FSB) alijifanya kuwa anapendezwa kujifunza Biblia. Alirekodi kisiri video ya mazungumzo yake akiwa na ndugu na dada mbalimbali

Maelezo Mafupi Kumhusu

Dmitriy Barmakin

Alizaliwa: 1974 (Alushta, Crimea)

Maisha Yake: Mama yake alikufa alipokuwa na umri wa miaka kumi. Alisomea kazi ya upishi na baadaye utaalamu wa kutayarisha programu za kompyuta. Alifunga ndoa na Yelena mwaka wa 2006. Wanapenda kusafiri na kupiga picha wanyama-mwitu

Alinunua Biblia yake ya kwanza alipokuwa darasa la nane. Alivutiwa na ushauri unaofaa ulio katika Maandiko. Hatimaye, alijifunza Biblia na Mashahidi wa Yehova. Alibatizwa mwaka wa 1994

Maelezo ya Kibinafsi

Ulifauluje kutanguliza mambo ya kiroho ulipokamatwa?

Nilikuwa nimezoea kusoma Biblia kila siku kabla ya kuwekwa mahabusu. Ukweli ni kwamba huko mahabusu, kwa kuwa mara nyingi hakuna kitu kinachoendelea mchana, unapata muda mwingi wa kutafakari kwa kina. Akili hukumbuka na kutafakari mambo ambayo umetia ndani yake. Haiwezi kukaa tu bila kufikiri. Na ikiwa hujaijaza mambo ya kiroho mapema, basi itakuwa vigumu kuendelea kuwa mwaminifu.

Ni sifa gani iliyokusaidia kuvumilia muda huo uliokamatwa?

Yehova alinipa shangwe kwa kuwa nilisali kuhusu hilo mara nyingi, na wengine wangeweza kuona nina shangwe. Asubuhi walinzi walipokuwa wakiita majina yetu, mlinzi mmoja aliniuliza: “Barmakin, kwa nini siku zote unatabasamu?” Nilimjibu: “Nina furaha na ndiyo sababu ninatabasamu.” Mlinzi huyo akaniuliza, “Unafurahi kwamba wewe ni mfungwa?” Nikamjibu: “Hapana! Sikuzote mimi ni mtu mwenye furaha, na kufungwa hakuwezi kunizuia kuwa na furaha.” Jambo lenye kustaajabisha ni kwamba hata sikutambua nilikuwa nikitabasamu. Tabasamu ilikuja yenyewe.

Umeazimia kufanya nini hata mahakama ikifanya uamuzi wa kukufunga?

Ninaelewa kwamba Mungu anaruhusu hali hii itukie ili jina lake litukuzwe. Ingawa maadui wetu watajaribu kuwaogopesha watumishi wa Yehova na kujaribu kuzuia kazi ya kuhubiri, ninaweza kuona jinsi maoni ya mahakimu, wafanyakazi mahakamani, na waendesha-mashtaka yanavyozidi kubadilika wanapotambua sisi ni watu wazuri. Kwa hiyo, nimeazimia kulitukuza jina la Yehova.

Ingawa Dmitriy na Yelena wametenganishwa tena na vyuma vya gereza, wenzi hao wa ndoa wanatuwekea mfano mzuri wa kufanya ‘shangwe ya Yehova iwe ngome yao.’—Nehemia 8:10.

Huenda Ukapenda Pia

TAARIFA ZA HABARI

Wamefungwa kwa Sababu ya Imani Yao—Urusi

Mashahidi wa Yehova nchini Urusi wamefungwa gerezani kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI