MEI 18, 2022 | HABARI ZIMEONGEZWA: MACHI 12, 2024
URUSI

HABARI ZA KARIBUNI—NDUGU AMEFUNGWA | Inver Siyukhov Ajazwa Nguvu

CHEZA

Machi 7, 2024, Mahakama ya Jiji la Maykop iliyo katika Jamhuri ya Adygeya ilimhukumu Ndugu Inver Siyukhov kifungo cha miaka sita gerezani. Amekuwa mahabusu tangu Aprili 2021 naye ataendelea kubaki kizuizini.

Mfuatano wa Matukio

Aprili 15, 2021

Alishtakiwa kwamba aliendesha mkutano mtandaoni
Aprili 16, 2021

Wenye mamlaka walifanya msako kwenye nyumba ya Inver na pia kwenye nyumba za Mashahidi wengine wanne wa Yehova. Alihojiwa na kuwekwa kizuizini
Aprili 17, 2021

Alipelekwa mahabusu
Agosti 15, 2021

Alihamishwa na kupelekwa kwenye gereza lenye ulinzi mkali lililo kilometa 110 kutoka Maykop
Septemba 13, 2021

Kesi ya uhalifu ilianza

Maelezo Mafupi Kumhusu

Inver Siyukhov

Alizaliwa:1974 (Maykop)

Maisha Yake: Alisomea uhasibu na ukaguzi wa hesabu. Alikuwa mfanyakazi wa benki, na pia mhasibu

Alianza kujifunza na Mashahidi wa Yehova mwaka wa 1989. Alivutiwa na unyoofu wao. Inver alibatizwa Septemba 9, 1990. Alimhubiria dada yake mdogo naye akabatizwa mwaka wa 1992. Katika familia yao ni dada yake tu na mume wa dada yake ambao ni Mashahidi

Maelezo ya Kibinafsi Kutoka kwa Zarieta Churda, Dada Mdogo wa Inver, a

Nini kinachomsaidia Inver kuvumilia akiwa kizuizini?

Mara ya kwanza niliporuhusiwa kuonana naye akiwa mahabusu, nilimuuliza alihisije akiwa mbali na familia na marafiki wake. Akiwa na uso uliojaa furaha aliniambia kwamba tangu wenye mamlaka walipoanza kupekua nyumba yake, alianza kuhisi kana kwamba Yehova anamjaza nguvu, kama vile mtu anavyojaza pumzi kwenye puto (baluni).

Kwa kuongezea, anadumisha ratiba nzuri ya kiroho kwa kusoma Biblia. Anasoma sura tatu kutoka kwenye Maandiko ya Kiebrania na sura moja kutoka kwenye Maandiko ya Kigiriki, kila siku. Anajitahidi pia kuwasaidia wafungwa wengine kwa njia mbalimbali. Kwa miezi miwili ya kwanza akiwa mahabusu aliwasaidia wafungwa wawili kuacha kuvuta sigara.

Umefanya matayarisho gani kwa sababu unafahamu kwamba kuna uwezekano wa wewe na mume wako kukamatwa?

Watalii wanapojitayarisha kusafiri kwenda nchi nyingine, huenda wakapata chanjo ya magonjwa ambayo yanapatikana humo. Mistari ya Biblia, nyimbo zetu, masimulizi yenye kutia moyo ni kama “chanjo” kwangu. Mashahidi wa Yehova walipopigwa marufuku nchini Urusi mwaka wa 2017, nilisoma tena na tena ripoti kwenye Vitabu vya Mwaka kuhusu jinsi kazi ya kuhubiri inavyofanywa katika nchi ambazo kazi yetu imepigwa marufuku. Nilitaka sana kujua jinsi ndugu na dada zetu walivyoendelea kudumisha imani yao na kuendelea kuhubiri licha ya hatari walizokabili.

Tumeamua kwamba ikiwa tutakamatwa, hatutajisikitikia au kujihurumia kupita kiasi. Utakuwa mgawo mgumu lakini wenye thamani kwetu. Ni kama Yehova atakuwa akituambia: “Vuka uingie Makedonia.”—Matendo 16:9.

Tuna hakika kwamba ndugu na dada zetu wapendwa walio Urusi wataendelea “kujipatia nguvu katika Bwana na katika uwezo wa nguvu zake.”—Waefeso 6:10.

a Kwa kuwa kwa sasa Ndugu Siyukhov yuko mahabusu, hatukuweza kupata maelezo kutoka kwake.

Huenda Ukapenda Pia

TAARIFA ZA HABARI

Wamefungwa kwa Sababu ya Imani Yao—Urusi

Mashahidi wa Yehova nchini Urusi wamefungwa gerezani kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI