AGOSTI 23, 2023 | HABARI ZIMEONGEZWA: JUNI 25, 2024
URUSI

HABARI ZA KARIBUNI—NDUGU ATOZWA FAINI | “Ninazidi Tu Kuwa Imara”

CHEZA

Juni 24, 2024, Mahakama ya Jiji la Lesosibirsk iliyo katika Eneo la Krasnoyarsk ilimhukumu Ndugu Valeriy Schitz. Ndugu Valeriy alitozwa faini ya rubo 600,000 (dola 6,894 za Marekani).

Maelezo Mafupi Kumhusu

Valeriy Schitz

Alizaliwa: 1966 (Bolshaya Murta, Eneo la Krasnoyarsk)

Maisha Yake: Alifanya kazi ya ujenzi

Alifunga ndoa na Irina mwaka wa 1987. Wana watoto wawili wa kiume

Valeriy na mke wake walijifunza Biblia pamoja na Mashahidi wa Yehova. Walivutiwa na jinsi unabii wa Biblia unavyotimizwa kwa usahihi. Isitoshe, walijionea jinsi kutumia ushauri wa Biblia maishani kulivyowanufaisha. Wote wawili walibatizwa mwaka wa 2008

Maelezo ya Kibinafsi

Ulihitaji kufanya nini ili kunufaika kutokana na msaada kutoka kwa ndugu na dada zako?

Ndugu na dada zetu waliposikia kuhusu mambo yaliyotupata, walikuwa tayari kutusaidia na walifanya tuhisi kwamba tunapendwa. Wametuonyesha ukarimu na wametumia muda wao na nguvu zao kwa ajili yetu. Kusema kweli, mwanzoni ilikuwa vigumu kwangu kukubali msaada kutoka kwa wengine. Kuna furaha zaidi katika kutoa kuliko ilivyo katika kupokea na maisha yangu yote nimekuwa nikitoa. Hata hivyo, nilihitaji kubadili mtazamo wangu na kukubali msaada kutoka kwa wengine. Kukubali msaada wa wengine kumeniwezesha kupata shangwe ninapowaona wengine wakionyesha upendo kama Yehova na Yesu wanavyofanya.

Ni nini kinachokusaidia usife moyo?

Imani ya kila Mkristo itajaribiwa. Si lazima afungwe gerezani lakini kuna majaribu mengine kama vile magonjwa, kutendewa kwa njia isiyo ya haki, au kufiwa na mpendwa. Andiko la Yakobo 1:3 linanikumbusha kwamba ‘sifa iliyojaribiwa ya imani yangu hutokeza uvumilivu.’ Ili niweze kuvumilia, ninasali kwa Yehova na kumweleza yaliyo moyoni. Ninapozidi kusali ninahisi kwamba uhusiano wangu na Yehova unakuwa imara zaidi. Ninajua kwamba ndugu na dada ulimwenguni pote wanasali kwa ajili yangu na hilo hunitia moyo sana. Huenda mateso haya yakanidhoofisha kimwili na kunizuia kufanya mambo fulani lakini hayatanizuia kuendelea kuwa mwaminifu kwa Yehova. Ninazidi tu kuwa imara.

Tunapata faraja kwa sababu tunajua kwamba katika jaribu lolote ambalo tutapata, Yehova na pia ndugu na dada zetu watatutegemeza.—1 Petro 5:9, 10.

Mfuatano wa Matukio

Novemba 19, 2021

Kesi ya uhalifu yafunguliwa
Novemba 25, 2021

Msako unafanywa nyumbani kwake na anapelekwa kituoni kuhojiwa
Novemba 26, 2021

Anazuiwa kufanya mambo fulani
Mei 18, 2022

Anawekewa vizuizi vya kusafiri
Aprili 10, 2023

Kesi ya uhalifu yaanza

Huenda Ukapenda Pia

TAARIFA ZA HABARI

Wamefungwa kwa Sababu ya Imani Yao—Urusi

Mashahidi wa Yehova nchini Urusi wamefungwa gerezani kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI