JULAI 26, 2022 | HABARI ZIMEONGEZWA: DESEMBA 6, 2023
URUSI

HABARI ZA KARIBUNI—NDUGU NA DADA WAHUKUMIWA | Kuvumilia kwa Ujasiri na Shangwe

CHEZA

Desemba 5, 2023, Mahakama ya Jiji la Surgut iliyo katika Eneo Lililotengwa la Khanty-Mansi—Yugra iliwahukumu ndugu 17 pamoja na dada mmoja. Miongoni mwao ni Ndugu Vasiliy Burenesku, Ndugu Viktor Fefilov, Ndugu Igor Kobotov, Ndugu Igor Petrov, Ndugu Leonid Rysikov, Ndugu Igor Trifonov, na Ndugu Pavel Romashov na mke wake, Dada Viola Shepel. a Ndugu wote 17 walihukumiwa kifungo cha nje cha kati ya miaka sita na miezi mitatu kufikia kifungo cha miaka saba. Dada Shepel alihukumiwa kifungo cha nje cha miaka mitatu na miezi mitatu. Hawahitaji kwenda gerezani wakati huu.

Mfuatano wa Matukio

Februari 15, 2019

Maofisa wa polisi walifanya msako katika nyumba nyingi za Mashahidi wa Yehova jijini Surgut na pia katika majiji yaliyo karibu. Ndugu saba walisema kwamba waliteswa walipokuwa wakihojiwa. Ndugu watatu waliwekwa mahabusu na mwingine aliagizwa kwenda kwenye hospitali ya watu wenye matatizo ya kiakili
Oktoba 3, 2019

Viktor, Igor Kobotov, Igor Petrov, Leonid, Igor Trifonov, Pavel, pamoja na Viola waliwekwa kwenye orodha ya watu wenye msimamo mkali
Oktoba 10, 2019

Vasiliy pia aliwekwa kwenye orodha ya watu wenye msimamo mkali
Julai 23, 2020

Nyumba ya Igor Petrov ilifanyiwa msako kwa mara ya pili, na maofisa wa polisi wakachukua vitu vingine vya kibinafsi
Oktoba 29, 2021

Kesi ya uhalifu ilianza

Maelezo Mafupi Kuwahusu

Igor Kobotov

Alizaliwa: 1973 (Apsheronsk, Eneo la Krasnodar)

Maisha Yake: Alisoma katika shule ya muziki. Alitumikia jeshini kwa miaka miwili. Anafanya kazi kwenye kampuni ya mafuta na gesi

Alipokuwa na umri wa miaka 23, alipata kusudi maishani alipojifunza Biblia. Alibatizwa mwaka wa 1996. Alifunga ndoa na Yuliya mwaka wa 2005. Wana mwana mmoja

Maelezo ya Kibinafsi

Ni nini kinachokusaidia kudumisha mtazamo mzuri kuhusu hali yako?

Ninakumbuka mfano wa Danieli na jinsi alivyotupwa kwenye shimo la simba. . . . Danieli hakuwa na wakili, wala hakukuwa na mahakama ya rufaa, na hakuwa na ndugu na dada ulimwenguni pote ambao wangemtumia barua. Kutafakari kuhusu masimulizi ya Biblia, kunanisaidia kuona hakuna uhakikisho kwamba tutatendewa kwa haki katika ulimwengu huu. Ni muhimu kutambua jinsi Yehova anavyotusaidia licha ya mambo yote yanayoendelea sasa.

Pavel Romashov

Alizaliwa: 1974 (Tomsk, Eneo la Tomsk)

Maisha Yake: Alilelewa na mama yake. Anafanya kazi ya kudumisha majengo kwenye kampuni ya mafuta na gesi. Alifunga ndoa na Viola mwaka wa 2003. Wana binti mmoja

Kwa pamoja, Pavel na Viola walijifunza Biblia na Mashahidi wa Yehova. Pavel aliona kwamba kweli za Biblia zilifanya familia yake iwe yenye furaha zaidi. Alitiwa moyo sana na upendo na urafiki alioona kutanikoni. Wote wawili walibatizwa mwaka wa 2004

Maelezo ya Kibinafsi

Ni nini kilichokusaidia kubaki mtulivu nyumba yako ilipofanyiwa msako?

Nilifanya kazi ya kulinda bidhaa zilizokuwa zikisafirishwa katika Wizara ya Mambo ya Ndani, miaka mitano kabla ya kuwa Shahidi wa Yehova. Kwa hiyo, nimejionea mara nyingi misako, mahojiano, na kesi za uhalifu.

Mara nyingi, nilifikiria kuhusu jinsi msako utakavyofanyika kwenye nyumba yangu na jinsi nitakavyojiendesha lakini nilipoona mlango wangu ukigongwa na maofisa waliofunika nyuso zao, sikuamini jambo hilo lilikuwa likitendeka kihalisi. Papo hapo, . . . nilimwomba Yehova mambo mawili: nisilemewe na woga na nisishindwe kuwaonyesha upendo watu hao. Nilielewa kwamba walikuwa tu wakifanya kazi yao, na hawajui kweli.

Leonid Rysikov

Alizaliwa: 1950 (Srednie Mangareki, Eneo la Krasnoyarsk)

Maisha Yake: Amelelewa kwenye familia ya watoto nane. Amefanya kazi akiwa fundi-umeme na fundi wa magari

Alifunga ndoa na Yevgeniya mwaka wa 1982. Yevgeniya ndiye aliyebatizwa kwanza. Mwanzoni, Leonid alimpinga lakini alipoona upendo na unyoofu miongoni mwa watu wa Yehova alitambua kwamba hii ndiyo kweli. Leonid alibatizwa mwaka wa 1996

Maelezo ya Kibinafsi

Ni nini kinachokusaidia kuwa na mtazamo mzuri unapoendelea kupambana na majaribu?

Ninapenda kuwasaidia wengine hata ninapokabiliana na hali hii. Pia ninajitahidi kuwa mcheshi au kutochukulia mambo kwa uzito kupita kiasi. Ninatambua ni kwa nini ninateswa, na hilo linanihakikishia hata zaidi kwamba sikuzote Yehova atatubariki kwa sababu ya matendo ya uadilifu. Kutafakari hilo kunanipatia shangwe nyingi hata zaidi.

Viola Shepel b

Alizaliwa: 1976 (Stepnogorsk, Kazakhstan)

Maisha Yake: Yeye ni muuguzi kwenye hospitali ya watoto. Alifunga ndoa na Pavel mwaka wa 2003. Wana binti mmoja

Viola na Pavel walijifunza Biblia pamoja na Mashahidi wa Yehova. Viola alipenda majibu ya Biblia yanayopatana na akili kuhusu uwepo wa Mungu, kusudi la uhai, na jinsi ya kuwa na uhusiano mzuri na wengine. Wote wawili walibatizwa mwaka wa 2004

Maelezo ya Kibinafsi

Yehova amekutegemeza jinsi gani?

Kwa miaka mingi nimepambana na ugonjwa wa kushuka moyo. Ninapoanza kushuka moyo, jambo la kwanza ninalofanya ni kusali kwa Yehova, kwa sababu ninajua kwamba siwezi kukabiliana na hisia hizo kwa uwezo wangu mwenyewe. Kisha ninawapigia simu dada zangu wapendwa na kuwauliza jinsi wanavyoendelea. Wakati mwingine wanahitaji tu mtu wa kuongea naye. Baada ya kuzungumza nao, hatua kwa hatua ninaanza kuhisi vizuri zaidi. Hilo linanisaidia kukumbuka kwamba siko peke yangu, bali mimi ni sehemu ya familia kubwa.

Tunaamini kwamba hata ndugu na dada zetu wakikabili ‘dhiki, taabu, mateso, au hatari’ Yehova atawaonyesha upendo na atawategemeza ili ‘washinde kabisa.’—Waroma 8:35, 37.

a b Alidumisha jina lake la awali hata baada ya kufunga ndoa.

Huenda Ukapenda Pia

TAARIFA ZA HABARI

Wamefungwa kwa Sababu ya Imani Yao—Urusi

Mashahidi wa Yehova nchini Urusi wamefungwa gerezani kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI