FEBRUARI 10, 2023 | HABARI ZIMEONGEZWA: JULAI 14, 2023
URUSI

HABARI ZA KARIBUNI—NDUGU WAFUNGWA | Ndugu Watatu Wafikishwa Mahakamani Moscow

CHEZA

Julai 12, 2023, Mahakama ya Wilaya ya Savelovskiy iliyo Moscow iliwahukumu Ndugu Roman Mareyev kifungo cha miaka minne na miezi sita gerezani, Ndugu Anatoliy Marunov kifungo cha miaka sita na miezi sita gerezani, na Ndugu Sergey Tolokonnikov kifungo cha miaka mitano gerezani. Anatoliy alipelekwa kizuizini mara moja baada ya kutoka mahakamani. Roman na Sergey tayari walikuwa kizuizini.

Maelezo Mafupi Kuwahusu

Roman Mareyev

Alizaliwa: 1978 (Moscow)

Maisha Yake: Alifanya kazi katika sekta ya usafiri jijini Moscow. Alikuwa akiwatunza wazazi wake ambao ni walemavu kabla ya kupelekwa mahabusu

Alianza kujifunza Biblia na alivutiwa sana na jinsi unabii wa Danieli ulivyo sahihi. Alibatizwa na kuwa Shahidi wa Yehova mwaka wa 2002

Maelezo ya Kibinafsi

Ni nini kimekusaidia kudumisha mtazamo mzuri licha ya kuwa mahabusu kwa muda mrefu?

Kuwekwa mahabusu kwa sababu ya imani yangu katika Mungu kumenisaidia kutambua kwamba njia bora zaidi ninayoweza kumsifu Mungu ni kupitia mwenendo wangu. Wafungwa wenzangu watapata fursa ya miezi kadhaa ya kuchunguza matendo yangu na jinsi ninavyoshughulika na wengine. Kwa sababu hiyo, ninaona kwamba ni jambo muhimu sana kuendelea kumwomba Yehova roho yake takatifu kila siku ili niweze kuonyesha sifa zake.

Nimejifunza kwamba hali ya kuwa na wasiwasi kuhusu majaribu kabla hayajafika ni mbaya hata zaidi kuliko kupatwa na majaribu yenyewe. Kwanza tunamtumaini Yehova, kisha anatushika mkono na kutuongoza hata tunapotembea katika “bonde lenye kivuli kizito.” (Zaburi 23:4) Jambo ninalopaswa kufanya ni kuendelea kuushika mkono wake. Sikuzote, Yehova hutumia njia mbalimbali kuimarisha tumaini langu kwa hiyo sijapoteza amani au shangwe yangu.

Anatoliy Marunov

Alizaliwa: 1953 (Izmail, Ukrainia)

Maisha Yake: Alikuwa ameajiriwa na kampuni la gazeti kufanya kazi ya kutengeneza michoro kwa kompyuta, baadaye alistaafu

Alifunga ndoa na Alevtina mwaka wa 1975. Wana watoto wawili wa kiume

Alevtina alianza kujifunza Biblia na akabatizwa mwaka wa 1994. Kwa kuwa Anatoliy, alikuwa akifanya kazi katika kampuni ya magazeti, jambo ambalo lilimvutia kwanza ni ubora wa machapisho yanayotokezwa na Mashahidi wa Yehova. Alianza kupendezwa na unabii wa Biblia na alibatizwa mwaka wa 1999

Maelezo ya Kibinafsi

Mlijiandaa jinsi gani kwa ajili ya mateso?

Mimi na mke wangu tulijua kwamba siku moja tutateswa. Kwa hiyo tulisoma kwa makini kila andiko la siku, kila makala, na kusikiliza vizuri kila kitu kilichosemwa kwenye mikutano kutia ndani matangazo. Tunachukulia kwa uzito mwongozo ambao tunapewa na kuufuata kwa uangalifu.

Ni nini kinachokuchochea kuendelea kuvumilia?

Ninathamini sana yale ambayo Baba yetu mpendwa wa mbinguni amefanya kwa ajili yangu na kwa ajili ya familia yangu na hilo hunichochea nisikate tamaa. Ninathamini hata zaidi wakati ujao mzuri ambao amewaahidi wanadamu wote watiifu. Isitoshe, tunajua kwamba mwisho uko karibu.

Sergey Tolokonnikov

Alizaliwa: 1972 (Moscow)

Maisha Yake: Alifanya kazi katika sekta ya usalama

Alifunga ndoa na Mariya mwaka wa 2004. Mariya alianza kujifunza Biblia mwaka wa 2003. Sergey alifurahi kujibiwa maswali yake kupitia Biblia naye pia akaanza kujifunza. Wote wawili walibatizwa mwaka wa 2005

Maelezo ya kibinafsi kutoka kwa Dada Mariya Pankova, mke wa Sergey a

Unawasiliana na mume wako jinsi gani?

Tunawasiliana hasa kupitia barua. Barua zake zinatia ndani masimulizi na mistari mbalimbali ya Biblia. Isitoshe, yeye hunitumia kadi na michoro ambayo inanifurahisha. Hivi karibuni, niliruhusiwa kumtembelea kwa dakika 90 mara mbili kwa mwezi. Inachukua saa tatu kufika kwenye gereza kwa hiyo ninahitaji siku nzima ili kwenda kumtembelea na kurudi nyumbani.

Umejifunza nini kupitia jaribu hili?

Mimi na Sergey tumeona waziwazi kwamba hakuna mtu yeyote—iwe ni mwendesha-mashtaka, hakimu, au mpelelezi—ambaye anaweza kufanya chochote zaidi ya kile ambacho Yehova amemruhusu afanye. Yehova ana uwezo wa kudhibiti kila kitu.

Tunashukuru kwa sababu ya mifano mizuri ya imani ambayo Roman, Anatoliy, na Sergey wanatuwekea. Tuna uhakika kwamba hata tukikabili hali ngumu jinsi gani, hatutaogopa “madhara yoyote,” kwa sababu tunajua kwamba Yehova yuko pamoja nasi.—Zaburi 23:4.

Mfuatano wa Matukio

Oktoba 20, 2021

Maofisa wa polisi walifanya msako katika nyumba nane za Mashahidi wa Yehova jijini Moscow. Kesi ya uhalifu inaanzishwa dhidi ya Roman, Anatoliy, na Sergey, na wanashtakiwa kwa madai ya kupanga utendaji wa shirika lenye msimamo mkali na kuwashawishi wengine kushiriki katika utendaji wa shirika hilo. Ndugu wote watatu wawekwa kizuizini.
Oktoba 22, 2021

Roman na Sergey wapelekwa mahabusu. Anatoliy anawekwa chini ya kifungo cha nyumbani
Juni 17, 2022

Kesi ya uhalifu yaanza

a Makala hii ilipokuwa ikitayarishwa, Ndugu Tolokonnikov alikuwa mahabusu, hivyo hatukuweza kupata maelezo kutoka kwake. Dada Pankova alidumisha jina lake la awali hata baada ya kufunga ndoa.

Huenda Ukapenda Pia

TAARIFA ZA HABARI

Wamefungwa kwa Sababu ya Imani Yao—Urusi

Mashahidi wa Yehova nchini Urusi wamefungwa gerezani kwa sababu ya imani yao. Jifunze historia yao na upate orodha unayoweza kuchapisha ya Mashahidi wowote walio gerezani wakati huu.

TAARIFA ZA HABARI